Jonás 3:1-10
3 Jehová Diosca cutinllatajmi Jonasmanca:
2 “Nínive jatun llajtaman ri, ñuca imalla nishcata huillagri” nirca.
3 Chaimi Jonasca Jehová Dios nishca shimicunata cazushpa Nínive llajtaman rirca. Nínive llajtaca yallitaj jatunmi carca.* Chai llajtaca quimsa punllacunata purina valimi carca.
4 Jonasca chai llajtaman chayashpaca shuj punllatami purirca. Paica: “40 punllacunallapimi Nínive llajtaca tucuchishca canga” nishpami huillacurca.
5 Nínive llajtapi causaj gentecunaca Diospimi feta churarcacuna. Paicunaca ayunanatami yuyarircacuna. Shinallataj mayorcunamanta callarishpa huambracunacamami racu sacota* churarircacuna.
6 Nínive llajtata mandajca Jonás huillashcata yachaj chayashpaca paipaj jatun tiyarinamanta jatarishpami, reycuna churarina paipaj ropata llujshichishpa, racu sacota churarishpa ushpa jahuapi tiyarirca.
7 Shinallataj Nínive llajtapi causaj tucui gentecunamanmi caita huillachun mandarca:
“Jatun mandajpish, autoridadcunapish mandashca shinaca ni shuj gentellapish, ni shuj animalllapish, ovejacunapish, vacacunapish ama imata micuchuncuna, yacutapish ama ubyachuncuna.
8 Gentecunapish, animalcunapish racu sacohuan taparichun. Diosta tucui shunguhuan mañashpa rogarichun. Mana alli ruraicunata, shujtajcunata llaquichinata saquichun.
9 Chashna rurajpica Dios verdaderoca pai yallitaj pꞌiñarishcata saquishpa, pai imalla rurasha nicushcata cambiangapishchari. Shina cambiajpica mana huañushunchu” nircami.
10 Dios verdaderoca paicuna imallata rurashcata ricushpa, mana alli ruraicunata saquishcata ricushpaca paicunata llaquichisha nishca cashpapish mana llaquichircachu.
Notacuna
^ Hebreo rimaipica: “Diospaj ñaupajpica jatun llajtami carca” ninmi.
^ O “pꞌaza sacota”, “cañamazu sacota”.
