Josué 4:1-24
-
Rumicunata shuj señal cachun churashcamanta (1-24)
4 Jordán jatun yacuta tucui gentecuna pasancami Jehová Diosca Josuemanca cashna nirca:
2 “Israelitacunamanta 12 cꞌaricunata agllaichij. Cada familiamantaca shujta agllaichij.
3 Paicunamanca: ‘Jordán jatun yacu chaquirishca chaupipi sacerdotecuna shayacushcamanta 12 rumicunata tandaichij. Chai rumicunataca cunan tuta cancuna maipi saquirigrishcaman apashpa chaipi churaichij’ nishpa mandaichij” nircami.
4 Chaimi Josueca israelitacunamanta nombrashca 12 cꞌaricunata cayarca. Cada familiamanta shujtami cayarca.
5 Josueca paicunamanca cashnami nirca: “Jordán jatun yacu chaupipi caj ñucanchij Jehová Diospaj Arca ñaupajman richij. Chaimanta cada uno shuj rumita cancunapaj rigra jahuapi apaichij. Israelitacunapaj cada familiamantaca shuj rumita apaichij.
6 Cai rumicunaca cancunapurapica shuj señalmi canga. Qꞌuipa punllacunapi cancunapaj huahuacuna ‘¿Imamantataj cai rumicunataca caipi charinguichij?’ nishpa tapujpica,
7 cancunaca ‘Jehová Dioshuan ari ninacushca arcamantami Jordán yacucunaca chaquirirca. Sacerdotecuna Arcata apacujpimi Jordán yacucunaca chaquirirca. Cai rumicunaca israelitacunahuan ima tucushcatami huiñai huiñaita yuyachinga’* nishpami cutichina canguichij” nircami.
8 Israelitacunaca Josué mandashca shinallatajmi rurarcacuna. Jehová Dios Josueman mandashca shinami Jordán jatun yacu chaupimanta 12 rumicunata japircacuna. Paicunaca israelitacunapaj cada familiamantami shuj rumita japircacuna. Israelitacunaca chai rumicunataca tuta maipi saquirigrishcaman apashpami chaipi churarcacuna.
9 Shinallataj Josueca Jordán jatun yacu chaupipica 12 rumicunatami churarca. Chai lugarpimi sacerdotecunaca ari ninacushca arcata apashca shayacurca. Chai rumicunaca cunan punllacamami chaipi can.
10 Arcata apaj sacerdotecunaca Jordán jatun yacu chaupipimi shayarishpa saquirircacuna. Josueman Jehová Dios imalla rurachun mandashcata israelitacuna pajtachingacamami sacerdotecunaca chashna shayarishpa saquirircacuna. Moisés Josueman mandashca shinami rurarcacuna. Chaicamaca tucui gentecunaca ratomi caishuj ladoman pasarcacuna.
11 Tucui gentecuna caishuj ladoman pasashca huashami sacerdotecunaca Jehová Diospaj Arcahuan gentecuna ricucujpi pasarcacuna.
12 Rubenitacunapish, gaditacunapish, Manasespaj chaupi familiapish Moisés mandashca shinami caishuj israelitacunapaj ñaupajta macanacungapaj allichirishca pasarcacuna.
13 Macanacuiman ringapaj allichirishca 40.000 soldadocunami Jehová Diospaj ñaupajta pasashpa Jericó chaquishca pambaman chayarcacuna.
14 Chai punllami Jehová Diosca Josuetaca tucui israelitacunapaj ñaupajpi jatunyachirca. Chaimi israelitacunaca Moisesta ima shina respetashca shinallataj Josuetapish paipaj tucui causaipi respetarcacuna.*
15 Jehová Diosca Josuemanca cashnami nirca:
16 “Leyta huaquichina arcata apaj sacerdotecunataca Jordanmanta llujshichun mandaichij” nircami.
17 Chaimi Josueca sacerdotecunataca: “Jordanmanta llujshichij” nishpa mandarca.
18 Jehová Dioshuan ari ninacushca arcata apaj sacerdotecunaca Jordán jatun yacu chaupimantami llujshircacuna. Chai sacerdotecunapaj chaquicuna chaquishca pambata sarujpimi Jordán jatun yacuca jundashpa cutinllataj uriyai callarirca. Jordán yacucunaca ñaupa shinallatajmi cutin jundarishpa caita chaita regarirca.
19 Punta quillapaj chunga punllapimi gentecunaca Jordanmanta llujshishpa Guilgal llajtapi carpa huasicunata shayachishpa chaipi saquirircacuna. Guilgal llajtaca Jericó inti llujshin lado linderopimi carca.
20 Josueca Jordán jatun yacumanta apashca 12 rumicunataca Guilgal llajtapimi churarca.
21 Josueca israelitacunamanca: “Shamuj punllacunapi cancunapaj huahuacuna ‘¿Cai rumicunaca imatataj ricuchin?’ nishpa tapujpica,
22 cancunapaj huahuacunamanca cashnami intindichina canguichij: ‘Israelitacunaca Jordán jatun yacu chaquishca pambatami pasarcacuna.
23 Ima shinami ñucanchij Jehová Dios Puca mama cuchata chaquichijpi pasai tucurcanchij, chashnallatajmi ñucanchij Jehová Diosca Jordán yacucunata ñucanchij ñaupajpi chaquichijpi pasai tucurcanchij.
24 Tucui cai allpapi causajcuna Jehová Diospaj maqui poderta charij cashcata yachachunmi chashna rurarca. Cancunapish ñucanchij Jehová Diosta huiñai huiñaita adorachunmi* chaita rurarca’ ninguichij” nircami.
Notacuna
^ O “yuyaringapaj monumento canga”.
^ Hebreo rimaipica: “mancharcacuna” ninmi.
^ Hebreo rimaipica: “manchachunmi” ninmi.
