Deuteronomio 32:1-52
32 Moisesca cashnami nirca: “Jahua pachacunalla, ñuca rimashcata uyaichij,allpapish ñuca nishca shimicunata uyapai.
2 Ñuca yachachishcacunaca tamya shinami urmanga,ñuca shimicunaca shulla shinami shutunga,qꞌuihuapi ñutu tamya urmaj shinami urmanga,chagrapi jatun tamya urmaj shinami urmanga.
3 Ñucaca Jehová Diospaj shutitami huillasha.
¡Ñucanchij Dios jatun cashcata rijsichichij!
4 Paica Jatun Rumimari, pai tucui imalla rurashcapish ima mana pandachu,paipaj ñancunapish alli ñancunami.
Paica pajtachij Diosmi, ima mana cashcataca mana nunca ruranchu.Paica cashcata ruraj, allita rurajmi.
5 Ashtahuanpish paicunami millaita rurashcacuna.
Paicunaca mana paipaj huahuacunachu, paicuna pandarishcamantaca paicunallatajmi culpayuj can.
¡Mana alli gentecuna, millai gentecunami!
6 Muspa, yuyai illaj gentecunalla,¿chashnachu Jehová Diostaca tratana canguichij?
¿Manachu paica cancunapaj Yaya? ¿Manachu paimanta causanguichij?¿Manachu cancunataca pai rurarca? ¿Manachu cancunataca shuj llajta cachun churarca?
7 Ñaupa punllacunata yuyarichij,chai huatacunapi ima tucushcata yuyaichij.
Cancunapaj yayata tapuichij, paica parlangallami.Cancunapaj yuyajcunata tapuichij, paicunaca huillangallami.
8 Jatun Diosca cada llajtaman herenciata cushpa,Adanpaj huahuacunata* caishujmanta chaishujmanta chꞌicanyachishpacaIsraelpaj huahuacuna mashna cashcata ricushpamicada llajtapaj lindecunata churarca.
9 Jehová Diospaj puebloca paipajmari.Jacobca paipaj herenciamari.
10 Paitaca chaquishca allpapimi tarirca.Sacha animalcuna huacashca uyarij, chushajlla chaquishca pambapimi tarirca.
Paita cuidangapajca paipaj muyundijpimi carca,paipaj ñahui lulunta shinami cuidarca.
11 Ima shinami shuj aguilaca paipaj tazin jahuapi muyurishpahuahua aguilacunata volanata yachachin,ima shinami alascunata chutashpa, huahua aguilacunata japishpapaipaj plumacunapi apan,
12 chashnallatajmi paitapish* Jehová Diosca pailla pusharca.Shujtaj llajtamanta diosca mana paihuan carcachu.
13 Paitaca allpa pachapi urcucunata mandachunmi churarca.Chaimantami allpapi pꞌucushca granocunata micurca.
Paimanca jatun pata rumimanta llujshichishca mieltami cararca.Pedernal jatun rumimanta llujshichishca aceitetami cararca.
14 Vaca lechemanta rurashca mantequillata, oveja lechetapishmi cararca.Alli ovejacunata,*Basanmanta carnerocunata, chivocunatami cararca.Alli trigotapishmi cararca.Canca uvamanta llujshichishca vinotami ubyarcangui.
15 Jesurún* gordoyashpaca paipaj dueñota mana cazushpami jaitarirca.
Jesurunlla, canca gordoyashcanguimi, racuyashcanguimi, huijsa pajtatami micushcangui.
Chai qꞌuipaca paica paita ruraj Diostami saquirca.Paita quishpichij Jatun Rumitamari pꞌiñarca.
16 Paicunaca shujtaj llajtamanta dioscunahuanmi paita pꞌiñachircacuna.Millanana cosascunahuanmi yallitaj pꞌiñachircacuna.
17 Paicunaca Diosman sacrificiocunata cunapaj randica demoniocunamanmi* curcacuna.Paicuna mana rijsishca dioscunaman,mushuj dioscunaman, cunanlla chayamushca dioscunaman,paicunapaj ñaupa yayacuna mana rijsishca dioscunamanmi sacrificiocunata curcacuna.
