Gálatas 2:1-21
2 Chaimantaca 14 huatacuna qꞌuipami Bernabetapish, Titotapish ñucahuan pushashpa cutinllataj Jerusalenman huichiyarcani.
2 Jahua pachamanta muscuipi shina Jerusalenman rina cashcata ricuchijpimi huichiyarcani. Chaiman chayashpami shujtaj llajta gentecunaman alli huillaicunata huillacushcata huauquicunamanca parlarcani. Chaipica Diospajta ruracushca alli cashcata, mana alli cashcata yachasha nishpami respetashca huauquicunallahuan tandanacurcani. Mana chashna rurashca cajpica ñuca ima rurashcaca yangallami canman carca.
3 Paicunaca ñucahuan caj Titotaca griego cajpipish circuncisionta rurachunca mana obligarcacunachu.
4 Chaimantami congregacionpica llulla huauquicuna ricurishpa mana allicunata rimai callarircacuna. Cristo Jesushuan shuj shinalla cashcamanta ña mana huatashca shina causacujta ricungaraicumi congregacionmanca pacalla yaicurcacuna. Chashnami paicunaca Leypi cutinllataj huatashca shina cachun obligashun nincuna.
5 Shinapish ñucanchijca mana llulla alli huillaicunapi sinchiyarishpa cancuna catichunmi paicuna nishcataca shuj ratollapish mana uyarcanchij.
6 Cutin alli nishca runacunaca ñucamanca ima mushuj yuyaicunataca mana nircacunachu. Paicunaca yallitaj respetashca cashca cashpapish ñucapajca ima mana canchu. Diosca mana jahua ñahuillata ricunchu.
7 Ashtahuanpish circuncisionta rurachishcacunaman huillachun Pedroman mingashca shinallatajmi, ñucamanpish circuncisionta mana rurachishcacunaman alli huillaicunata huillachun mingashca. Chaitami chai runacunaca ricurcacuna.
8 Diosmi circuncisionta rurachishcacunapurapi apóstol cachun Pedromanca poderta curca. Chashnallatajmi ñucamanpish shujtaj llajta gentecunapurapi apóstol cachun poderta curca.
9 Paicunaca Dios yallitaj llaquij cashcata ñucaman ricuchishcatami cuentata curcacuna. Chaimi Santiago, Cefas,* Juanpish ñucaman, Bernabeman alli maquita cushpaca: “Shujtaj llajta gentecunaman can huillanaman rinaca allimi. Shinapish ñucanchijca circuncisionta rurachishcacunamanmi huillagrinchij” nircacuna. Paicunaca congregacionpica pilarcuna shinami carcacuna.
10 Paicunaca pobrecunata yuyarichunllami mañarcacuna. Chaita rurangapajmi ñucapish ashtahuan esforzarishcani.
11 Shinapish Antioquía llajtaman Cefas* shamujpimi pai pandarishcamanta ñahui ñahui sinchita cunarcani.
12 Santiago cachashca runacuna manaraj chayajpica Cefasca shujtaj llajta gentecunahuanmi tandalla micuj carca. Shinapish chai runacuna chayajpica circuncisionta rurachishca runacunata manchashcamantami chaita ruranata saquishpa paicunamanta caruyarca.
13 Caishuj judiocunapishmi pai laya rurashpa mishqui shimi jayaj shungu tucurcacuna. Bernabecamami chashna mishqui shimi jayaj shungu tucurca.
14 Paicunaca mana llulla alli huillaicunapi nishca shinaca mana causacurcacunachu. Chaita ricushpami tucuicunapaj ñaupajpi Cefastaca:* “Canca judío cashpapish judiocuna shinaca mana causanguichu. Ashtahuanpish shujtaj llajta gentecuna shinami causangui. Shinaca ¿ima nishpataj shujtaj llajta gentecunataca judiocunapaj costumbrecunata catishpa causachun obliganguiyari?” nircani.
15 Ñucanchijca huacharishcamantami judiocuna canchij. Shujtaj llajtamanta juchata ruraj gentecuna shinaca mana canchijchu.
16 Diosca maijan runatapish leypi nishcata rurashcallamantaca cashcata ruraj shinataca mana ricunchu. Ashtahuanpish Jesucristopi feta charishcamantami cashcata rurajta shina ricun. Chaitaca yachanchijmi. Leypi nishcata pajtachishcallamantaca cashcata ruraj shinaca mana ricurinchijchu. Ashtahuanpish Cristopi feta charishcamantami cashcata ruraj shina ricurinchij. Chaimantami ñucanchijca Cristo Jesuspi feta churashcanchij. Shinaca leypi nishcata rurashcallamantaca Diosca pitapish cashcata rurajta shinaca mana ricungachu.
17 Cristomantami ñucanchijca cashcata rurajcuna nishca cangapaj esforzaricunchij. Chashnapish juchayujcunami canchij. Shinaca ¿Cristoca juchata sirvijchu canga? ¡Mana chashnachu!
18 Ñaupaman urmachishcacunata cunan cutin shayachishpaca leyta mana pajtachishcatami ricuchicuni.
19 Ñucaca leyta chasquishcamantami chai leymanta cacharichishca cani. Chashnami Diospajlla causacuni.
20 Cristohuanmi caspipi clavashca cani. Ña mana ñucapajlla causacunichu, ashtahuanpish Cristomi ñucahuan shuj shinalla causan. Cunanca Diospaj Churipi feta churashca shinami causani. Paica ñucata cꞌuyashpami paipaj causaita ñucamanta curca.
21 Dios yallitaj llaquij cashcata ricuchishcataca mana yangapi churanichu. Leypi nishcata rurashcallamanta cashcata ruraj cana cajpica Cristo huañushcaca imapajpish mana valinmanchu.
Notacuna
^ “Cefas” shutica Pedropaj caishuj shutimi.
^ “Cefas” shutica Pedropaj caishuj shutimi.
^ “Cefas” shutica Pedropaj caishuj shutimi.
