2 Samuel 3:1-39
3 Saulpaj familiacunamanta cajcunapish, Davidpaj familiamanta cajcunapish achca tiempotami macanacushpa catircacuna. Davidtaca achcacunami apoyai callarircacuna. Cutin Saulpaj familiacunamanta cajcunataca ashacunallami apoyarcacuna.
2 Chai tiempopica Davidca Hebronpimi churicunata charirca. Paipaj punta churica Amnonmi carca. Paipaj mamaca Jezreelmanta Ahinoammi carca.
3 Puntapaj qꞌuipaca Abigailpaj churi Kileabmi carca. Abigailca Nabalmantami viuda saquirishca carca. Nabalca carmelitacunapuramantami carca. Ishquipaj qꞌuipaca Maacapaj churi Absalonmi carca. Maacá huarmica Guesur llajtamanta rey Talmaipaj ushushimi carca.
4 Quimsapaj qꞌuipaca Haguitpaj churi Adoniasmi carca. Chuscupaj qꞌuipaca Abitalpaj churi Sefatiasmi carca.
5 Pichcapaj qꞌuipaca Davidpaj churi Itreammi carca. Itreamca Davidpaj huarmi Eglapaj churimi carca. Caicunami Hebrón llajtapi David charishca churicuna carca.
6 Saulpaj familiamanta cajcunahuan, Davidpaj familiamanta cajcunahuan macanacushpa caticujpica Abnerca Saulpaj familiapi cajcunapurapica jatun pushajmi tucurca.
7 Saulca Rizpá shuti caishuj huarmitami* charirca. Rizpá huarmica Ayá runapaj ushushimi carca. Shuj punllaca Is-Bosetca Abnertaca: “¿Imamantataj canca ñuca yayapaj caishuj huarmihuan chayarinacurcangui?” nircami.
8 Abnerca Is-Bóset nishcacunata uyashpami yallitaj pꞌiñarirca. Paica: “¿Ñucaca Judamanta shuj allcuchu* cani? Ñucaca cunancamami cambaj yaya Saulpaj familiamanpish, paipaj huauquicunamanpish, paipaj amigocunamanpish mana tucurij cꞌuyaita ricuchishcani. Cantapish Davidpaj maquipi churashpaca mana traicionashcanichu. Chashna jahuachu shuj huarmihuan mana allita rurashcamanta ñucataca juchachingui.
9 Davidman Jehová Dios jurashcata ñuca mana rurajpica Diosllataj ñucata* sinchita castigachun.
10 Diosca Saulpaj familiamanta mandanata anchuchishpami David jatun tiyarinapi tiyarishpa Israelta, Judata mandachun churasha nishpa jurarca. Chaica Danmanta Beer-Sebacamami canga” nircami.
11 Is-Bosetca Abnerta achcata manchashcamantami shuj palabrallatapish ña mana ni tucurca.
12 Abnerca chai ratomi huillajcunata Davidpajman cacharca. Paica: “¿Cai llajtaca pipajtaj canyari? Ñucahuan shuj ari ninacuita* rurai. Tucui israelitacuna cambaj parte tucuchunpish ñucaca tucui pudishcatami rurasha”* nichunmi cacharca.
13 Chaita huillajpimi Davidca: “Allimi can, canhuanmi shuj ari ninacuita rurasha. Caillatami mañani, ñucata ricunaman shamushpaca Saulpaj ushushi Micalta pushamungui. Paita mana pushamushpaca ñucata ricunamanca ama shamungui” nishpa cutichirca.
14 Chaimi Davidca Saulpaj churi Is-Bosetmanca huillajcunata cachashpaca: “Ñuca huarmi Micalta tigrachi. Paihuan cazarangapajca 100 filisteocunapaj charishca aicha mirga carata pꞌitishpami ari ninacurcani” nirca.
15 Chaimi Is-Bosetca Laispaj churi Paltielpaj huarmi Micalta quichuchun mandarca.
16 Pero Paltielca Bahurimman chayangacamami paipaj huarmita huacaihuan huacaihuan catishpa rirca. Chaimi Abnerca: “¡Tigrashpa rilla!” nirca. Chashna nijpimi Paltielca tigrashpa rircalla.
17 Abnerca israelitacunata pushajcunamanca* cai huillaitami cacharca: “Cancunaca achca tiempo huashamantami David cancunapaj rey tucuchun munanguichij.
18 Cunanmi Davidta cancunapaj rey cachun agllana horas can. Jehová Diosca Davidmanca: ‘Ñuca pueblo israelitacunataca filisteocunapaj maquimanta, tucui paicunapaj contracunamantapish ñucata sirvij Davidhuanmi quishpichisha’ nishcami carca” nircami.
19 Chaimi Abnerca benjaminitacunahuan parlarca. Shinallataj paica israelitacunapish, Benjaminpaj tucui familiapish imalla ruranata ari nishcatami Davidhuan Hebrón llajtapi pacalla parlanacungapaj rirca.
20 Abnerca paipaj 20 runacunahuanmi Davidta Hebrón llajtapi ricunaman rirca. Chaimi Davidca Abnerpaj, paipaj runacunapajpish shuj jatun micuita rurarca.
21 Abnerca Davidmanca: “Ñuca amito reylla, tucui israelitacunata cambaj ñaupajpi tandachinaman richun saqui. Chashnami paicunaca canhuan shuj ari ninacuita ruranga. Shinallataj canca tucui Israel llajtatami can munashca shina mandangui” nircami. Chashna nijpimi Davidca Abnerta richun saquirca. Chaimi Abnerca tranquilo rircalla.
