Números 14:1-45
-
Israelitacuna Egiptoman tigrasha nishcamanta (1-10)
-
Josuepish, Calebpish allicunallata huillashcamanta (6-9)
-
-
Jehová Dios pꞌiñarijpimi Moisesca israelitacunamanta rogarirca (11-19)
-
Israelitacuna chaquishca pambapi 40 huatacunata causashcamanta (20-38)
-
Amalequitacuna israelitacunata mishashcamanta (39-45)
14 Chai qꞌuipami tucui gentecunaca sinchita caparircacuna. Paicunaca tucui tutami caparirishpa huacarcacuna.
2 Tucui israelitacunami Moisesmanta, Aaronmanta quejarishpa paicunapaj contra rimai callarircacuna. Paicunaca cashnami nircacuna: “¡Egipto llajtapi huañushca cashpachari alli canchijman carca! ¡Cai chaquishca pambapi huañushca cashpachari alli canchijman carca!
3 ¿Jehová Diosca imapajtaj ñucanchijtaca cai allpaman pushamushcari? ¿Espadahuan huañuchichunchu pushamushca? Ñucanchij huarmicunatapish, ñucanchij huahuacunatapish prezumi apangacuna. ¿Manachu Egipto llajtaman tigrana alli canga?” nircacunami.
4 Paicunapura caishuj chaishuj parlanacushpaca: “¡Shuj pushajta agllashpa Egipto llajtaman tigrashunchij!” nircacunami.
5 Chaita uyashpami Moisespish, Aaronpish chaipi tandanacushca tucui israelitacunapaj ñaupajpi pambacama cumurircacuna.
6 Nunpaj churi Josuepish, Jefunepaj churi Calebpishmi chai allpata pacalla ricunaman rijcunapurapi carca. Paicunaca paicunapaj ropacunata lliquirishpami
7 tucui israelitacunataca cashna nircacuna: “Pacalla ricunaman rishca allpaca yallitaj alli allpami.
8 Jehová Diosca paipaj ñaupajpi ñucanchijcuna alli ricurijpica chai allpaman pushashpami chai allpataca ñucanchijman cunga. Chai allpapica achca leche, achca mielmi tiyan.
9 Pero Jehová Diospaj contraca ama tucuichijchu. Chai llajta gentecunatapish ama manchaichijchu, paicunataca jahuallami mishashun.* Jehová Diosca ñucanchijhuanmi, paicunataca pi mana ayudanchu. Ama manchaichijchu” nircacunami.
10 Chashnapish tucui gentecunami paicunataca rumicunahuan shitanata yuyarcacuna. Pero tandanacuna carpa huasi jahuapimi tucui israelitacunapaj ñaupajpi Jehová Diospaj sumaj achijnicuj ricurirca.
11 Chai qꞌuipami Jehová Diosca Moisestaca cashna nirca: “¿Cai puebloca ima horacamataj ñucataca mana respetangacuna? ¿Paicunapaj ñaupajpi tucui milagrocunata* rurashca jahuapish ima horacamataj ñucapica feta mana churangacuna?
12 Paicunataca shuj millai ungüihuanmi llaquichigrini. Paicunataca tucuchishatajmi. Canmantami paicunatapish yalli shuj jatun llajtata, paicunatapish yalli ashtahuan poderta charij llajtata rurasha” nircami.
13 Pero Moisesca Jehová Diostaca cashnami nirca: “Canmi cai pueblotaca Egiptomanta cambaj poderhuan llujshichircangui. Paicunata can llaquichijpica egipciocuna uyashpami
14 cai allpapi causaj gentecunaman huillangacuna. Paicunapishmi can Jehová Dios cai pueblohuan cashcata, cai pueblo gentecunaman can ñahui ñahui ricurishcatapish uyashcacuna. Canca Jehová Diosmi cangui, cambaj pꞌuyuca paicunapaj jahuapimi can. Canca punllaca shayacuj jatun pꞌuyupi, tutaca jatun lunyacuj ninapimi paicunata ñaupashpa ringui.
15 Tucui cai pueblota chai ratollataj* can huañuchijpica canmanta uyaj llajtacunapi causajcunaca cashnami ningacuna:
16 ‘Jehová Diosca cai gentecunataca pai cushami nishpa jurashca allpamanca mana pushai tucurcachu. Chaimantami paicunataca chaquishca pambapi huañuchirca’ ningacunami.
17 Cunanca Jehová Dioslla, can nishca shina cambaj jatun poderta ricuchi. Canca cashnami nircangui:
18 ‘Jehová Diosmi cani. Ñucaca pacienciata charij,* achcata cꞌuyaj,* pandarishcacunata perdonaj, juchacunatapish perdonaj Diosmi cani. Pero culpata charijtaca sin castigoca manataj saquinichu. Yayacuna pandarishcamantaca paicunapaj huahuacunata, paicunapaj nietocunata, paicunapaj bisnietocunatapishmi castigani’ nircanguimi.
19 Cai pueblotaca achcatami cꞌuyangui. Chaimanta Egipto llajtapi cashca horamanta cunancama perdonashca shinallataj paicunapaj pandarishcacunata perdonapai” nircami.
20 Shina nijpimi Jehová Diosca cashna nirca: “Can mañashca shinallatajmi paicunataca perdonani.
21 Chashnapish ñuca causacushca shinallatajmi jurani, allpapica tucui ladocunapimi Jehová Diospaj sumaj achijnicujta ricungacuna.
