2 Samuel 9:1-13
-
Davidca mana tucurij cꞌuyaitami Mefibosetman ricuchin (1-13)
9 Davidca: “¿Jonatanman nishca shina ñuca mana tucurij cꞌuyaita ricuchingapajca Saulpaj familiapurapica pi tiyanchu?” nircami.
2 Saulpaj familiata sirvij Zibá runami tiyarca. Paitami cayanaman cacharcacuna. Rey Davidca: “¿Zibá, canchu cangui?” nishpami tapurca. Chashna tapujpimi Zibá runaca: “Ari, canta sirvijmi cani” nishpa cutichirca.
3 Shinallataj rey Davidca: “¿Diospaj mana tucurij cꞌuyaita ñuca ricuchingapajca Saulpaj familiapurapi pi tiyashpa catinchu?” nishpami catirca. Chashna nijpimi Zibá runaca reymanca: “Jonatanpaj shuj churi tiyanrajmi. Paica ishquindij chaquicuna cojomi can” nirca.
4 Shina nijpimi rey Davidca: “¿Paica maipitaj canyari?” nishpa tapurca. Chashna tapujpimi Zibá runaca: “Paica Amielpaj churi Makirpaj huasipimi can. Chai huasica Lo-Debarpimi can” nishpa cutichirca.
5 Chai ratomi rey Davidca Lo-Debarpi caj Amielpaj churi Makirpaj huasimanta paita pushanaman cacharca.
6 Chaimi Saulpaj nieto, Jonatanpaj churi Mefibosetca David maipi cashcaman yaicurca. Yaicushcahuanmi pambacama cumurishpa cungurirca. Chaimi Davidca: “¡Mefibóset!” nirca. Chashna nijpimi Mefibosetca: “Canta sirvijca caipimi can” nishpa cutichirca.
7 Davidca Mefibosetmanca: “Ama manchaichu. Cambaj yaya Jonatanmantami canmanca mana tucurij cꞌuyaita ricuchishataj. Cambaj abuelo Saulpaj tucui allpacunatapishmi canmanca tigrachisha. Canca siempremi ñuca mesapi ñucahuan micungui” nircami.
8 Mefibosetca cutinllataj cungurishpami Davidmanca: “¿Canta sirvijta can yuyarichunca ñucaca imataj caniyari? Ñucaca huañushca allcu shinallamari cani” nirca.
9 Chai qꞌuipami rey Davidca Saulta sirvij Zibá runata cayanaman cachashpaca cashna nirca: “Saulpaj tucui allpacunatapish, paipaj familiapaj tucui allpacunatapishmi cambaj amopaj nieto Mefibosetman cuni.
10 Cambaj amopaj nieto Mefibosetpaj familia micunata charichunmi canpish, cambaj churicunapish, canta sirvijcunapish allpacunapi tarpushpa, cosechana canguichij. Pero cambaj amopaj nieto Mefibosetca siempremi ñuca mesapi ñucahuan micunga” nircami.
Zibá runaca 15 churicunata, 20 sirvijcunatami charirca.
11 Qꞌuipaca Zibá runaca rey Davidmanca: “Ñuca amito reylla, can mandashca shinami canta sirvijca ruranga” nircami. Chai horasmantami Mefibosetca rey Davidpaj churicuna shinallataj Davidpaj mesapi micurca.
12 Mefibosetca shuj uchilla churitami charirca. Paipaj shutica Micá shutimi carca. Zibá runapaj huasipi causajcunaca tucuicunami Mefibosetpaj sirvijcuna tucurca.
13 Mefibosetca ishquindij chaquicuna cojomi carca. Paica reypaj mesapi siempre micuj cashcamantami Jerusalenpi causarca.