22 Chai ratomi Joabpish, Davidta sirvijcunapish shuj lugarta llaquichishpa, chaimanta quichumushca achca cosascunata apashpa tigramushcacuna carca. Davidca Abnertaca tranquilo richunmi saquishca carca. Chaimantami Abnerca Davidhuan Hebronpi ña mana carca.
23 Joab tucui soldadocunahuan shamujpica: “Nerpaj churi Abnermi reyta ricunaman shamurca. Pero Davidca paita richun saquircallami. Chaimi Abnerca tranquilo rircalla” nishpami huillarcacuna.
24 Joabca rey maipi cashcaman yaicushpaca cashnami nirca: “¿Imatataj rurashcangui? Abnerca cantami ricunaman shamushca. Shinapish canca imata mana rurashpami richun saquishcangui. ¿Imamantataj chaita rurarcangui?
25 ¡Canca Nerpaj churi Abner ima shina cashcataca allimi yachangui! Paica canta umashpa can tucui imata ruracushcata, can imata ruragrishcata yachangapajllami shamushca” nircami.
26 Chaimi Davidpajmanta Joab rishpaca Abnerta mashcanaman richun huillajcunata cacharca. Chai huillajcunaca Sirá yacuta tandana jutcumantami Abnertaca tigrachishpa pushamurcacuna. Chaitaca Davidca mana imata yacharcachu.
27 Abner Hebronman tigrajpica Joabca Abnertaca chai llajtapaj pungu ucumanmi paihuan pacalla parlangapaj pushashpa rirca. Chaipimi Joabca espadahuan Abnerta huijsapi satishpa paita huañuchirca. Joabca paipaj huauqui Asahelta Abner huañuchishcamantami chashna rurarca.
28 Chai huasha David chaita yachaj chayashpaca: “Jehová Diospaj ñaupajpica ñucapish, ñuca mandanapish Nerpaj churi Abnerta huañuchishcamantaca huiñaipajmi mana culpayuj cashun.
29 Caimantaca Joabpish, paipaj yayapaj familiapish castigashca cachun. ¡Joabpaj familiapica pai charishca aichamanta quiya shina yacu llujshishca runapish, lepra ungüita charijpish, puchcaj runapish,* espadamanta huañujpish, yaricaita charij shuj runallapish ama illachun!” nircami.
30 Gabaonpi tiyaj macanacuipimi Abnerca Joabpaj, Abisaipaj huauqui Asaheltaca huañuchishca carca. Chaimi Joabpish, paipaj huauqui Abisaipish Abnerta huañuchircacuna.
31 Davidca Joabmanpish, Joabhuan caj tucui gentecunamanpish: “Ropata lliquirishpa, racu sacota* churarishpa Abnermanta huacaichij” nircami. Huañushcata camillapi apashpa ricujcunapaj huashatami rey Davidpish catishpa ricurca.
32 Abnertaca Hebronpimi pambarcacuna. Rey Davidpish Abner pambashca jutcu cꞌuchupimi caparishpa huacai callarirca. Tucui gentecunapishmi huacai callarircacuna.
33 Reyca Abnermanmi cai cantota cantarca:
“¿Abnerca yuyai illaj shinachu huañuna carca?
34 Cambaj maquicunaca mana huatashcachu carca,cambaj chaquicunapish cadenacunata* mana charircachu.
Huañuchijcunapaj* maquipi urmaj shinami canpish urmashcangui” nircami.
Chai ratomi tucui gentecuna Abnermanta cutin huacai callarircacuna.
35 Chai qꞌuipaca Davidpaj tucui runacunami manaraj punlla tucurijpi David micuchun ningapaj shamurcacuna. Pero Davidca: “¡Manaraj inti huashicujpi tandatapish, ima shujtaj micunatapish ñuca micujpica Dios ñucata sinchita castigachun!” nishpami jurarca.
36 Tucui gentecunami ima tucushcata ricurcacuna. Chaica paicunapajca allimi carca. Rey tucui imallata ruracushcapish paicunapajca allimi carca.
37 Chai punllaca Davidpaj tucui runacunapish, tucui israelitacunapish Nerpaj churi Abnerta huañuchishcamantaca rey David mana culpata charishcatami yachaj chayarcacuna.
38 Chaimi rey Davidca paita sirvijcunamanca cashna nirca: “¿Israel llajtapi cunan shuj mandaj, shuj importante runa huañushcataca manachu yachanguichij?
39 Ñucaca rey shina agllashca cashpapish Zeruyapaj churicunapaj contra imata rurangapajca fuerzata mana charinichu. Cai runacunaca ñucapajca yallitaj millaicunami can. Paicuna mana allita rurashcamantaca Jehová Dios castigachun” nircami.
Notacuna
^ O “concubinatami”.
^ Hebreo rimaipica: “allcupaj umachu” ninmi.
^ Hebreo rimaipica: “Abnerta” ninmi.
^ O “pactota”.
^ Hebreo rimaipica: “¡ricui!, ñuca maquica canhuanmi can” ninmi.
^ Hebreo rimaipica: “ancianocunamanca” ninmi.
^ Caipica huarmi rurana trabajota shuj lisiarishca runa ruraj cashcamantami parlacuj yuyachin.
^ O “pꞌaza sacota”, “cañamazu sacota”.
^ Hebreo rimaipica: “cobrecunata” ninmi.
^ Hebreo rimaipica: “Cashcata mana rurajcunapaj” ninmi.
