Josué 21:1-45
21 Levitacunamanta yayacunapaj familiata pushajcunaca sacerdote Eleazarpajman, Nunpaj churi Josuepajman, Israelpaj familiacunamanta yayacunapaj familiata pushajcunapajmanmi cꞌuchuyarcacuna.
2 Paicunaca Canaán allpacunapi saquirij Siló llajtapi cashpami: “Jehová Diosca Moisesmanmi ñucanchij maipi causana llajtacunata, ñucanchij animalcunapaj michina allpacunatapish cuchun mandarca” nircacuna.
3 Chaimi israelitacunaca Jehová Dios mandashca shina paicunapaj herenciamanta levitacunamanca llajtacunata michina allpacunandij curcacuna.
4 Sorteajpica puntaca cohatitacunapaj familiacunapajmi urmarca. Paicunapuramanta sacerdote Aaronpaj huahua huahuacunapaj levitacunamanca 13 llajtacunatami curcacuna. Chai llajtacunataca Judapaj familiamanta, Simeonpaj familiamanta, Benjaminpaj familiamantami sorteashpa curcacuna.
5 Cutin caishuj cohatitacunapaj sorteajpica chunga llajtacunami urmarca. Paicunamanca Efrainpaj familiamanta, Danpaj familiamanta, Manasespaj familiamanta llajtacunatami curcacuna.
6 Guersonitacunapaj sorteajpica 13 llajtacunami urmarca. Chai llajtacunataca Isacarpaj familiamanta, Aserpaj familiamanta, Neftalipaj familiamanta, Basanpi caj Manasespaj chaupi familiamantapishmi japishpa curcacuna.
7 Meraritacunamanta cada familiapaj sorteajpica 12 llajtacunami urmarca. Chai llajtacunataca Rubenpaj familiamanta, Gadpaj familiamanta, Zabulonpaj familiamantami japishpa curcacuna.
8 Chashnami israelitacunaca Jehová Dios Moisesman mandashca shina levitacunamanca chai llajtacunata michina allpacunandij curcacuna.
9 Judapaj familiamanta, Simeonpaj familiamantaca cai llajtacunatami shutipi nombrashpa curcacuna.
10 Chai llajtacunata sorteajpica puntapica Aaronpaj huahua huahuacunapajmi urmarca. Paicunaca levitacunamanta cohatitacunapaj familiamantami carcacuna.
11 Paicunamanca Quiryat-Arbá llajtatami curcacuna. (Arbá runaca Anacpaj yayami carca). Chai llajtapaj muyundijpi caj michina allpacunandijmi curcacuna. Quiryat-Arbá llajtataca Hebrón nishpapishmi rijsincuna. Hebrón llajtaca Judá urcucunapimi carca.
12 Shinapish chai llajtapaj campocunata, uchilla pueblocunataca Jefunepaj churi Calebpaj cachunmi curcacuna.
13 Sacerdote Aaronpaj churicunamanca Hebrón llajtata michina allpacunandijmi curcacuna. Chai llajtaca huañuchij runacunapaj miticuna llajtami carca. Shinallataj Libná llajtata michina allpacunandij,
14 Jatir llajtata michina allpacunandij, Estemoa llajtata michina allpacunandij,
15 Holón llajtata michina allpacunandij, Debir llajtata michina allpacunandij,
16 Ain llajtata michina allpacunandij, Jutá llajtata michina allpacunandij, Bet-Semes llajtata michina allpacunandijmi curcacuna. Chai iscun llajtacunataca Judapaj familiamanta, Simeonpaj familiamantami curcacuna.
17 Cutin Benjaminpaj familiamantaca Gabaón llajtata michina allpacunandij, Gueba llajtata michina allpacunandij,
18 Anatot llajtata michina allpacunandij, Almón llajtata michina allpacunandijmi curcacuna. Tucuica chuscu llajtacunami carca.
19 Aaronpaj huahua huahuacunamanta sacerdotecunamanca tucuica 13 llajtacunata michina allpacunandijmi curcacuna.
20 Levitacunapuramanta cohatitacunapaj caishuj familiacunamanca Efrainpaj familiamanta llajtacunatami sorteashpa curcacuna.
21 Huañuchij runacunapaj miticuna llajtatami curcacuna. Efraín urcucunapi tiyaj Siquem llajtata michina allpacunandij, Guézer llajtata michina allpacunandij,
22 Quibzaim llajtata michina allpacunandij, Bet-Horón llajtatapish michina allpacunandijmi curcacuna. Tucuica chuscu llajtacunami carca.
