2 Samuel 5:1-25
5 Tiempo qꞌuipaca Israelmanta tucui familiacunami Davidta Hebrón llajtapi ricunaman shamurcacuna. Paicunaca cashnami nircacuna: “¡Ñucanchijca caipimi canchij! Cambaj familiapurallatajmi* canchij.
2 Canca ñaupamantami Israel llajtata macanacuipi pushaj carcangui. Chai punllacunapica Saulmi ñucanchijta mandaj rey carca. Jehová Diosca cantaca: ‘Canmi ñuca pueblo Israelta michingui. Canmi Israel llajtata pushangui’ nircami” nircacunami.
3 Israelitacunata tucui pushajcunaca* rey Davidtami Hebronpi ricunaman shamurcacuna. Chaipimi rey Davidca paicunahuan Jehová Diospaj ñaupajpi ari ninacurcacuna. Chai qꞌuipami paicunaca Davidtaca Israel llajtapi rey cachun agllarcacuna.
4 Davidca 30 huatacunata charishpami rey tucurca. Paica 40 huatacunatami mandarca.
5 Hebrón llajtamantami canchis huatacunata, sujta quillacunata Judá llajtata mandarca. Shinallataj Jerusalenmantami tucui Israel llajtata, Judá llajtata 33 huatacunata mandarca.
6 Reypish, paihuan caj runacunapish Jerusalenmanmi rircacuna. Paicunaca chai llajtapi causaj jebuseocunapaj contrami macanacunaman rircacuna. Pero jebuseocunaca Davidmanta burlarishpami: “¡Canca caimanca mana nunca yaicunguichu! Ciegocunapish, cojocunapish cantaca caimantami manchachishpa cachanga” nircacuna. Paicunaca: “Davidca caimanca mana nunca yaicungachu” nishpami yuyacushcacuna carca.
7 Shinapish Davidca jatun pircacunayuj Sion* llajtatami mishashpa japirca. Cunanca chai llajtaca Davidpaj Llajtami* can.
8 Chai punllaca Davidca: “¡Jebuseocunata llaquichigrijcunaca larca yacuta rishpa ‘cojocunata, ciegocunata’ huañuchinaman richun. Ñucaca paicunatami pꞌiñani!” nircami. Chaimantami: “Ciegocunapish, cojocunapish huasimanca nunca mana yaicungacunachu” nishca tiyan.
9 Qꞌuipaca Davidca jatun pircacunayuj llajtapimi causangapaj saquirirca. Cai llajtataca Davidpaj Llajta nishpami shutichircacuna.* Davidca pircacunata, shujtaj huasicunatapishmi Miló* nishca lomapi, chai llajtapaj shujtaj ladocunapipish shayachirca.
10 Jahua pacha soldadocunata mandaj Jehová Dios paihuan cashcamantami Davidca ashtahuan ashtahuan poderta charishpa catirca.
11 Tiromanta rey Hiramca huillajcunatami Davidpajman cacharca. Shinallataj huasita,* chai huasipaj pircacunatapish shayachichunmi cedro caspicunata, albañilcunata, carpinterocunata cacharca. Chaimi paicunaca Davidpaj huasita shayachi callarircacuna.
12 Chashnami Davidca Jehová Dios paiman pi mana cuyuchipaj mandanata Israel llajtapi cushcata intindirca. Diosca paipaj pueblo israelitacunata ayudangapajmi chashna rurarca.
13 Davidca Hebronmanta shamushca qꞌuipaca Jerusalenpimi paipaj huarmicuna cachun ashtahuan huarmicunata japirca. Shinallataj paipaj caishuj huarmicuna* cachunpishmi ashtahuan huarmicunata japirca. Chai huarmicunami ashtahuan churicunata, ushushicunata paiman curcacuna.
14 Jerusalenpi charishca churicunapaj shuticunaca caicunami can: Samúa, Sobab, Natán, Salomón,
15 Ibhar, Elisúa, Néfeg, Jafía,
16 Elisamá, Eliadá, Elifeletpishmi carca.
17 Davidta Israel llajtata mandaj cachun agllashcatami filisteocunaca yachaj chayarcacuna. Chaimi tucui filisteocunaca paita mashcanaman huichiyarcacuna. Davidca chaita yachaj chayashpami miticuna lugarman uriyarca.
18 Filisteocunaca Refaím pugru pambaman chayashpami macanacungapaj tucui pugru pambata puricurcacuna.
19 Shinapish Davidca Jehová Diostami: “¿Filisteocunahuan macanacungapaj huichiyashachu? ¿Paicunataca ñuca maquipichu churangui?” nishpa tapurca. Chashna nijpimi Jehová Diosca: “Ari, filisteocunataca cambaj maquipitajmi churasha. Chaimanta huichiyailla” nishpa cutichirca.
20 Chaimi Davidca Baal-Perazimman rishpaca filisteocunahuan macanacushpa paicunata misharca. Shinallataj Davidca: “Jehová Diosmi ñuca ñaupajta rishpa yacucuna tallirij shina, jatun pircata yacucuna tꞌuñij shina ñucapaj contracunata tucuchirca” nircami. Chaimantami chai lugartaca Baal-Perazim* nishpa shutichirca.
21 Filisteocunaca chaipimi paicunapaj rurashcalla dioscunata shitashpa rircacuna. Chaimi Davidpish, paihuan caj runacunapish chaicunata apashpa rircacuna.
22 Chai qꞌuipaca filisteocunaca cutin huichiyashpami macanacungapaj Refaím pugru pambapi puricurcacuna.
23 David Jehová Diosta tapujpica paica cashna nishpami cutichirca: “Paicunahuan chꞌimbapura macanacungapajca ama huichiyangui. Ashtahuanpish paicunapaj muyundijta rishpa, bacá* nishca yuracuna huashapi miticungui. Chaimanta llujshishpa paicunahuanca macanacungui.
24 Soldadocuna marchacuj shina bacá nishca yuracunapaj umacunapi uyarijpimi paicunahuan macanacungapaj utca llujshina cangui. Chaipimi Jehová Diosca cambaj ñaupajta rishpa filisteo soldadocunataca huañuchinga” nircami.
25 Davidca Jehová Dios mandashca shinallatajmi rurarca. Chaimi paica filisteocunata Guebamanta Guezercama catishpa huañuchirca.
Notacuna
^ Hebreo rimaipica: “Cambaj tullu, cambaj aichami” ninmi.
^ Hebreo rimaipica: “ancianocunaca” ninmi.
^ “Sion” shimita huasha diccionariopi ricui.
^ “Davidpaj Llajta” shimita huasha diccionariopi ricui.
^ Caitaca “paica shutichirca” nishpapishmi traducishcacuna.
^ “Miló” shimica hebreo rimaipica ‘jundachishca’ nisha ninmi. “Miló” shimita huasha diccionariopi ricui.
^ O “palaciota”.
^ O “concubinacuna”. “Concubina” shimita huasha diccionariopi ricui.
^ “Baal-Perazim” shutica ‘tꞌuñij amo’ nisha ninmi.
^ O “bekja”.
