Deuteronomio 12:1-32
12 Cancunapaj ñaupa yayacunapaj Jehová Dios cugrishca allpapi causacushca tucui punllacunapica cai leycunata, imallata rurachun nishcacunatami alli pajtachina canguichij.
2 Cancuna japigrishca llajtacunapica paicunapaj dioscunata adorashca lugarcunatami libri chingachina canguichij. Jatun urcucuna jahuapi cajpipish, lomacuna jahuapi cajpipish, pꞌangasapa yuracuna ucupi cajpipish librimi tucuchina canguichij.
3 Paicunapaj altarcunataca tucuchinami canguichij. Paicunapaj adorana pilarcunataca ñutunami canguichij. Paicunapaj adorana postecunataca ninapimi rupachina canguichij. Paicunapaj rurashcalla dioscunatapish urmachinami canguichij. Chashnami paicunapaj dioscunapaj shuticunataca chai lugarmanta anchuchinguichij.
4 Paicuna paicunapaj dioscunata adoraj shinaca cancunapaj Jehová Diostaca ama adoraichijchu.
5 Ashtahuanpish cancunapaj Jehová Dios paipaj shutita jatunyachingapaj agllashca lugarman richij. Tucui cancunapaj familiacunamanta pai maipi causanata agllashca lugarman rishpa chaipi paita adoraichij.
6 Chaimanmi cancunapaj rupachishca ofrendacunata, cancunapaj sacrificiocunata, cancunapaj diezmocunata,* cancunapaj shujtaj ofrendacunata, Diosman cusha nishca ofrendacunata, shungumanta cushca ofrendacunata, cancunapaj huagracunamanta punta huacharishcacunata, cancunapaj ovejacunamanta punta huacharishcacunatapish apana canguichij.
7 Chaipimi cancunapish, cancunapaj huasicunapi cajcunapish cancunapaj Jehová Diospaj ñaupajpi micunguichij. Cancuna tucui imallata rurashcamantami cushicunguichij. Cancunataca cancunapaj Jehová Diosmi bendiciashca.
8 Cunan caipi ñucanchij imata ruracushcataca ama ruranguichijchu. Caipica cada unomi paicunapaj ima alli ricurishcallata ruracuncuna.
9 Cancunaca maipi samarina lugarmanpish, cancunapaj Jehová Dios cugrishca herencia allpamanpish manaraj yaicushcanguichijchu.
10 Jordán jatun yacuta cancuna pasashpa cancunapaj Jehová Dios cugrishca herencia allpapi causacujpica paica tucui cancunapaj contracunamantami cuidanga. Chaimi cancunaca tranquilo causanguichij.
11 Tucui ñuca imata mandashcataca cancunapaj Jehová Dios paipaj shutita jatunyachingapaj agllashca lugarmanmi apana canguichij. Cancunapaj rupachishca ofrendacunata, cancunapaj sacrificiocunata, cancunapaj diezmocunata, cancunapaj shujtaj ofrendacunata, Jehová Diosman cusha nishca tucui ofrendacunatami apana canguichij.
12 Cancunaca Jehová Diospaj ñaupajpimi cushicunguichij. Cancunapish, cancunapaj churicunapish, cancunapaj ushushicunapish, cancunapaj esclavocunapish, cancunapaj esclavacunapish, cancunapaj llajtacunapi causaj levitacunapishmi cushicunguichij. Levitacunaca cancunahuanca ima herenciata mana japishcacunachu.
13 Cancunapaj rupachishca ofrendacunataca cancuna munashca shujtaj lugarpica ama cunguichijchu.
14 Cancunapaj rupachishca ofrendacunataca cancunapuramanta shuj familiapaj allpapi, Jehová Dios agllashca lugarllapimi cuna canguichij. Chaipimi tucui ñuca imalla nicushcataca rurana canguichij.
15 Ima hora aichata micusha nishpaca shuj animalta huañuchishpami aichataca micui tucunguichij. Cancunapaj Jehová Dios bendiciashca shinami cancunapaj tucui llajtacunapi chaitaca rurai tucunguichij. Mapa caj runapish, chuya caj runapish gacelata micuj shina, tarugata micuj shinami micui tucuncuna.
