2 Samuel 8:1-18
8 Asha tiempo qꞌuipaca Davidca macanacushpami filisteocunata misharca. Chashnami filisteocunapaj maquimanta Meteg-Amá lugarta quichurca.
2 Shinallataj paica moabitacunatapishmi misharca. Paicunataca pambapi siririchunmi mandarca. Shina mandashpami paicunataca shuj huascahuan midirca. Paicunataca grupocunapimi chꞌicanyachirca. Ishqui grupoca huañungapajmi carcacuna. Cutin shuj grupoca causaihuan saquiringapajmi carca. Chaimantami moabitacunaca Davidpaj sirvijcuna tucurca. Paicunaca tributocunatapishmi pagajcuna carca.
3 Davidca Rehob runapaj churi Hadadezertami misharca. Hadadezerca Zobá llajtata mandajmi carca. Éufrates jatun yacu cꞌuchulla allpacunata Hadadézer cutin japinaman ricujpimi Davidca chashna misharca.
4 Shinallataj Davidca Hadadezerpaj 1.700 caballopi purijcunata, 20.000 chaquillahuan rij soldadocunatami japirca. Chai qꞌuipaca carretacunata aisaj caballocunatami cojota saquirca. Pero carretacunata aisaj 100 caballocunataca mana imata rurarcachu.
5 Damascomanta siriocuna Zobá llajtata mandaj rey Hadadezerta ayudanaman shamujpimi Davidca 22.000 siriocunata huañuchirca.
6 Davidca Siria llajtapi saquirij Damascopimi grupo soldadocunata churarca. Chashnami sirio runacunaca paita sirvijcuna tucurca. Paicunaca tributocunatapishmi pagajcuna carca. Jehová Diosca David maita rijpipish paitaca siempremi cuidaj* carca.
7 Davidca Hadadezerpaj sirvijcunataca oromanta rurashca redondo escudocunata quichushpami Jerusalenman aparca.
8 Shinallataj rey Davidca Hadadézer mandacushca Bétah llajtamanta, Berotái llajtamantami achca cobreta aparca.
9 Hamatmanta Toi shuti reyca Hadadezerpaj tucui soldadocunata David mishashcatami uyarca.
10 Chaimi Toi shuti reyca paipaj churi Joramta rey David ima shina cashcata tapuchun, Hadadezerhuan macanacushpa mishashcamanta felicitanaman cacharca. (Hadadezerca achca cutinmi Toi shuti reyhuan macanacushca carca). Joramca oromanta rurashca, cullquimanta rurashca, cobremanta rurashca cosascunatami Davidpaj aparca.
11 Rey Davidca shujtaj llajtacunamanta mishashpa apamushca cullquita, orota chꞌicanyachij shinallatajmi caicunatapish Jehová Diospaj chꞌicanyachirca. Chai quichumushca cosascunaca
12 Siriamanta, Moabmanta, ammonitacunamanta, filisteocunamanta, amalequitacunamantami carca. Shinallataj Zobá llajtamanta Rehobpaj churi rey Hadadezerpaj quichumushca cosascunatapishmi chꞌicanyachirca.
13 Davidca 18.000 edomitacunata Cachi pugru pambapi huañuchishpami shujtajcunapaj yallitaj rijsishca tucurca.
14 Davidca Edom llajtapimi grupo soldadocunata churarca. Tucui Edom llajtapimi grupo soldadocunata churarca. Tucui Edom llajtapi causajcunami Davidpaj sirvijcuna tucurca. Jehová Diosca David maita rijpipish paitaca siempremi cuidaj carca.
15 Davidca tucui Israel llajtatami mandashpa catirca. Shinallataj tucui paipaj llajtapi causaj gentecunatami cashcata rurashpa juzgarca.
16 Zeruyapaj churi Joabmi soldadocunata mandaj carca. Cutin Ahiludpaj churi Jehosafatca reypaj registradormi carca.
17 Ahitubpaj churi Sadoc, Abiatarpaj churi Ahimelecca sacerdotecunami carca. Cutin Serayaca secretariomi carca.
18 Jehoiadapaj churi Benayaca keretitacunata, peletitacunata mandajmi carca. Davidpaj churicunaca importante cargocunatami charijcuna* carca.
