Gálatas 4:1-31
4 Caitapishmi nisha nini. Herenciata japigrij huahuaca tucui ima tiyashcacuna paipaj cajpipish, huahuaraj cashpaca huasipi sirvij runataca imapi mana yallichu.
2 Ashtahuanpish paipaj yaya agllashca punlla chayangacamami paita cuidaj runacunapish, paipaj huasita cuidaj mayordomocunapish tiyan.
3 Chashnallatajmi ñucanchijpish huahuaraj cashpaca shuj sirvij runa shina cai pacha gentecunapaj yuyaicunata, ruraicunatapish catij carcanchij.
4 Shinapish agllashca punlla pajtajpimi Diosca paipaj Churita cacharca. Paica shuj huarmimantami huacharirca, shinallataj leypi nishcata cazushpami causarca.
5 Diosca leypi huatashca shina cajcunata randishpa cacharichingapajmi paipaj Churita cacharca. Chashnami Diosca paipaj huahuacunata shina ñucanchijtaca chasquinga.
6 Cunanca Diospaj huahuacunami canguichij. Chaimantami Diosca paipaj espíritu santota ñucanchij shungupi churashca. Chai espiritullatatajmi paipaj Churipish charin. Chai espiritumantami ñucanchijca: “¡Abba,* Yayitu!” ninchij.
7 Shinaca ña mana sirvijchu cangui, ashtahuanpish Diospaj huahuami cangui. Diospaj huahua cajpica canmanpishmi paica shuj herenciata cunga.
8 Cancunaca Diosta manaraj rijsishpaca yanga dioscunata sirvijcunami carcanguichij.
9 Shinapish cunanca Diostami rijsinguichij. Ashtahuancarin Diosmi cancunataca rijsin. Shinaca ¿yanga, imapajpish mana valij cai pacha ruraicunataca ima nishpataj cutin sirvisha ninguichijyari?
10 Cancunaca alli punllacuna, alli quillacuna, alli tiempocuna, alli huatacunami tiyan nishpami chaicunata yuyaringuichij.
11 Cancunata ayudangapaj achcata ñuca esforzarishca yangalla cana cashcatami manchani.
12 Huauquicuna, cancunataca ñuca shina cachunmi rogani. Ñucapish cancuna shinallatajmi carcani. Cancunaca ñucataca ima mana allitaca mana rurarcanguichijchu.
13 Shinapish ungüihuan cashpa cancunahuan saquirishcataca yachanguichijmi. Chaipimi cancunamanca punta cutin alli huillaicunata huillai tucurcani.
14 Cancunapajca ñuca ungüica shuj llashaj carga shinami carca. Chashnapish ñucataca mana pꞌiñarcanguichijchu, mana millanayachircanguichijchu. Ashtahuanpish Diospaj angelta shina, Cristo Jesusta shinami chasquircanguichij.
15 ¿Cancunapaj cushicuihuanca imataj tucurcari? Ñucata ayudangapaj cancunapaj ñahuicunata llujshichishpa cunalla cajpica cunguichijmanmi carca. Chaitaca seguromi cani.
16 ¿Mana llullashpa parlashcamantachu cunanca cancunapaj contra tucushcani?
17 Chai runacunaca paicunapaj lado tucuchunmi tucuita rurancuna. Shinapish ima allita cancunapajca mana munancunachu. Ashtahuanpish paicunata catichunmi ñucamanta caruyachisha nincuna.
18 Maijanpish alli munaihuan paipaj lado tucuchun cancunata mashcanaca allimi. Caitaca mana ñuca cancunahuan cajllapichu rurana can, ashtahuanpish tucui punllacunami rurana can.
19 Ñuca huahuacunalla, shuj mama huahuata huachacuj shinami cutinllataj cancunamantaca nanaihuan cani. Cancuna Cristo shinallataj tucungacamami cai nanaitaca charisha.
20 Cancunahuan imata mana ruraipaj cashpami cꞌuyaihuan parlangapaj cunanllataj cancunahuan canata munani.
21 Leyta cazusha nijcuna, ¿Leypi ima nishcataca manachu yachanguichij? Ñucaman huillapaichij.
22 Quillcachishcapica Abrahanca ishqui churicunatami charirca ninmi: shujca sirvij huarmipaj churimi carca. Cutin caishujca pita mana sirvij huarmipaj churimi carca.
23 Sirvij huarmipaj churica tucui huahuacuna shinallatajmi huacharirca. Cutin pita mana sirvij huarmipaj churica Dios cusha nishcamantami huacharirca.
24 Chaicunaca qꞌuipaman ima tucuna cashcatami ricuchirca. Cai huarmicunaca ishqui ari ninacushcatami ricuchin. Sinaí urcupi ari ninacushcaca Agar huarmi shinami can. Chai ari ninacushcapi cajcunaca sirvijcunami can.
25 Agar huarmica Arabiapi saquirij Sinaí urcutami ricuchin. Paica cunan punlla Jerusalentami ricuchin. Jerusalenca paipaj huahuacunandijmi sirvijcuna shina can.
26 Cutin jahua pacha Jerusalenca ñucanchij mamami. Paica pita mana sirvinchu.
27 Quillcachishcapica: “Huahuata mana chari tucuj huarmi cushicui. Huachana nanaita mana nunca charishca cashpapish cushicushpa capari. Shitashca huarmimi cazarashca huarmitapish yalli achca huahuacunata charinga” ninmi.
28 Shinaca huauquicuna, cancunaca Isaac shinallatajmi Dios cusha nishcamanta huacharishca huahuacuna canguichij.
29 Chai punllacunapica tucui huahuacuna shinallataj huacharishca churimi espiritumanta huacharishca churitaca catirashpa llaquichirca. Cunanpish chashnallatajmi tucun.
30 Chashnapish ¿Dios quillcachishcapica imatataj ninyari? Chaipica: “Sirvij huarmitaca paipaj churindijta caimanta llujchishpa cachai. Sirvij huarmipaj churica pita mana sirvij huarmipaj churihuanca herenciata mana japingachu” ninmi.
31 Chaimanta huauquicuna, ñucanchijca sirvij huarmipaj huahuacunaca mana canchijchu. Ashtahuanpish pita mana sirvij huarmipaj huahuacunami canchij.
Notacuna
^ “Abba” shimica hebreo o arameo rimaipimi can. Cai shimica ‘¡yayitulla!’ nisha ninmi.
