Números 24:1-25
24 Jehová Diosca Israelta bendicianatami munarca. Chaita ricushpami Balaamca mana alli señalcunata cutin mashcanamanca ña mana rirca. Chaipaj randica chaquishca pamba ladotami tigrarishpa ricurca.
2 Balaam paipaj ñahuita alzashpaca israelitacuna cada familia paicunapaj carpa huasicunapi cajtami ricurca. Chai qꞌuipami Balaamca Diospaj espirituta chasquirca.
3 Chaimi paica cashna nishpa huillai callarirca:
“Caica Beorpaj churi Balaampaj huillaimi.Ñahuicunata pascashcamanta alli ricuj runapaj huillaimi.
4 Caica Dios nishca shimicunata uyajpaj huillaimi.Paica Tucui poderta charij Dios muscuipi shina ricuchishcatami ricushca.Ñahuicuna pascashcami cumurishca:
5 ¡Jacob, cambaj carpa huasicunaca sumajmari!¡Israel, cambaj carpa huasicunaca mai sumajmari!
6 Chaicunaca pugru pambacuna shina,yacu cꞌuchullapi caj huertacuna shina,Jehová Dios tarpushca áloe yuracuna* shina,yacu cꞌuchullapi caj cedro yuracuna shinami tindirin.
7 Yacuca carahuan rurashca paipaj ishqui baldecunamantami shutucun.Paipaj muyupish achca yacucuna cꞌuchupi tarpushcami.*
Paipaj reypish Agagta yalli jatunmi canga.Paipaj gobiernopish jatunyachishcami canga.
8 Diosmi paicunataca Egipto llajtamanta llujshichicun.Paica jatun huagrapaj* gachucuna shinami paipaj poderhuan paicunataca ayudan.
Paicunata llaquichij llajtacunataca tucuchingami,paicunapaj tullucunatapish ñutungami, paicunataca paipaj flechacunahuanmi tucuchinga.
9 Israelca cumurishpami shuj león shina siririn.Shuj leonta shina, ¿pitaj paitaca pꞌiñachi tucungari?
Canta bendiciajcunaca bendiciashca cachun,canta maldicijcunaca maldicishca cachun” nircami.
10 Chaimi Balacca Balaamhuan pꞌiñarirca. Balacca yallitaj pꞌiñarishpa paipaj maquicunapi huajtarishpaca Balaamtaca cashnami nirca: “Ñuca contracunata maldicichunmi cayarcani. Pero canca cai quimsa cutinmi paicunataca bendiciashcangui.
11 Cai rato cambaj huasiman tigrai. Ñucaca cantaca ashtahuanmi jatunyachisha nircani. Pero ricui, Jehová Diosca chaita can ama chasquichunmi jarcashca” nircami.
12 Balaamca Balactaca cashnami nirca: “¿Manachu can cachashca huillajcunamanca:
13 ‘Balac paipaj huasi junda cullquita, orota cujpipish ñucaca ima allitapish, ima mana allitapish Jehová Dios mana mandajpica ñuca munaimantaca mana rurai tucushachu’ nircani? ¿Manachu ‘Ñucaca Jehová Dios ima nishcallatami huillasha’ nircani?
14 Cunanca ñuca llajtaman rishallami. Pero manaraj rishpa cai pueblo cambaj pueblota shamuj punllacunapi imata ruranata shamui huillasha” nircami.
15 Chai qꞌuipaca paica cashna nishpami huillai callarirca:
“Caica Beorpaj churi Balaampaj huillaimi.Ñahuicunata pascashcamanta alli ricuj runapaj huillaimi.
16 Caica Dios nishca shimicunata uyajpaj huillaimi.Paica Jatun Diospaj yachaitami charin.Paica ñahuicuna pascashca cumuricushpamiTucui poderta charij Dios muscuipi shina ricuchishcata ricushca.
17 Ñucami ricusha, pero mana cunanchu ricusha.Ñucami alli ricusha, pero manaraj cꞌuchullapichu.
Jacobmantaca shuj estrellami llujshinga,Israelmantaca shuj varami jataringa.
Paica ciertotajmi Moabtaca frenteta pꞌaquinga.Tucui millai runacunapaj uma tullutapishmi pꞌaquinga.
18 Edom llajtaca Israelpajmi canga.Ari, Seír llajtaca paipaj contracunapajmi tucunga.Cutin Israelca mana manchaj cashcatami ricuchinga.
19 Jacobmanta shuj runami shujtajcunata mishashpa catinga.Chai runami llajtapi saquirishcacunataca tucui tucuchinga” nircami.
20 Balaamca Amalecta ricushpaca:
“Amalecmi llajtacunamanta punta llajta carca,pero ultimotaca tucuchishcami canga” nishpami huillashpa catirca.
21 Balaamca quenitacunata ricushpaca cashna nishpami huillashpa catirca:
“Cambaj huasica alli shayachishcami can, cambaj causanaca jatun pata rumi jahuapimi can.
22 Pero maijan runapish Cayintaca rupachingami.
¿Asiria llajtaman canta prezuta shina apachunca mashna tiempotaj illan?” nircami.
23 Balaamca cashna nishpami huillashpa catirca:
“¡Aij! ¿Dios chaicunata rurajpica pitaj quishpiringari?
24 Kitim mama cucha urimantami barcocuna chayanga.Asiria llajtatami sufrichingacuna,Ebertapishmi sufrichingacuna.
Pero paipishmi tucui tucuchishca canga” nircami.
25 Chai qꞌuipaca Balaamca jatarishpa paipaj llajtaman tigrarcallami. Balacpish paipaj ñanta rircallami.
Notacuna
^ Cai yuramantaca mishquijllata ashnacuj yacumi llujshin.
^ Caitaca “Paipaj huahua huahuacunaca achca yacucuna cꞌuchupimi causangacuna” nishpapishmi traducishcacuna.
^ O “urcu toropaj”.
