Apocalipsis 13:1-18
13 Chai dragonca mama cucha arenapimi shayashpa saquirirca.
Chaipimi mama cuchamanta shuj manchanai millai animal llujshicujta ricurcani. Chai animalca canchis umacunayuj, chunga gachucunayujmi carca. Paipaj gachucunapica chunga coronacunatami* churarishca carca. Paipaj umacunapipish Diosta cꞌamij shuticunatami charirca.
2 Ñuca ricushca manchanai millai animalca leopardoman rijchajmi carca. Shinapish paipaj chaquicunaca osopaj chaquicuna shinami carca. Paipaj shimica leonpaj shimi shinami carca. Dragonmi chai manchanai millai animalmanca paipaj poderta, paipaj jatun tiyarinata, jatun autoridadtapish curca.
3 Chai manchanai millai animalpaj shuj umaca casi huañungacama chugrichishca shina cashcatami ricurcani. Huañungacama casi chugrichishca cashpapish alliyashcami carca. Allpapi causaj tucui gentecunaca mancharinacushpami manchanai millai animalta catircacuna.
4 Chai gentecunaca manchanai millai animalman autoridadta cushcamantami dragontaca adorarcacuna. Manchanai millai animaltapishmi paicunaca: “¿Pitaj manchanai millai animal shinaca canyari? ¿Pitaj paihuanca macanacui tucunyari?” nishpa adorarcacuna.
5 Manchanai millai animalca jatun tucungapaj, Diosmantapish mana allita nishpa cꞌamingapajmi poderta chasquirca. Shinallataj 42 quillacunata pai munashcata rurangapajmi autoridadta chasquirca.
6 Chai qꞌuipaca Diosmanta, paipaj shutimanta, pai maipi causacushcamantami mana allicunata nishpa cꞌami callarirca. Jahua pachapi causajcunamantapishmi mana allicunata nishpa cꞌami callarirca.
7 Chai millai animaltaca jucha illajcunahuan macanacushpa mishachunmi saquirca. Shinallataj tucui familiacunata, tucui pueblocunata, tucui rimaicunata, tucui llajtacunata mandangapajmi autoridadta chasquirca.
8 Chai animaltaca allpapi causajcunaca tucuicunami adorangacuna. Paicunapaj shuticunaca cai pacha tiyai callarishcamantami huañuchishca Malta Ovejapaj rollopica ni maijanpaj shuti mana quillcashca can. Chai rollopica causagrijcunapaj shuticunallami quillcashca can.
9 Maijanpish rinrinta charijca uyachun.
10 Maijanpish carcelman rina cajca carcelmanmi apashca canga. Maijanpish espadahuan huañuchijca* espadahuanmi huañuchishca canga. Chaimantami jucha illajcunaca ahuantanata, feta charinatapish minishtincuna.
11 Shujtaj manchanai millai animal allpamanta llujshicujtami ricurcani. Chai animalca malta ovejapaj shina ishqui gachucunayujmi carca. Shinapish shuj dragón shinami rimai callarirca.
12 Chai animalca punta manchanai millai animal shinallatajmi paipaj ñaupajpi autoridadta charishcata ricuchin. Paica allpatapish, allpapi causaj gentecunatapish casi huañungacama chugrichishca cashca punta manchanai millai animalta adorachunmi mandan.
13 Gentecuna ricuchunpishmi jatun milagrocunata ruran. Shinallataj jahua pachamantami cai allpaman ninata uriyachin.
14 Manchanai millai animalpaj ñaupajpi milagrocunata rurachun saquijpimi allpapi causaj gentecunataca chai milagrocunahuan pandachin. Shina pandachishpami allpapi causajcunataca espadahuan chugrichishca cashpapish mana huañuj manchanai millai animalman rijchaj animalta ruraichij nirca.
15 Qꞌuipata ricurij manchanai millai animalmanca punta ricurij manchanai millai animalman rijchajta rurashca animalman causaita* cuchunmi mandarca. Chaimi manchanai millai animalman rijchajca parlai tucurca. Shinallataj paita mana adorajcunataca huañuchichunmi mandarca.
16 Tucui gentecunatami paicunapaj alli lado maquipi mana cashpaca paicunapaj frentepi shuj señalta churachun obligan. Uchillacunatapish, jatuncunatapish, charijcunatapish, pobrecunatapish, cacharichishcacunatapish, sirvijcunatapishmi señalta churachun obligan.
17 Maijanpish chai señalta mana charijca mana randi tucunchu, ni mana cꞌatui tucunchu. Chai señalta charijllami randi tucun o cꞌatui tucun. Chai señalca manchanai millai animalpaj shutimi mana cashpaca paipaj shutipaj numeromi.
18 Alli yachaita charijca manchanai millai animalpaj número maijan cashcata yachachun. Chai numeroca runapaj numeromi can. Paipaj numeroca 666-mi can. Caitaca alli yachaita charijllami intindinga.
Notacuna
^ O “diademacunatami”.
^ Caitaca “Maijanpish espadahuan huañuna cajca” nishpapishmi traducishcacuna.
^ Griego rimaipica: “samaita” ninmi.
