2 Timoteo 2:1-26
2 Chaimanta ñuca huahualla, Cristo Jesús yallitaj llaquij cashcata ricuchishcamanta sinchiyarishpa cati.
2 Ñuca ima nishcacunatami canca uyarcangui. Chaitaca achca gentecunapishmi ricushpa huillarcacuna. Chaicunataca pajtachij runacunaman mingai. Chashnami paicunaca shujtajcunata yachachingapaj allichirishca cangacuna.
3 Cristo Jesuspaj alli soldado cashcamanta sufrina cajpica llaquicunata apailla.
4 Maijanpish soldado tucushpaca soldado cachun churajta cushichisha nishpami mantiniringapajca ima shujtaj negociocunapica mana chagrurin.
5 Pugllaicunapi pugllajpish reglamentopi nishca shina mana pugllashpaca ima premiota* mana japinchu.
6 Tarpushpa sinchita trabajaj runaca pꞌucushca granocunataca pairajmi micuna can.
7 Ñuca ima nicushcapi cutin cutin yuyangui. Diosmi* chaicunataca canman intindichinga.
8 Huañushcacunapaj chaupimanta Jesucristo causarishca cashcata yuyari. Paica Davidpaj huahua huahuacunamantami carca. Chai alli huillaicunatami ñucaca huillacuni.
9 Chaicunamantami llaquicunata apacuni. Millai runa shinami carcelpipish cani. Shinapish Diospaj shimica mana cadenacunahuan huatashcachu can.
10 Chaimantami Dios agllashcacunamanta tucuita ahuantashpa caticuni. Chashnami paicunatapish Cristo Jesusta catijcuna cashcamanta Diosca quishpichinga, huiñaipaj jatunyachinga.
11 Cai huillashca shimicunaca ciertomi: paihuan huañushpaca paillahuantajmi causashun.
12 Ahuantashpa catishpaca paihuanmi mandashun. Paita mana rijsinichu nijpica paipish ñucanchijtaca mana rijsinichu ningami.
13 Pai nishcata ñucanchij mana rurajpipish paica siempremi pai nishcataca ruranga. Paillatajca mana negari tucunchu.
14 Caicunamanta yuyachishpa cati. Rimashca shimicunallamanta ama pꞌiñanacuchun Diospaj ñaupajpi yachachi. Chaicunaca imapajpish mana valinchu, ashtahuanpish uyajcunatami llaquichin.
15 Diospaj ñaupajpi alli ricuringapaj, imamantapish mana pingarij trabajador cangapaj, Diospaj shimitapish* alli yachachij, alli intindichij cangapaj tucui esfuerzota rurai.
16 Shinapish Diospaj contra yanga rimashca shimicunataca ama uyangui. Chaicunaca Diosmantami ashtahuan ashtahuan caruyachin.
17 Paicunapaj rimashca shimicunaca cuerpota ismuchij ungüi shinami mirarishpa catinga. Chai yanga shimicunata parlajcunapurapica Himeneopish, Filetopishmi can.
18 Cai runacunaca mana llulla yachachishcacunamanta caruyashpami huañushcacunaca ñami causachishca cashca nincuna. Chashna nishpami taucacunapaj feta chiriyachishcacuna.
19 Shinapish Diosca alli cimientotami churarca. Chai cimientoca sinchimi catin. Chai jahuapica shuj sellomi tiyan. Chaipica: “Jehová* Diosca paipaj cajcunataca rijsinmi” ninmi. Shinallataj “Jehová* Diospaj shutita nishpa mañajcunaca tucuicunami mana alli ruraicunata saquina can” ninmi.
20 Shinapish shuj jatun huasipica mana oromanta, cullquimanta rurashca puñucunallachu tiyan. Ashtahuanpish caspimanta, allpamanta rurashca puñucunapishmi tiyan. Maijancunaca allipaj rurashcami can. Cutin shujtajcunaca yangapajllami rurashca can.
21 Maijanpish yangapajlla rurashca puñucunamanta caruyashpaca allipaj rurashca puñu shinami canga. Paica Diospajlla chꞌicanyachishca, paipaj dueñopajpish alli, tucui alli ruraicunata rurangapajpish allichirishcami canga.
22 Chaimanta jovencunapaj munaicunamanta caruyai. Ashtahuanpish Diosta* chuya shunguhuan mañajcunahuan tandanacushpa cashcata ruranata, feta charinata, cꞌuyaita, sumajta causanata mashcai.
23 Shinallataj yanga, mana valij rimanacuicunamanta caruyai. Can yachashca shinaca caicunaca pꞌiñanacuicunapimi churan.
24 Diosta sirvijca mana macanacunachu can. Chapaj randica tucuicunahuanmi alli cana can. Yachachingapajpish allichirishca, llaquichijpipish jarcarijmi cana can.
25 Mana cazusha nijcunatapish manso shunguhuan yachachijmi cana can. Mana llullata alli yachachun paicunaman arrepintirina yuyaita Dios cungapishchari.
26 Mana llullata alli yachashca qꞌuipami paicunaca alli yuyaita japishpa Diablopaj trampamanta caruyangacuna. Diabloca paipaj munaita rurachingapajmi paicunataca causajta japishca.
Notacuna
^ O “coronata”.
^ Griego rimaipica: “Amitomi” ninmi.
^ Griego rimaipica: “mana llulla shimitapish” ninmi.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “Amitota” ninmi.
