2 Samuel 6:1-23
6 Davidca cutinllatajmi Israelmanta ashtahuan alli soldadocunata tandachirca. Paicunaca 30.000 runacunami carca.
2 Davidpish, paihuan caj tucui runacunapish Baale-Judá llajtamanmi rircacuna. Chai llajtamanta Diospaj Arcata huichiyachingapajmi chaiman rircacuna. Arcapaj ñaupajpimi gentecunaca jahua pacha soldadocunata mandaj Jehová Diospaj shutita nishpa mañancuna. Diosca querubincunapaj jahuapimi* tiyacun.
3 Lomapi caj Abinadabpaj huasimanta Diospaj Arcata apangapajmi shuj mushuj carretapi churarcacuna. Chai mushuj carretataca Abinadabpaj churicuna Uzá, Ahió runacunami apacurcacuna.
4 Lomapi caj Abinadabpaj huasimantami Diospaj Arcataca aparcacuna. Ahió runaca chai Arca ñaupajtami purishpa rirca.
5 Davidpish, tucui israelitacunapish Jehová Diospaj ñaupajpimi enebro caspicunahuan rurashca tucui laya instrumentocunahuan, arpacunahuan, cuerdata charij shujtaj instrumentocunahuan, panderetacunahuan, cimbalocunahuan, shujtaj instrumentocunahuan cushicurcacuna.
6 Paicunaca Nacón trillana pambamanmi chayarcacuna. Shinapish chaiman chayashpa huagracuna carretata ñalla vueltachigrijpimi Uzá runaca paipaj maquita chutashpa Diospaj Arcata japirca.
7 Chaita rurashcamantami Jehová Diosca Uzá runahuanca yallitaj pꞌiñarirca. Chaimi Diosca paipaj leyta mana respetashcamanta Uzá runataca chaillapitaj huañuchirca. Uzá runaca Diospaj Arca cꞌuchupimi huañurca.
8 Shinapish Jehová Dios yallitaj pꞌiñarishpa Uzá runata huañuchishcamantami Davidca colerarca.* Chaimantami chai lugartaca cunan punllacama Pérez-Uzá nishpa shutichincuna.
9 Chai punllaca Davidca Jehová Diosta achcata manchashpami: “¿Jehová Diospaj Arcataca ima shinataj apamushari?” nirca.
10 Davidca Jehová Diospaj Arcataca pai causacushca Davidpaj Llajtamanca mana apamusha nircachu. Chaipaj randica Gat llajtamanta Obed-Edompaj huasiman apachunmi mandarca.
11 Jehová Diospaj Arcaca Gat llajtamanta Obed-Edompaj huasipimi quimsa quillacunata saquirirca. Jehová Diosca Obed-Edomtapish, paipaj huasipi tucui cajcunatapish bendicianataca manataj saquircachu.
12 Davidmanca: “Diospaj Arcamantami Jehová Diosca Obed-Edompaj huasitapish, pai tucui imalla charishcacunatapish bendiciashca” nishpami huillarcacuna. Chashna huillajpimi Davidca yallitaj cushicushpa Davidpaj Llajtaman apangapaj Diospaj Arcata Obed-Edompaj huasipi mashcanaman rirca.
13 Jehová Diospaj Arcata apajcuna sujta pasocunata purijpica Davidca shuj torota, shuj huirayashca animaltami sacrificiota rurarca.
14 Davidca Jehová Diospaj ñaupajpimi yallitaj cushicushpa, vueltata cushpa bailacurca. Paica linomanta rurashca efodtapishmi* churashca carca.
15 Davidpish, tucui israelitacunapish Jehová Diospaj Arcataca cushicuihuan caparishpa, gachupipish tocashpami apamucurcacuna.
16 Jehová Diospaj Arcaca Davidpaj Llajtamanmi chayarca. Chaiman chayajpimi Davidca Jehová Diospaj ñaupajpi cushicushpa, saltashpa, vueltata cushpa bailacurca. Chaitami Saulpaj ushushi Micalca jahua ventanamanta urilla ricurca. Chaita ricushpami Micalca paipaj shungupi Davidta pꞌiñai callarirca.
17 Davidca Jehová Diospaj Arcapajmi shuj carpa huasita allichishca carca. Chashnami chai Arcataca chai carpa huasiman yaicuchishpa maipi churana cashcapi churarcacuna. Davidca Jehová Diospaj ñaupajpimi rupachishca ofrendacunata, Dioshuan alli tucungapaj sacrificiocunatapish curca.
18 Davidca rupachishca ofrendacunata cushca qꞌuipa, Dioshuan alli tucungapaj sacrificiocunata cushca qꞌuipami gentecunataca jahua pacha soldadocunata mandaj Jehová Diospaj shutipi bendiciarca.
19 Shinallataj tucui chaipi cajcunaman, tucui tandanacushca israelitacunamanmi, cꞌaricunamanpish, huarmicunamanpish, cada unoman shuj rosca tandata, palma yuramanta pꞌucushca frutahuan rurashca tortata, chaquishca uvacunahuan rurashca shuj tortatapish curca. Chai qꞌuipami gentecunaca chaimanta rishpa cada uno paicunapaj huasiman rircacuna.
20 David paipaj huasipi cajcunata bendicianaman tigracujpimi Saulpaj ushushi Micalca paita tupanaman llujshirca. Micalca: “¡Maitataj Israelpaj reyca paita sirvijcunapaj esclava huarmicunapaj ñaupajpi lluchulla tucushpa pingaipi saquirina cangayari! ¡Chaita rurashpaca shuj muspa runa gentecunapaj ñaupajpi lluchulla tucuj shinami can!” nircami.
21 Chaimi Davidca Micalmanca: “Jehová Diospaj ñaupajpimi cushicucurcani. Diosmi ñucataca cambaj yayapaj randi, cambaj yayapaj tucui familiapaj randi agllarca. Paimi israelitacunapaj Jehová Diospaj pueblota pushaj cachunca ñucata agllarca. Chaimantami Jehová Diospaj ñaupajpica ñucaca cushicushpa catisha.
22 Ñucaca chaitapish yallimi humillarisha. Imapajpish mana valij shinami ricurisha. Pero can nishca esclavacunaca ñucatami jatunyachingacuna” nircami.
23 Saulpaj ushushi Micalca pai huañuna punllacamami huahuacunataca mana charirca.
Notacuna
^ Caitaca “chaupipi” nishpapishmi traducishcacuna.
^ O “mana alli sintirirca”.
^ “Efod” shimita huasha diccionariopi ricui.
