Números 21:1-35
21 Cananeocunapuramanta caj Arad llajtata mandaj reyca Neguebpimi causarca. Paica israelitacuna Atarim llajtaman rina ñanta rishcata yachaj chayashpaca paicunatami llaquichirca. Huaquincunatacarin prezumi aparca.
2 Chaimi israelitacunaca Jehová Diosmanca caita ruranata ari nircacuna. Paicunaca: “Cai gentecunata ñucanchij maquipi cujpica paicunapaj llajtacunatami tucui tucuchishun” nircacunami.
3 Chaimi Jehová Diosca israelitacuna nishcata uyashpa cananeocunata mishachun saquirca. Israelitacunaca cananeocunatapish, paicunapaj llajtacunatapishmi tucuchircacuna. Chaimantami chai lugartaca Hormá nishpa shutichircacuna.
4 Israelitacunaca Hor shuti urcumanta llujshishpaca Edom llajtata muyungapajmi Puca mama cucha ñanta catircacuna. Pero gentecunaca ñami shaicurircacuna.
5 Chaimi israelitacunaca Diospaj contra, Moisespaj contra rimashpa catircacuna. Paicunaca: “¿Egipto llajtamantaca imamantataj ñucanchijtaca llujshichishcacuna? ¿Cai chaquishca pambapi huañuchunchu llujshichishcacuna? Caipica micunapish, yacupish mana tiyanchu. Cai millanana tandatapish ñami aminchij” nircacunami.
6 Chaimi Jehová Diosca venenoyuj culebracunata cacharca. Chai culebracuna canijpimi achca israelitacuna huañurca.
7 Chai qꞌuipami israelitacuna Moisespajman rishpaca: “Ñucanchijca Jehová Diospaj contra, cambaj contra rimashpami juchata rurashcanchij. Cai culebracunata anchuchichun Jehová Diosta mañapai” nircacuna. Chaimi Moisesca israelitacunamanta Diosta mañarca.
8 Jehová Diosca Moisestaca: “Venenoyuj culebraman rijchaj shuj culebrata rurai. Chaitaca shuj postepi churai. Maijantapish culebra canijpica causashpa catingapajmi postepi churashca culebrata ricuna can” nircami.
9 Chai ratomi Moisesca shuj cobre culebrata rurarca. Chai culebrataca postepimi churarca. Maijantapish shuj culebra canijpica chai cobre culebrata ricushpaca causashpami catij carca.
10 Chai qꞌuipaca israelitacunaca chaimanta rishpaca Obotpimi paicunapaj carpa huasicunata shayachishpa saquirircacuna.
11 Obotmanta llujshishpaca chaquishca pambapi saquirij Iyé-Abarim nishcapimi paicunapaj carpa huasicunata shayachishpa saquirircacuna. Chai chaquishca pambaca Moab chꞌimbapurapi, inti llujshin ladomanmi can.
12 Chaimanta rishpaca Zered pugru pamba cꞌuchullapimi paicunapaj carpa huasicunata shayachishpa saquirircacuna.
13 Chaimanta llujshishpaca chaquishca pambapi saquirij Arnón pugru pambapimi paicunapaj carpa huasicunata shayachishpa saquirircacuna. Chai chaquishca pambaca amorreocunapaj allpa lindecunamantami callarin. Arnón pugru pambaca Moab llajtahuan lindemi can. Moab llajtataca amorreocunamantami chꞌicanyachin.
14 Chaimantami Jehová Diospaj Macanacuicunamanta parlaj Libropica cashna nin: “Sufá pugru pambapi saquirij Vaheb, Arnón pugru pambacuna.
15 Cai pugru pambacunaca Ar llajtacamami can. Moab llajta linde cꞌuchullapimi can” ninmi.
16 Chai qꞌuipami paicunaca Beer nishcaman rircacuna. Chaipi tiyaj pugyupimi Jehová Diosca Moisestaca: “Israelitacunaman yacuta cungapaj paicunata tandachi” nirca.
17 Chai punllami israelitacunaca cai cantota cantarcacuna:
“¡Yacu, cai pugyumanta llujshiyari! ¡Cancunaca shuj cantota cantaichijyari!
18 Cai pugyutaca mandajcunami allarcacuna. Pushajcunami ucujta allarcacuna.Paicuna mandana tauna caspihuan, paicunapaj tauna caspicunahuanmi allarcacuna” nishpami cantarcacuna.
