Josué 18:1-28
18 Israelitacunaca Canaán allpatami japishcacuna carca. Chaimantami tucui israelitacunaca Siló llajtapi tandanacurcacuna. Chai llajtapimi tandanacuna carpa huasitapish* shayachircacuna.
2 Shinapish israelitacunapurapica canchis familiacunamanmi allpa herenciata manaraj chaupishpa cushca carca.
3 Chaimi Josueca israelitacunamanca cashna nirca: “¿Cancunapaj ñaupa yayacunapaj Jehová Dios cancunaman cushca allpata japinaman ringapajca mashna tiempo pasachuntaj saquigringuichij?
4 Cada familiamanta quimsa cꞌaricunata agllaichij. Chai cꞌaricunataca allpata ricunaman rishpa chai allpata dibujachunmi cachasha. Chashnami cada familia paicunapaj herenciata japi tucungacuna. Qꞌuipaca paicunaca ñucata ricunaman tigramuchun.
5 Allpataca canchis partecunapimi chaupina canguichij. Judaca ura ladopi caj paipaj allpallapitajmi saquiringa. Josepaj huahua huahuacunaca janaj ladoman caj paicunapaj allpacunallapitajmi saquiringacuna.
6 Cutin cancunaca allpataca canchis partecunapi chaupishpa dibujaichij. Qꞌuipaca cancuna dibujashcata ñucapajman apamuichij. Ñucami chai allpacunataca ñucanchij Jehová Diospaj ñaupajpi cancunapaj sorteasha.
7 Pero levitacunaca cancunapurapica ima allpata mana japingacunachu. Paicunapaj herenciaca Jehová Diospaj carpa huasipi sirvinami can. Shinallataj Gad, Rubén, Manasespaj chaupi familiaca Jehová Diosta sirvij Moisés cushca shinallatajmi Jordán jatun yacu inti llujshin ladopi herenciataca ña chasquircacuna” nircami.
8 Allpata ricunaman rij runacunaca allpata dibujanaman ringapajmi allichiricurcacuna. Chaimi Josueca: “Allpata ricunaman richij, chai allpapaj dibujocunata ruraichij. Qꞌuipaca ñucapajman tigramunguichij. Chaimi ñucaca Siló llajtapi Jehová Diospaj ñaupajpi allpata cancunapaj sorteasha” nircami.
9 Chashna nijpimi chai cꞌaricunaca allpata purishpa ricungapaj rircacuna. Chaipi mashna llajtacuna tiyashcata ricushpami canchis partecunapi chaupishpa dibujarcacuna. Qꞌuipaca paicuna imalla ricushcatami tucuita shuj libropi quillcarcacuna. Chaimantaca chai runacunaca Josuepajmanmi tigrarcacuna. Josueca Siló llajtapi caj carpa huasicunapimi carca.
10 Josueca Siló llajtapi cashpa Jehová Diospaj ñaupajpimi paicunaman cungapaj allpata sortearca. Chaipimi Josueca cada familiapaj shuj parte allpata chaupishpa israelitacunaman curca.
11 Allpata sorteajpica Benjaminpaj familiamanta cada familiapajmi urmarca. Benjaminpaj allpaca Judapaj huahua huahuacunapaj allpa, Josepaj huahua huahuacunapaj allpa chaupipimi urmarca.
12 Shinallataj paicunapaj allpamanta janaj ladoman caj linderoca Jordán jatun yacumantami callarirca. Qꞌuipaca chai linderoca Jericó llajta janaj ladoman caj quinritami huichiyarca. Chaimantaca inti huashicun ladoman urcuta huichiyashpaca Bet-Aven chaquishca pambacamami chayarca.
13 Chai lindeca Luz llajta ura ladoman caj quinritami catirca. Luz llajtataca Betel nishpapishmi rijsincuna. Chai lindeca Bet-Horón Baja ura ladoman caj urcuta uriyashpami Atarot-Addar llajtacama chayarca.
14 Shinallataj chai lindeca Bet-Horón chꞌimba ladopi caj urcumanta callarishpaca ura ladotami pasarca. Chashnami Quiryat-Baalpi chai lindeca tucurirca. Quiryat-Baaltaca Quiryat-Jearim nishpapishmi rijsincuna. Cai llajtaca Judapaj churicuna causana llajtami can. Caicunami inti huashicun ladoman saquirij herencia linde carca.
15 Ura ladoman caj lindeca Quiryat-Jearim canlla ladomanta callarishpaca inti huashicun ladopi caj lindecamami chayarca. Chaimantaca Neftóah pugyu yacucunacamami chayarca.
16 Shinallataj chai lindeca Hinón pugru pamba chꞌimba ladoman caj urcu chaquitami pasarca. Chai urcuca Refaím pugru pamba janaj ladopimi carca. Chaimantaca chai lindeca Hinón pugru pambatami catirca. Chai lindeca ura ladopi caj jebuseocunapaj quinricama uriyashpaca En-Roguel nishcacamami chayarca.
17 Chaimantaca chai lindeca janaj ladotami catirca. Chashnami En-Semescama chayarca. Shinallataj chai lindeca Guelilotcamami catirca. Guelilotca Adumim huichi chꞌimba ladomanmi carca. Chai huashaca chai lindeca Rubenpaj churi Bohanpaj rumicamami uriyarca.
18 Chashnami chai lindeca Arabá pugru pamba chꞌimba ladopi saquirij janaj lado quinrita pasashpa Arabá pugru pambata uriyarca.
19 Shinallataj chai lindeca Bet-Hoglá janaj ladopi saquirij quinritami catirca. Chashnami mar Salado* janaj lado puntapi tucurirca. Mar Salado janaj ladoca Jordán jatun yacu ura ladopimi carca. Chaimi ura ladoman caj lindeca carca.
20 Inti llujshin ladomanca Jordán jatun yacumi linde carca. Tucui caicunami Benjaminpaj huahua huahuacunamanta cada familia japishca herenciapish, lindecunapish carca.
21 Benjaminpaj familiamanta cada familiapaj llajtacunaca caicunami carca: Jericó, Bet-Hoglá, Émec-Queziz,
22 Bet-Arabá, Zemaraim, Betel,
23 Avim, Pará, Ofrá,
24 Kefar-Amoní, Ofní, Guebami carca. Tucuica 12 llajtacuna, chai uchilla pueblocunandijmi carca.
25 Gabaón, Ramá, Beerot,
26 Mizpé, Kefirá, Mozá,
27 Réquem, Irpeel, Taralá,
28 Zelá, Ha-Élef, Jebusí (cai llajtataca Jerusalén nishpapishmi rijsincuna), Guibeá, Quiryat llajtacunami carca. Tucuica 14 llajtacuna, chai uchilla pueblocunandijmi carca.
Cai llajtacunami Benjaminpaj huahua huahuacunamanta cada familiapaj herencia carca.
Notacuna
^ O “carpa huasitapish”. “Carpa huasi” shimita huasha diccionariopi ricui.
^ Caipica mar Muertomantami parlacun.
