Deuteronomio 25:1-19
-
Mashna cutin macanamanta (1-3)
-
Trillacushpa huagrapi bozalta mana churanamanta (4)
-
Cuñadohuan cazaranamanta (5-10)
-
Macanacucushpa shuj runapaj charishca aichata japijpi castiganamanta (11, 12)
-
Cabalta pesaj pesascunamanta, cabalta midij canastacunamanta (13-16)
-
Amalequitacuna tucuchishca canamanta (17-19)
25 Ishqui runacuna paicunapura pꞌiñanacushpaca juezcunapaj ñaupajmanmi ri tucuncuna. Juezcunami paicunataca juzganga. Cashcata ruraj runataca mana culpayuj cashcatami ningacuna. Cutin millai runataca culpayuj cashcatami ningacuna.
2 Chai millai runata macana cajpica juezca urisinga sirichishpami paipaj ñaupajpi macachun mandanga. Chai runa yallitaj millaita rurashca cajpica achca cutinmi macangacuna. Pero mana tanto millaita rurashca cajpica ashallatami macangacuna.
3 Paitaca 40 cutinmi macai tucuncuna. Shujllahuanpish yallica mana macangacunachu. Ashtahuan macajpica cancunapaj huauquica cancunapaj ñaupajpimi pingaipi saquiringa.
4 Granota trillacushpaca huagrapi bozalta ama churangui.
5 Shuj runa paipaj huauquihuan tandalla causacujpi, paicunamanta shuj huauqui huahuacunata manaraj charishpa huañujpica, huañushca runapaj huarmica familiamanta mana caj runahuanca mana cazaranachu can. Ashtahuanpish cuñadomi chai huarmihuan cazarashpa pai rurana cashcata pajtachina can.
6 Chai huarmi huachashca punta churica huañushca huauquipaj shutitami apanga. Chashnami huañushca huauquipaj shutica Israel llajtamanta mana chingaringa.
7 Shinapish chai runa paipaj huañushca huauquipaj viuda huarmihuan mana cazarasha nijpica, chai huarmica llajta pungupi caj pushajcunapajmanmi* rina can. Paica: ‘Ñuca cusapaj huauquica Israel llajtapica paipaj huauquipaj shuti tiyashpa catichunca mana munanchu. Pai rurana cashcata mana pajtachishpami ñucahuanca mana cazarasha nin’ ningami.
8 Paipaj llajtamanta pushajcunami chai runata cayashpaca paihuan parlanacuna can. Chai runa ‘Paihuanca mana cazarasha ninichu’ nishpa catijpica
9 huauquipaj viuda huarmica pushajcunapaj ñaupajpimi chai runapajman cꞌuchuyana can. Chaimantaca chai runapaj sandaliata quichushpami ñahuipi chꞌucana can. Chai huashaca ‘Paipaj huauquipaj huasita mana shayachisha nij runataca cashnami rurana can’ ninami can.
10 Chai punllamantami Israel llajtapica chai runapaj familiataca: Sandaliata quichushca runapaj familia nishpa rijsingacuna.
11 Ishqui runa macanacucujpi, shuj runapaj huarmi paipaj cusata macacujpi jarcangapaj maquita chutashpa caishuj runapaj charishca aichata japijpica
12 maquitami utuna canguichij. Chai huarmimantaca mana llaquirinachu canguichij.
13 Cancunapaj bolsapica chꞌican chꞌican pesana ishqui rumicunataca mana charinachu canguichij. Shuj jatun rumita, shuj uchilla rumitaca mana charinachu canguichij.
14 Cancunapaj huasipica granota midina chꞌican chꞌican ishqui canastacunataca mana charinachu canguichij. Shuj jatun canastata, shuj uchilla canastataca mana charinachu canguichij.
15 Cancunapaj Jehová Dios cugrishca allpapi achca tiempota causangapajca cabalta pesaj, allita pesaj pesatami charina canguichij. Shinallataj cabalta midij, allita midij canastatami charina canguichij.
16 Cancunapaj Jehová Diosca cashcata mana ruraj runataca pꞌiñanmi.
17 Egipto llajtamanta cancuna llujshishpa ricujpi amalequitacuna ñanpi imata rurashcata yuyarichij.
18 Cancuna shaicushca cajpi, ña mana avanzacujpica cancunata ñanpi tupanaman llujshishpami huashaman saquirijcunataca tucuicunata llaquichircacuna. Paicunaca Diostaca mana mancharcacunachu.
19 Cancunapaj Jehová Diosca herenciata shina cugrishca allpa muyundijpi tiyaj cancunapaj contracunamanta quishpichishpami cancunataca samachinga. Cancunapaj Jehová Dios chashna samachijpica amalequitacunatami tucui allpamanta libri tucuchina canguichij. Paicunataca pi mana yuyaringachu. Chaitaca amataj cungaringuichijchu.
Notacuna
^ Hebreo rimaipica: “ancianocunapajmanmi” ninmi.
