Apocalipsis 4:1-11
4 Chai qꞌuipaca jahua pachapi shuj pungu pascashcatami ricurcani. Chaipica callari rimai ñucahuan parlashpaca trompetapi tocashca uyarij shinami uyarirca. Paica: “Caiman huichiyamui. Imalla tucunatami canmanca ricuchigrini” nircami.
2 Chai qꞌuipaca ñapishmi Diospaj espíritu ñuca jahuaman shamurca. Chaimi jahua pachapi shuj jatun tiyarinata ricurcani. Chai jatun tiyarinapi tiyacujtapishmi ricurcani.
3 Jatun tiyarinapi tiyacujca jaspe, sardio* rumicuna shina achijnicujmi carca. Shinallataj jatun tiyarina muyundijpica esmeralda rumiman rijchaj cuichimi tiyarca.
4 Jatun tiyarina muyundijpica shujtaj 24 jatun tiyarinacunatami ricurcani. Chai jatun tiyarinacunapica 24 ancianocuna tiyacujtami ricurcani. Paicunaca yuraj churanacunata churarishca, umapipish oro coronata churarishcami carcacuna.
5 Jatun tiyarinamantaca relampagocuna, rimashcacuna, cꞌulun nishcacunapishmi llujshicurca. Shinallataj jatun tiyarina ñaupajpica nina lunyacuj canchis lamparacunami tiyarca. Chaicunaca Diospaj canchis espiritucunatami ricuchin.
6 Jatun tiyarina ñaupajpica vidrio shina mama cucha yacumi tiyarca. Chai yacuca cristalman rijchajmi carca.
Jatun tiyarina chaupipi,* jatun tiyarina muyundijpipish chuscu querubincunami tiyarca. Paicunaca ñaupajmanpish, huashamanpish ñahuicuna jundami carcacuna.
7 Primer querubinca leonman rijchajmi carca. Segundo querubinca huagraman rijchajmi carca. Tercer querubinca runaman rijchaj ñahuitami charirca. Cutin cuarto querubinca volacuj aguilaman rijchajmi carca.
8 Chuscu querubincunamantaca cada unomi sujta alasta charirca. Chai alascuna ucumanpish, jahuamanpish ñahuicuna jundami carca. Paicunaca punllapish, tutapish mana samarishpami: “Jehová* Diosca jucha illaj, jucha illaj, jucha illajmi can. Paica Tucui poderta charij, cunanpish tiyaj, ñaupapish tiyaj, shamugrij Diosmi” nincuna.
9 Jatun tiyarinapi tiyacujta, huiñai huiñaita causajta querubincuna jatunyachijpi, alli nijpi, pagui nijpica, cada chashna nishcatami,
10 jatun tiyarinapi tiyacujpaj ñaupajpi cungurishpa 24 ancianocunaca huiñai huiñaita causajta adorancuna. Jatun tiyarinapaj ñaupajpi paicunapaj coronacunata churashpami cashna nincuna:
11 “Ñucanchij Jehová* Dioslla. Canca Tucui poderta charijmi cangui. Canmi jatunyachishca canatapish, alli nishca canatapish chasquina cangui. Canmi tucui imatapish rurashcangui. Can munashcamantami tucui imapish tiyan, canmi tucuita rurashcangui” nincunami.
Notacuna
^ O “sumaj pucanicuj”.
^ O “cꞌuchupi”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
