Levítico 20:1-27
-
Mólek diosta mana adoranamanta, huañushcacunahuan mana parlanamanta, adivinocunata mana tapunamanta (1-6)
-
Jucha illaj canamanta, yaya mamata respetanamanta (7-9)
-
Huainayana juchapi urmajcunata huañuchinamanta (10-21)
-
Allpapi saquiringapajca jucha illajmi cana canguichij (22-26)
-
Huañushcacunahuan parlajcunapish, adivinocunapish huañunami can (27)
20 Jehová Diosca Moisestaca cashnapishmi nirca:
2 “Israelitacunataca cashna ningui: ‘Shuj israelita runapish, Israelpi causaj shujtaj llajtamanta runapish paipaj huahuacunamanta shuj huahuata Mólek* diosman cushpaca huañunatajmi can. Gentecunaca chai runataca huañungacamami rumicunahuan shitana can.
3 Ñucami chai runapaj contra jatarishpa israelitacunapuramanta huañuchisha. Chai runaca paipaj huahuacunamanta shuj huahuatami Mólek diosman cushca. Paica ñuca huasitami mapayachishca, ñuca jucha illaj shutitapish yangapimi churashca.
4 Chai runa paipaj huahuacunamanta shuj huahuata Mólek diosman cujta gentecuna ricushpapish imata mana rurajpi, mana huañuchijpica
5 ñucallatajmi chai runapaj contra, paipaj familiapaj contrapish jatarisha. Chai runataca israelitacunapuramantami huañuchisha. Pai shinallataj Mólek diosta adorashpa huainayajcunatapishmi huañuchisha.
6 Maijanpish ñucata saquishpa rurashcalla dioscunata adorashpa* huañushcacunahuan parlajcunapajman rijpi, adivinocunapajman rijpica chai runapaj contra jatarishpami israelitacunapuramanta huañuchisha.
7 Ñucaca cancunapaj Jehová Diosmi cani. Chaimantami cancunapish chuya,* jucha illaj cana canguichij.
8 Ñuca leycunatami cazuna canguichij, chaicunataca pajtachinami canguichij. Ñucaca Jehová Diosmi cani, ñucami cancunataca chuyayachicuni.*
9 Maijan runapish paipaj yayata o paipaj mamata maldicishpaca huañunatajmi can. Paipaj yayata o paipaj mamata maldicishcamantami paipaj culpallamantataj huañunga.*
10 Maijan runapish shujtaj cꞌaripaj huarmihuan huainayajpica castigashcami canga. Paipaj projimopaj huarmihuan huainayashpaca huañunatajmi can. Huainayaj cꞌaripish, huainayaj huarmipish huañunami can.
11 Maijan runapish paipaj yayapaj huarmihuan siririshpaca paipaj yayatami pingaipi churashca. Huarmipish, cꞌaripish huañunatajmi can. Paicunapaj culpallamantatajmi huañungacuna.
12 Maijan runapish paipaj nuerahuan siririshpaca ishquindijmi huañunataj can. Paicunaca yallitaj mapa ruraitami rurashcacuna. Paicunapaj culpallamantatajmi huañungacuna.
13 Maijan runapish shuj huarmihuan siririj shinallataj shuj cꞌarihuan siririshpaca ishquindijmi millanana ruraita rurashcacuna. Paicunaca huañunatajmi can. Paicunapaj culpallamantatajmi huañungacuna.
14 Maijan runapish shuj huarmihuan cazarashpa chai huarmipaj mamahuanpish chayarishpaca pinganayai ruraitami rurashca. Cancunapurapi pinganayai ruraicuna ama tiyachunmi chai runatapish, chai huarmicunatapish ninapi rupachina canguichij.
15 Maijan runapish shuj animalhuan chayarishpaca huañunatajmi can. Chai animaltapish cancunaca huañuchinami canguichij.
16 Maijan huarmipish shuj animalhuan chayaringapaj cꞌuchuyajpica huarmitapish, animaltapish huañuchinami canguichij. Paicunaca huañunatajmi can. Paicunapaj culpallamantatajmi huañungacuna.
