Apocalipsis 15:1-8
15 Jahua pachapica shujtaj jatun, sumaj señaltami ricurcani: chaipica tucuri canchis llaquicunatami canchis angelcuna charicurcacuna. Chai llaquicuna tucurijpimi Diospish yallitaj pꞌiñarinata saquinga.
2 Shinallataj ninahuan chagrushca vidrio shina mama cucha yacutami ricurcani. Manchanai millai animalta, paiman rijchajta rurashca animalta, paipaj shutipaj numerota mishajcunatapishmi ricurcani. Paicunaca vidrio shina mama cucha yacu ladopimi shayacurcacuna. Paicunapaj maquicunapica Diospaj arpacunatami charicurcacuna.
3 Paicunaca Diosta sirvij Moisespaj cantota, Malta Ovejapaj cantotapish cantashpami cashna nicurcacuna:
“Tucui poderta charij Jehová* Dioslla. Can rurashcacunaca jatun, sumajcunami can. Cambaj ñancunapish alli, mana llulla ñancunami can. Canca huiñai huiñaita Jatun Mandajmi cangui.
4 Jehová* Dioslla, ¿pitaj cantaca mana manchangari? ¿Pitaj cambaj shutitapish mana jatunyachingari? Canllami pajtachij cangui. Tucui llajta gentecunami can cashcata rurashpa juzgajta ricushpa cambaj ñaupajman shamushpa canta adorangacuna” nicurcacunami.
5 Chai qꞌuipaca jahua pachapi Diospaj carpa huasi* chuya ucu* pascarijtami ricurcani.
6 Chai chuya ucumantaca canchis angelcunami canchis llaquicunata apashca llujshircacuna. Paicunaca chuya, achijnicuj lino churanata churarishcami carcacuna. Shinallataj pechocamami oro chumbihuan chumbillirishca carcacuna.
7 Chuscu querubincunamanta shujmi canchis angelcunamanca canchis oro tazoncunata curca. Chai tazoncunaca huiñai huiñaita causaj Dios yallitaj pꞌiñarishca cashcahuan jundami carca.
8 Chai chuya ucuca Diosta jatunyachishcamanta, paipaj podermantapishmi cushnihuan jundarca. Canchis angelcuna chai canchis llaquicunata tucuchingacama chuya ucumanca ni pi mana yaicui tucurcachu.
Notacuna
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “Huillaj carpa huasi” ninmi.
^ Caipica chuya ucu nishpaca Diospajlla ashtahuan chꞌicanyachishca ucumantami parlacun.