23 Danpaj familiamantaca Eltequé llajtata michina allpacunandij, Guibetón llajtata michina allpacunandij,
24 Ayalón llajtata michina allpacunandij, Gat-Rimón llajtatapish michina allpacunandijmi curcacuna. Tucuica chuscu llajtacunami carca.
25 Manasespaj chaupi familiamantaca Taanac llajtata michina allpacunandij, Gat-Rimón llajtata michina allpacunandijmi curcacuna. Tucuica ishqui llajtacunami carca.
26 Cohatitacunapaj caishuj familiacuna japishca llajtacunaca tucuica chunga llajtacuna michina allpacunandijmi carca.
27 Levitacunapaj familiacunamanta guersonitacunaca Manasespaj chaupi familiamantami Basanpi tiyaj Golán llajtata michina allpacunandij japircacuna. Chai llajtaca huañuchij runacunapaj miticuna llajtami carca. Beesterá llajtatapish michina allpacunandijmi japircacuna. Tucuica ishqui llajtacunami carca.
28 Isacarpaj familiamantaca Quisión llajtata michina allpacunandij, Daberat llajtata michina allpacunandij,
29 Jarmut llajtata michina allpacunandij, En-Ganim llajtata michina allpacunandijmi curcacuna. Tucuica chuscu llajtacunami carca.
30 Aserpaj familiamantaca Misal llajtata michina allpacunandij, Abdón llajtata michina allpacunandij,
31 Helcat llajtata michina allpacunandij, Rehob llajtata michina allpacunandijmi curcacuna. Tucuica chuscu llajtacunami carca.
32 Neftalipaj familiamantaca Galileapi tiyaj Quedes llajtata michina allpacunandijmi japircacuna. Chai llajtaca huañuchij runacunapaj miticuna llajtami carca. Shinallataj Hamot-Dor llajtata michina allpacunandij, Cartán llajtata michina allpacunandijmi japircacuna. Tucuica quimsa llajtacunami carca.
33 Guersonitacunamanta cada familia chasquishca llajtacunaca tucuica 13 llajtacuna michina allpacunandijmi carca.
34 Levitacunapuramanta saquirij meraritacunapaj familiacunamanca Zabulonpaj familiamanta Jocneam llajtata michina allpacunandij, Cartá llajtata michina allpacunandij,
35 Dimná llajtata michina allpacunandij, Nahalal llajtata michina allpacunandijmi japircacuna. Tucuica chuscu llajtacunami carca.
36 Rubenpaj familiamantaca Bézer llajtata michina allpacunandij, Jáhaz llajtata michina allpacunandij,
37 Quedemot llajtata michina allpacunandij, Mefaat llajtata michina allpacunandijmi japircacuna. Tucuica chuscu llajtacunami carca.
38 Gadpaj familiamantaca Galaadpi caj Ramot llajtata michina allpacunandijmi japircacuna. Chai llajtaca huañuchij runacunapaj miticuna llajtami carca. Shinallataj Mahanaim llajtata michina allpacunandij,
39 Hesbón llajtata michina allpacunandij, Jazer llajtata michina allpacunandijmi japircacuna. Tucuica chuscu llajtacunami carca.
40 Meraritacunapaj cada familiaman cushca llajtacunaca tucuica 12 llajtacunami carca. Cai meraritacunaca levitacunapuramanta saquirij familiacunami carca.
41 Israelitacunapaj allpacunapi levitacuna chasquishca llajtacunaca tucuica 48 llajtacuna michina allpacunandijmi carca.
42 Chai llajtacunapaj cada llajta muyundijtaca michina allpacunami tiyarca. Tucui chai llajtacunami michina allpacunandij carca.
43 Chashnami Jehová Diosca paicunapaj ñaupa yayacunaman allpacunata cusha nishpa jurashca shinallataj israelitacunamanca chai allpacunata curca. Chaimi paicunaca chai allpata japishpa chaipi causai callarircacuna.
44 Shinallataj Jehová Diosca paicunapaj ñaupa yayacunaman jurashca shinami tucui ladocunapi tranquilo causaita curca. Paicunapaj contracunapish paicunataca mana llaquichi tucurcacunachu. Jehová Diosca paicunapaj contracunataca paicunapaj maquipimi entregarca.
45 Jehová Diosca Israelpaj familiaman tucui imalla allicunata cusha nishcacunataca shuj palabrallatapish mana pajtachishpaca mana saquircachu, tucuitami pajtachirca.