17 Maijan runapish paipaj panihuan chayarijpica chai ruraica pingaimi can. Paipaj yayallapaj ushushi cajpipish o paipaj mamallapaj ushushi cajpipish panita lluchullata ricujpi, panipish paita lluchullata ricujpica chai ruraica pingaimi can. Paicunaca tucui israelitacuna ricucujpimi huañuchishca cangacuna. Chai runaca paipaj panitami pingaipi churashca. Pai pandarishcamantaca castigashcami canga.
18 Maijan runapish quilla ungüihuan caj huarmihuan siririshpa paihuan chayarishpaca ishquindijmi huarmipaj yahuarmantaca respetota mana ricuchishcacuna. Ishquindijmi israelitacunapuramantaca huañuchishca cangacuna.
19 Cambaj mamapaj ñañahuanpish, cambaj yayapaj panihuanpish ama chayaringuichu. Chaita rurashpaca propio familiatami pingaipi churangui. Paicuna pandarishcamantaca ishquindijmi castigashca cangacuna.
20 Shuj runa paipaj tiopaj huarmihuan siririshpaca paipaj tiotami pingaipi churashca. Paicunapaj juchamantaca castigashcami cangacuna. Paicunaca huahuacuna illajmi huañungacuna.
21 Maijan runapish paipaj huauquipaj huarmihuan cazarashpaca* millanana ruraitami rurashca. Chai runaca paipaj huauquitami pingaipi churashca. Paicunaca huahuacunata mana charingacunachu.
22 Tucui ñuca leycunatapish, tucui ñuca imallata rurachun nishcacunatapish cazuichij, chaicunataca pajtachichij. Chashnami cancuna causachun ñuca pushacushca allpaca cancunataca mana vomitanga.*
23 Cancunapaj ñaupajmanta ñuca llujshichishpa cachagrishca llajtapi causaj gentecunapaj costumbrecunataca ama catichijchu. Paicunami tucui chaicunata rurashpa causashcacuna. Chaicunataca ñucaca millanayachinimi.
24 Chaimantami cancunataca: “Cancunaca chai llajta gentecunapaj allpahuanmi saquiringuichij. Ñucami cancunamanca chai allpataca shuj herenciata shina cusha. Chai allpapica achca leche, achca mielmi tiyan. Ñucaca cancunapaj Jehová Diosmi cani. Ñucami cancunataca shujtaj pueblocunamanta chꞌicanyachishcani” nircani.
25 Cancunaca maijan animal chuya cashcata, maijan mapa cashcatami yachana canguichij. Shinallataj alasyuj animalcunamanta maijan chuya cashcata, maijan mapa cashcatami yachana canguichij. Shuj animalmantapish, alasyuj animalmantapish o llucashpa purij ima animalmantapish ama millanana tucuichijchu. Chai animalcuna mapa cashcata yachachunmi chꞌicanyachishcani.
26 Ñuca, Jehová Diosca jucha illajmi cani. Chaimantami cancunapish jucha illaj cana canguichij. Cancunataca ñucapajlla cachunmi shujtaj pueblocunamanta chꞌicanyachicuni.
27 Maijan runapish o maijan huarmipish huañushcacunahuan parlaj* cashpa o adivino cashpaca huañunatajmi can. Gentecunaca paicunataca huañungacamami rumicunahuan shitana can. Paicunapaj culpallamantatajmi huañungacuna’ ningui” nircami.
Notacuna
^ “Mólek” shutita huasha diccionariopi ricui.
^ O “rurashcalla dioscunahuan huainayashpa”.
^ O “ñucapajlla chꞌicanyachishca”.
^ O “ñucapajlla chꞌicanyachicuni”.
^ Hebreo rimaipica: “paipaj yahuarca paipaj jahuallapitaj can” ninmi.
^ Caipica paipaj huauqui causacujpiraj cazarashcamantami parlacun.
^ O “shungu tigranga”.
^ “Huañushcacunahuan parlaj” shimita huasha diccionariopi ricui.