Chai qꞌuipami israelitacunaca chaquishca pambamantaca Mataná nishca ladoman rircacuna.
19 Mataná nishcamantaca Nahaliel nishca ladomanmi rircacuna. Nahaliel nishcamantaca Bamot nishca ladomanmi rircacuna.
20 Bamot nishcamantaca Moab llajtapi saquirij pugru pamba ladomanmi rircacuna. Chai pugru pambaca Pisgá nishca jahua ladoman, Jesimón nishca* ladomanmi can.
21 Chai qꞌuipami israelitacunaca amorreocunata mandaj rey Sehonpajman huillajcunata cachashpaca cashna nircacuna:
22 “Cambaj llajtata pasachun saqui. Cambaj tarpushca allpacunamanpish, cambaj uva chagracunamanpish mana yaicushunchu. Pugyucunamantapish yacuta mana ubyashunchu. Ñucanchijca cambaj llajtata pasangacamami Reypaj Ñan nishcata rishun” nircacunami.
23 Pero rey Sehonca israelitacuna paipaj llajtata pasachunca mana saquircachu. Chaipaj randica paipaj tucui soldadocunata tandachishpami chaquishca pambapi israelitacunahuan tupangapaj llujshirca. Paica Jáhaz llajtamanmi chayarca. Chaipimi israelitacunahuan macanacurca.
24 Pero israelitacunaca espadahuanmi misharcacuna. Chashna mishashpami paipaj allpataca Arnón pugru pambamanta callarishpaca ammonitacunapaj cꞌuchullapi saquirij Jaboc pugru pambacama japircacuna. Jazer llajtaca ammonitacunapaj allpa lindepimi can.
25 Chashnami israelitacunaca tucui chai llajtacunata japircacuna. Paicunaca amorreocunapaj tucui llajtacunapimi causai callarircacuna. Hesbón llajtapi, tucui cꞌuchulla pueblocunapipishmi causai callarircacuna.
26 Hesbón llajtaca amorreocunata mandaj rey Sehonpaj llajtami carca. Paimi Moab llajtamanta reyhuan macanacushpa paipaj tucui allpacunata Arnón pugru pambacama quichurca.
27 Chashna tucushcamantami gentecunaca burlarishpa cashna ni callarircacuna:
“Hesbón llajtaman shamuichij.
Sehonpaj llajtata shayachichij. Chai llajtaca alli shayachishca saquirichun.
28 Hesbonmantaca ninami llujshishca. Sehonpaj pueblomantaca lunyacuj ninami llujshishca.
Moabpi saquirij Ar llajtatami tucuchishca. Arnón pugru pamba jahuaman caj amocunatapishmi tucuchishca.
29 ¡Aij Moab llajtalla! ¡Kemós pueblolla, tucuchishcami cangui!
Paipaj culpamantami paipaj churicunaca caita chaita cachashca canga. Paipaj ushushicunatapish amorreocunata mandaj rey Sehonmi prezuta shina apanga.
30 Paicunataca flechacunahuan huañuchishunchij.Hesbón llajtaca Dibón llajtacamami tucuchishca canga.Nofahcama tucuchishunchij.Ninaca Medebacamami chayanga” nircacunami.
31 Chashnami israelitacunaca amorreocunapaj allpapi causai callarircacuna.
32 Chai qꞌuipami Moisesca Jazer llajtata pacalla ricunaman richun huaquin runacunata cacharca. Chaimi israelitacunaca Jazer llajta cꞌuchulla pueblocunata japishpa chaipi causaj amorreocunata llujshichishpa cacharcacuna.
33 Chai qꞌuipaca israelitacunaca tigrashpami Basanman rina Ñanta huichiyarcacuna. Cutin Basán llajtata mandaj Og runaca Edréi llajtapi israelitacunahuan macanacungapajmi paipaj tucui soldadocunandij llujshirca.
34 Jehová Diosca Moisestaca: “Ama manchaichu. Paitapish, paipaj tucui soldadocunatapish, paipaj allpatapish cambaj maquipimi churasha. Paitaca Hesbón llajtapi causaj amorreocunata mandaj rey Sehonta shinallatajmi rurangui” nircami.
35 Chaimi israelitacunaca paitapish, paipaj churicunatapish, paipaj tucui soldadocunatapish huañuchircacuna. Shujllapish causashpa catichunca mana saquircacunachu. Paipaj allpatapishmi japircacuna.
Notacuna
^ Caitaca “chaquishca pamba” nishpapishmi traducishcacuna.
