Colosenses 3:1-25
3 Shinapish cancunaca Cristohuan causachishca cashcamanta jahua pachapi tiyashcacunata mashcashpa catichij. Chaipimi Cristoca Diospaj alli ladopi tiyacun.
2 Jahua pachapi imalla tiyashcacunapi yuyailla caichij. Ama cai pachapi tiyashcacunapica yuyaichijchu.
3 Cancunaca huañurcanguichijmi. Dios munashca shinami cancunapaj causaica Cristopi pacashca tiyacun.
4 Causaita cuj Cristo ricurijpica cancunapishmi paihuan ricuringuichij. Paihuanmi jatunyachishca canguichij.
5 Chaimanta huainayanapi* ama urmangapaj, ima mapa ruraicunata ama rurangapaj, shuj cꞌarihuan o shuj huarmihuan yallitaj chayarina munaita ama charingapaj, mapa yuyaicunata ama charingapaj, shujtajcunapajta ama munangapajpish cancunapaj cuerpomanta tucuita huañuchichij. Shujtajcunapajta munanaca yanga dioscunata adorana shinallatajmi can.
6 Chaicunata ruraj gentecunahuanmi Diosca pꞌiñaringa.
7 Ñaupaca cancunapish paicuna shinallatajmi rurashpa causarcanguichij.*
8 Chaimanta cunanca pꞌiñarinata, coleranata, millaita ruranata, llaquichij shimicunata rimanatapish cancunamanta anchuchichij. Shinallataj cancunapaj shimimantaca ima mapa rimaicuna amataj llujshichun.
9 Caishuj chaishuj ama llullanacuichijchu. Cancunapaj mauca causaitapish, chai causaipi imallata rurashcatapish mauca churanata anchuchij shina anchuchichij.
10 Ashtahuanpish mushuj churanata churarij shina Dios cushca mushuj causaita churarichij. Cai mushuj causaica Diosman rijchaj rurashcami can. Chaimanta Diosta alli rijsishpa mushujyarishpa catichij.
11 Cai mushuj causaimantami griegocuna cashpapish, judiocuna cashpapish, circuncisionta rurachishca cashpapish, circuncisionta mana rurachishca cashpapish, shujtaj llajtacunamanta cashpapish, sacha runacuna* cashpapish, sirvij runacuna cashpapish, cacharichishca runacuna cashpapish tucuicuna igual canchij. Ashtahuanpish Cristomi tucuipi can, paihuanmi ñucanchijpish shuj shinalla canchij.
12 Cancunaca Dios agllashcacuna, jucha illajcuna, Diospaj cꞌuyashca huahuacunami canguichij. Chaimanta tucui shunguhuan llaquij canata, cuj canata, humilde canata, manso shungu canata, pacienciata charinatapish churarichij.
13 Caishuj chaishuj ahuantanacushpa catichij. Maijanpish cancunata llaquichijpica shungumanta perdonanacuichij. Jehová* Diosca cancunataca shungumantami perdonarca, cancunapish chashnallataj ruraichij.
14 Tucui caicunamanta yallica cꞌuyaita churarichij. Cꞌuyaimi gentecunataca tucuipi shuj shinallata ruran.
15 Shinallataj Cristopaj sumaj causai cancunapaj shungupi mandachun. Diosca cancunataca shuj cuerpolla cachun, sumaj causaita charichunmi cayashca. Chaimanta siempre pagui nichij.
16 Cancunapaj shungupica Cristo yachachishcacunaca junda cachun. Chashnami cancunaca alli yachajcuna tucunguichij. Caishuj chaishuj yachachinacushpa, animarinacushpa catichij. Salmocunata cantashpa, Diosta alabashpa, Diosta pagui nishpa paita adorangapaj cantocunata cantaichij. Cancunapaj shungupipish Jehová* Diosta cantaichij.
17 Imata nishpapish, imata rurashpapish tucuita Amito Jesuspaj shutipi ruraichij. Paimanta Yaya Diostapish pagui nichij.
18 Huarmicuna, cancunapaj cusacunata cazuichij. Amito Jesusta catij huarmicunaca chaitami rurana can.
19 Cusacuna, cancunapaj huarmicunata cꞌuyashpa catichij. Paicunahuanca ama yallitaj pꞌiñarichijchu.*
20 Huahuacuna, cancunapaj yaya mamata tucuipi cazuichij. Chaita rurachunmi Amito Jesusca munan.
21 Yayacuna, cancunapaj huahuacuna ama desanimarichunca* paicunataca ama pꞌiñachichijchu.
22 Sirvij runacuna, cancunapaj amocunata tucuipi cazuichij. Shinapish paicuna ricucujllapi, runacunapaj ñaupajpi alli saquiringaraicullaca ama cazuichijchu. Ashtahuanpish tucui shunguhuan Jehová* Diosta manchashpa paicunataca cazuichij.
23 Imata ruracushpapish tucui shunguhuan Jehová* Diospaj ruracushca shina ruraichij. Runacunapaj ruracushca shinaca ama ruraichijchu.
24 Cancunaca allimi yachanguichij, Jehová* Diosmantami cancuna japina cashca herenciataca chasquinguichij. Amota sirvijcuna caichij. Chai Amoca Cristomi.
25 Mana allita rurajca mana allita rurashcamantami llaquichishca canga. Diosca pitapish mana ñahuita ricushpalla juzgangachu.
Notacuna
^ Griego rimaipica: “pornéia” ninmi. “Huainayana” shimita huasha diccionariopi ricui.
^ O “purircanguichij”.
^ Griego rimaipica: “escita” ninmi. Cai runacunataca paicuna ima shina causashcamanta, paicunapaj costumbrecunamantami pꞌiñajcuna carca.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “ama millai caichijchu”.
^ O “llaquirichunca”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
