2 Samuel 4:1-12
4 Hebrón llajtapi Abner huañushcata uyashpami Saulpaj churi Is-Bosetca yallitaj manchai callarirca. Israelitacunapish yallitajmi sustarircacuna.
2 Chaipica grupo shuhuajcunata pushaj ishqui runacunami tiyarca. Paicunaca Saulpaj churi partemi carca. Shujca Baaná shutimi carca. Caishujca Recab shutimi carca. Paicunaca beerotitacunapuramanta Rimonpaj churicunami carca. Rimonca Benjaminpaj familiamantami carca. (Beerot llajtapi causajcunaca Benjaminpaj familia partemi carca.
3 Beerotitacunaca Guitaim lugarmanmi miticushpa rircacuna. Chaipimi cunan punllacunacama shujtaj llajtamanta shamushca runacuna shina causacuncuna).
4 Saulpaj churi Jonatanca shuj churitami charirca. Paica Mefibóset shutimi carca. Mefibosetca ishquindij chaquicuna cojomi carca. Mefibóset pichca* huatacunata charijpimi Jezreel llajtamanta Saulpish, Jonatanpish huañushcata huillanaman shamurcacuna. Chaimi paita huiñachij huarmica Mefibosetta rigrapi marcashpa ucui jahua miticushpa rirca. Chashna ricushpami paica Mefibosettaca urmachirca. Chaimantami Mefibosetca chaquicuna cojo saquirirca.
5 Recabpish, Baanapish beerotitacunapuramanta Rimonpaj churicunami carca. Paicunami Is-Bosetpaj huasiman rircacuna. Paicunaca yallitaj rupai horasmi Is-Bóset chaupi punllata samarishpa dormicujpi chaimanca chayarcacuna.
6 Recabpish, paipaj huauqui Baanapish trigota mashcaj shinami Is-Bosetpaj huasiman yaicurcacuna. Chaipimi Is-Bosettaca huijsapi cuchillohuan satircacuna. Qꞌuipaca paicunaca chaimanta llujshishpami miticushpa rircacuna.
7 Recabpish, Baanapish Is-Bosetpaj huasiman yaicujpica Is-Bosetca paipaj cuartopimi camapi siricurca. Chaipimi Is-Bosettaca cuchillohuan satishpa huañuchircacuna. Chai huashaca paipaj umata pꞌitishpami apashpa rircacuna. Chashnami tucui tuta Arabá pugru pamba ñanta purishpa rircacuna.
8 Recabpish, paipaj huauqui Baanapish Hebronman chayashpaca rey Davidpajmanmi Is-Bosetpaj umata aparcacuna. Paicunaca: “Saulpaj churi Is-Bosetpaj umaca caipimi can. Saulca cambaj contrami carca. Cambaj causaitapishmi quichusha nirca. Ñuca amito reylla, cunanmi Jehová Diosca Saulpaj, paipaj huahua huahuacunapaj contra tigra llaquichichun saquishca” nircacunami.
9 Pero Davidca beerotitacunapuramanta Rimonpaj churicuna Recabman, paipaj huauqui Baanamanpish cashnami nirca: “Tucui ñuca llaquicunamanta ñucata quishpichij* causaj Jehová Diospaj shutipimi jurani.
10 ‘Saulca huañushcami’ nishpa huillanaman shamuj runaca alli huillaita apamucushcatami yuyarca. Chaimi paitaca Ziclag llajtapi japishpa huañuchircani. ¡Huillanaman shamushcamantami chai runamanca shuj premiota cucushca shina paita japishpa Ziclagpi huañuchircani!
11 ¡Ima culpata mana charij runata paipaj huasipi cama jahuapi japishpa huañuchij millai runacunatacarin chaitapish yallimari rurasha! ¿Manachu huañuchishca runapaj yahuarmantaca cancunata castigana cani? ¿Manachu chaimantaca cancunataca cai allpamanta tucuchina cani?” nircami.
12 Chaimi Davidca paihuan caj runacunataca paicunata huañuchichun mandarca. Chashna mandajpimi Davidpaj runacunaca paicunapaj maquicunatapish, chaquicunatapish utushpa, paicunapaj cuerpocunatapish Hebronpi caj jatun tanque yacu cꞌuchupi huarcurcacuna. Cutin Is-Bosetpaj umataca Hebronpi saquirij Abner pambashca jutcuman apashpami chaipi pambarcacuna.