16 Pero yahuartaca amataj micunguichijchu. Chaitaca yacuta shinami pambapi tallina canguichij.
17 Cancunapaj llajtacunapica granocunatapish, llullu vinotapish, aceitetapish cada chungamanta shujta chꞌicanyachishcataca mana micui tucunguichijchu. Shinallataj cancunapaj huagracunamanta punta huacharishcacunatapish, cancunapaj ovejacunamanta punta huacharishcacunatapish, Diosman cusha nishca ofrendacunamanta ima ofrendatapish, shungumanta cushca ofrendacunatapish, shujtaj ofrendacunatapish mana micui tucunguichijchu.
18 Ashtahuanpish chaicunataca cancunapaj Jehová Dios agllashca lugarpimi cancunapaj Jehová Diospaj ñaupajpi micuna canguichij. Cancunapish, cancunapaj churicunapish, cancunapaj ushushicunapish, cancunapaj esclavocunapish, cancunapaj esclavacunapish, cancunapaj llajtapi causaj levitacunapishmi chaipi micuna canguichij. Tucui cancuna imata rurashcamantami Jehová Diospaj ñaupajpi cushicuna canguichij.
19 Cancunapaj allpapi causashcacamaca ñataj levitacunata cungaringuichijman.
20 Cancunapaj Jehová Dios pai ari nishca shina cancunapaj allpata mirachijpi, chai allpapi causacushpa ima hora aichata micusha nishpaca aichataca micui tucunguichijllami.
21 Cancunapaj Jehová Dios paipaj shutita jatunyachingapaj agllashca lugar carupi cajpica, ñuca mandashca shinami Jehová Dios cushca animaltaca huagrata cashpa, ovejata cashpa huañuchi tucunguichij. Chai animalcunataca cancunapaj llajtacunapimi ima hora micusha nishpaca micunalla canguichij.
22 Gacelata micuj shina, tarugata micuj shinami micui tucunguichij. Mapa caj runapish, chuya caj runapish micui tucunllami.
23 Shinapish yahuartaca amataj micunguichijchu. Causaica yahuarpimi can. Chaimanta yahuarhuan caj aichataca amataj micunguichijchu.
24 Yahuartaca ama micunguichijchu. Ashtahuanpish yacuta shinami pambapi tallina canguichij.
25 Cancunapish, cancunapaj huahuacunapish alli causangapajca yahuartaca ama micunguichijchu. Cancunaca Jehová Diospaj ñaupajpi ima alli cashcatami ruracunguichij.
26 Jehová Dios agllashca lugarman rishpaca cancuna cuna cashca, Diospajlla chꞌicanyachishca cosascunallata apanguichij. Diosman cusha nishca ofrendacunatapish apanguichij.
27 Chaipimi cancunapaj rupachishca ofrendacunataca aichatapish, yahuartapish cancunapaj Jehová Diospaj altarpi cuna canguichij. Cancunapaj sacrificiocunata shina cushca animalcunapaj yahuartaca cancunapaj Jehová Diospaj altar cꞌuchupimi tallina canguichij. Pero aichataca micui tucunguichijmi.
28 Ñuca imalla mandacushcataca tucuita cazuichij. Chashnami cancunapish, cancunapaj huahuacunapish siempre alli causanguichij. Cancunapaj Jehová Diospaj ñaupajpica ima alli cashcatami ruracunguichij.
29 Jehová Diosca cancuna japigrishca llajtacunapi causaj gentecunatami tucuchinga. Cancunaca paicunapaj allpapimi causanguichij.
30 Pero chai gentecunata cancunapaj ñaupajpi Dios tucuchishca qꞌuipaca paicuna urmashca trampapi ama urmangapaj cuidaringuichij. Paicunapaj dioscunamantaca: ‘¿Cai llajtacunamanta gentecunaca ima shinashi paicunapaj dioscunataca sirvijcuna carca? Ñucanchijpish chashnallataj rurashun’ ama ninguichijchu.
31 Cancunapaj Jehová Diostaca ama chashna sirvinguichijchu. Chai llajtacunamanta gentecunaca paicunapaj dioscunata sirvingapajca Jehová Dios pꞌiñashca tucui millanana cosascunatami rurancuna. Paicunapaj churicunatapish, ushushicunatapishmi paicunapaj dioscunaman cungapaj ninapi rupachincuna.
32 Tucui ñuca imata mandacushcata rurangapaj alli ricuraichij. Chaicunamantaca imata mana mirachinachu canguichij, imata mana anchuchinachu canguichij.
Notacuna
^ O “cada chungamanta shujta”.