22 Ñucaca Egipto llajtapipish, chaquishca pambapipishmi milagrocunata rurarcani. Pero chai milagrocunata ricushpapish, ñuca sumaj achijnicujta ricushpapish cai chunga cutinhuanmi ñucataca pruebapi churashpa catishcacuna. Ñuca nishcatapish mana uyashcacunachu. Chai runacunamantaca ni maijan
23 paicunapaj yayacunaman cushami nishpa jurashca allpataca mana nunca ricungachu. Ñucata mana respetajcunaca ni maijan mana ricungachu.
24 Pero ñucata sirvij Calebca paicuna shina mana cashcachu. Paica tucui shunguhuanmi ñucata cazushca. Chaimantami paitaca pai ricunaman rishca allpaman pushasha. Paipaj huahua huahuacunami chai allpataca dueñoyangacuna.
25 Pugru pambapi amalequitacunapish, cananeocunapish causacushcamantaca cayaca tigrashpa richij. Puca mama cucha ñanta catishpa chaquishca pambaman richij” nircami.
26 Chai qꞌuipami Jehová Diosca Moisestapish, Aarontapish cashna nirca:
27 “¿Cai millai gentecunaca ima horacamataj ñucamantaca quejarishpa catingacunari? Israelitacuna ñucamanta imata nishcataca uyashcanimi.
28 Paicunataca cashna ningui: ‘¡Jehová Diosca cashnatajmi nin: Ñuca causacushca shinatajmi jurani. Cancuna imata nishcata ñuca uyashca shinami rurasha!
29 Cai chaquishca pambapimi cancunaca huañunguichij. Ari, tucui cancunami huañunguichij. 20 huatacunata o ashtahuan huatacunata charijcuna ña registrashcacunaca ñucamanta quejarijcunaca tucuicunami huañunguichij.
30 Chaipimi causanguichij nishpa ñuca jurashca allpamanca ni maijan mana yaicunguichijchu. Jefunepaj churi Calebhuan, Nunpaj churi Josuellahuanmi yaicungacuna.
31 Cancunaca ñucanchij huahuacunataca prezuta shinami apangacuna nircanguichijmi. Paicunatami cancuna mana yaicusha nishca allpamanca pushasha. Paicunami chai allpataca rijsingacuna.
32 Pero cancunaca cai chaquishca pambapimi huañunguichij.
33 Cancunapaj huahuacunaca chaquishca pambapimi 40 huatacunata michijcuna canga. Paicunaca cancuna ñuca ñaupajpi juchata rurashcamantami* pagangacuna. Cai chaquishca pambapi tucui cancunacuna huañungacamami pagangacuna.
34 Cancunaca 40 punllacunatami chai allpataca pacalla ricunaman rircanguichij. Chaimantami cancuna pandarishcamantaca 40 huatacunata paganguichij. Shuj punllamanta shuj huatata, shuj punllamanta shuj huatatami paganguichij. Chashnami ñucapaj contra tucushcamanta ima tucuna cashcata yachanguichij.
35 Ñuca, Jehová Diosmi caita nishcani. Cai millai gentecunahuan, ñucapaj contra tucujcunahuanca caitami rurasha: paicunaca cai chaquishca pambapimi tucuringacuna, caipimi huañungacuna.
36 Chai allpata pacalla ricunaman Moisés cachashca runacuna tigrashpaca chai allpamantaca mana allicunatami huillarcacuna. Chaimantami tucui gentecunaca paimanta quejarircacuna.
37 Chai runacunaca chai allpamanta mana allicunata huillashcamantami castigashca cangacuna. Paicunaca Jehová Diospaj ñaupajpimi huañungacuna.
38 Pero Nunpaj churi Josuepish, Jefunepaj churi Calebpish causashpami catingacuna. Paicunapishmi chai allpata pacalla ricunaman rijcunapurapi carcacuna’ ningui” nircami.
39 Tucui israelitacunaman Moisés chaita huillajpimi gentecunaca yallitaj llaquilla carcacuna.
40 Paicunaca utca jatarishpami urcu jahuaman huichiyashun nircacuna. Paicunaca: “Ñucanchijca juchatami rurashcanchij. Pero cunanca Jehová Dios cusha nishca allpaman huichiyangapajca listomi canchij” nircacunami.
41 Pero Moisesca cashnami nirca: “¿Jehová Dios mandashcataca imamantataj mana cazunguichij? Cancuna imata rurasha nicushcaca mana alli llujshingachu.
42 Ama huichiyaichijchu, Jehová Diosca mana cancunahuanchu. Cancunapaj contracunami cancunataca mishanga.
43 Amalequitacunapish, cananeocunapish cancunahuan macanacungapajmi chaipi can. Cancunataca espadahuanmi huañuchingacuna. Jehová Diosta mana cazushcamantami Jehová Diospish cancunahuanca ña mana canga” nircami.
44 Chashnapish paicunaca urcu jahuamanmi huichiyarcacuna. Pero Jehová Dioshuan ari ninacushca arcapish, Moisespish carpa huasicuna chaupillapitajmi saquirirca.
45 Chai qꞌuipaca chai urcupi causaj amalequitacunapish, cananeocunapishmi uriyarcacuna. Paicunaca israelitacunahuan macanacushpami misharcacuna. Israelitacunataca Hormá nishcacamami caita chaita cacharcacuna.
Notacuna
^ O “tandata micuj shinallami chingachishun”.
^ Hebreo rimaipica: “señalcunata” ninmi.
^ Hebreo rimaipica: “shuj runata shina” ninmi.
^ O “mana utca pꞌiñarij”.
^ O “mana tucurij cꞌuyaita ricuchij”.
^ Hebreo rimaipica: “huainayashcamantami” ninmi.
