Números 9:1-23
9 Israelitacuna Egipto llajtamanta llujshishca ishqui huatapi, chai huatapaj primer quillapimi Jehová Diosca Sinaí chaquishca pambapi Moiseshuan parlarca. Paitaca cashnami nirca:
2 “Israelitacunaca agllashca punllapimi Pascua fiestata rurana can.
3 Cai quillapaj 14 punllapimi ña tutayacujpi, agllashca punllapi Pascua fiestata rurana can. Paicunaca leycunapi nishca shina, ima shina rurana cashca shinami rurana can” nircami.
4 Chaimi Moisesca israelitacunataca Pascua fiestata rurachun mandarca.
5 Chashna mandajpimi israelitacunaca primer quillapi, chai quillapaj 14 punllapi ña tutayacujpi Pascua fiestata Sinaí chaquishca pambapi rurarcacuna. Israelitacunaca Jehová Dios Moisesman mandashca shinami rurarcacuna.
6 Huaquin cꞌaricunaca huañushca cuerpota tuparishcamantami mapa saquirishcacuna carca. Chaimantami chai punllaca Pascua fiestata mana rurai tucurcacuna. Chaimi paicunaca chai punllallataj Moisespaj ñaupajman, Aaronpaj ñaupajman rircacuna.
7 Paicunaca: “Ñucanchijca shuj huañushca cuerpota tuparishcamantami mapa saquirishcanchij. ¿Imatataj rurai tucunchij? Ñucanchijpish caishuj israelitacuna shinallatajmi agllashca punllapi ñucanchij ofrendata Jehová Diosman cusha ninchij” nircacunami.
8 Shina nijpimi Moisesca: “Caipi shuyaichij. Cancunamanta Jehová Dios ima nijtami uyagrini” nirca.
9 Jehová Diosca Moisestaca cashnami nirca:
10 “Israelitacunataca cashna ningui: ‘Cancunapuramanta maijan runapish o cancunapaj huahua huahuacunapish shuj huañushca cuerpota tuparishcamanta mapa saquirishca cashpapish o caru viajepi cashpapish Jehová Diospajmi Pascua fiestata rurana can.
11 Paicunaca segundo quillapaj 14 punllapimi ña tutayacujpi Pascua fiestata rurana can. Chai punllami malta ovejapaj aichataca levadura illaj tandahuan, jayaj verduracunahuan micuna can.
12 Malta ovejapaj aichataca cayandij tutamantacamaca imata mana saquinachu can. Shinallataj shuj tullullatapish mana pꞌaquinachu can. Pascua fiestataca leycunapi nishca shinami rurana can.
13 Pero maijanpish chuya cashca jahua o mana maiman viajashca jahua Pascua fiestata mana rurashpaca israelitacunapuramantaca huañuchishcami canga. Paica agllashca punllapimi ofrendataca Jehová Diosman mana cushca. Chai runaca paipaj juchamantami castigashca canga.
14 Shujtaj llajtamanta shamushca runa cancunahuan causashpaca paipishmi Jehová Diospaj Pascua fiestata rurana can. Paica Pascua fiestamanta leypi mandashca shina, ima shina rurana cashcata ricuchishca shinami rurana can. Shujtaj llajtamanta shamushca runapajpish, israelita runapajpish shujlla leymi tiyana can’ ningui” nircami.
15 Diospaj carpa huasita tucui shayachi punllami pꞌuyuca Diospaj carpa huasita taparca. Pero nina lunyacuj shina pꞌuyuca tutayaimantaca cayandij tutamantacamami Leyta huaquichina arcata churashca Diospaj carpa huasi jahuapi saquirirca.
16 Siempremi cashna tucuj carca: punllaca pꞌuyumi Diospaj carpa huasita tapaj carca. Tutaca chai pꞌuyuca nina lunyacuj shinami tucuj carca.
17 Diospaj carpa huasi jahuamanta pꞌuyu anchurijpica israelitacunaca chai ratomi rijcuna carca. Cutin pꞌuyu maipi shayarijpica israelitacunaca chaipimi carpa huasicunapi saquirijcuna carca.
18 Israelitacunaca Jehová Dios mandajpimi rijcuna carca. Shinallataj Jehová Dios mandajpimi carpa huasicunapi saquirijcuna carca. Diospaj carpa huasi jahuapi pꞌuyu cajpica israelitacunaca carpa huasicunapimi saquirijcuna carca.
19 Diospaj carpa huasi jahuapi pꞌuyu achca punllacunata saquirijpica israelitacunaca Jehová Diosta cazushpami mana rijcuna carca.
20 Huaquinpica pꞌuyuca achca punllacunatami Diospaj carpa huasi jahuapi saquirij carca. Israelitacunaca Jehová Dios mandajpimi carpa huasicunapi saquirijcuna carca. Shinallataj Jehová Dios mandajpimi rijcuna carca.
21 Shujtaj cutincunaca pꞌuyuca tutayaimantaca achijyangacamallami saquirij carca. Chaimi israelitacunaca tutamanta lado pꞌuyu anchurijpica rijcunalla carca. Punlla cajpipish, tuta cajpipish pꞌuyu anchurijpica rijcunallami carca.
22 Diospaj carpa huasi jahuapi pꞌuyu cajpica ishqui punlla cajpipish, shuj quilla cajpipish o ashtahuan punllacuna cajpipish israelitacunaca carpa huasicunapi saquirishpami mana rijcuna carca. Pero pꞌuyu anchurijpica paicunaca rijcunallami carca.
23 Israelitacunaca Jehová Dios mandajpimi carpa huasicunapi saquirijcuna carca. Shinallataj Jehová Dios mandajpimi rijcuna carca. Paicunaca Jehová Dios Moisesman mandashca shinami Jehová Diosta cazurcacuna.