18 Canta ruraj Jatun Rumitamari cungarircangui.Canman causaita cuj Diostaca mana yuyarircanguichu.
19 Jehová Diosca chaita ricushpami paicunataca mana chasquirca.Paitaca paicunapaj churicuna, ushushicunami yallitaj pꞌiñachishca carca.
20 Chaimantami cashna nirca: ‘Paicunataca mana ayudashachu.*Paicunahuan ima tucujtami ricusha.
Paicunaca millai gentecuna,mana confiaipaj huahuacunami.
21 Paicunaca rurashcalla dioscunata adorashpami ñucata pꞌiñachishcacuna.Paicunapaj mana vali rurashcalla dioscunata adorashpami yallitaj pꞌiñachishcacuna.
Ñucapish mana ñuca pueblo cajcunahuanmi paicunataca pꞌiñachisha.Yuyai illaj llajtahuanmi yallitaj pꞌiñachisha.
22 Ñuca yallitaj pꞌiñarishcaca ninatami japichishca.Chai ninaca Pambana Jutcupi* ucujman cajtapishmi rupachinga.Allpatapish, chaipi pꞌucushca granocunatapishmi tucuchinga.Urcucunapaj ucu chaquicunatapishmi rupachinga.
23 Paicunapaj llaquicunataca ashtahuanmi mirachisha.Tucui ñuca flechacunatami paicunapi shitasha.
24 Yaricaimantami shaicuringacuna.Achca fiebremi paicunataca tucuchinga, paicunaca tucuimi tucuchishca cangacuna.
Paicunata canichunca sacha animalcunatapish,pambapi llucashpa purij venenoyuj animalcunatapishmi cachasha.
25 Huasi canllapica paicunapaj huahuacunataca espadahuanmi huañuchingacuna.Cutin huasi ucupica jovencunapish, solteracunapish,uchilla huahuacunapish, yuyaj cꞌaricunapishmiachca manchaihuan cangacuna.
26 Ñucaca: “Paicunataca caita chaitami cachasha.Gentecunaca paicunataca mana yuyaringacunachu” nimanmi carcani.
27 Pero contracuna imata ninatami mancharcani.Contracunaca pandatami yuyanman carcacuna.
Paicunaca: “Ñucanchij fuerzahuanmi mishashcanchij.Jehová Diosca chaitaca mana rurashcachu” ninmanmi carcacuna.
28 Israelitacunaca yuyai illaj* llajta,mana intindijcunami.
29 ¡Alli yachajcuna cashpachari alli canman! Tucui caicunapimi alli yuyanmancuna.
Ima shina tucurinatami yuyarinmancuna.
30 ¿Ima shinataj shuj runallaca mil israelitacunata catishpa llaquichingari?¿Ima shinataj ishqui runacunallaca diez mil israelitacunata catishpa llaquichingari?
Mana pudingacunachu. Paicunapaj Jatun Rumi saquijllapimi chaita rurai tucungacuna.Jehová Dios paicunapaj contracunaman entregajllapimi chaita rurai tucungacuna.
31 Ñucanchij Jatun Rumica mana paicunapaj jatun rumi shinachu.Chaitaca ñucanchij contracunapish yachanmi.
32 Chai gentecunapaj uva yuraca Sodoma llajtamanta uva yuracunami,Gomorra llajta chagracunamanta uva yuracunami.
Paicunapaj uvacunaca venenoyuj uvacunami.Paicunapaj uva racimocunapish jayaj racimocunami.
33 Paicunapaj vinoca culebracunapaj venenomi,huañuchij culebracunapaj* venenomi.
34 ¿Manachu caicunataca ñuca huaquichishpa charicuni?¿Manachu ñuca huaquichina cuartopi alli huaquichishpa charicuni?
35 Paicunapaj chaqui lluchcarichun agllashca tiempo chayajpimipaicunataca llaquichisha, castigasha.Paicunata llaquichina punllaca ñami cꞌuchuyamucun.Paicunaca ñallami achcata sufringacuna’ nircami.
36 Jehová Diosca paipaj pueblotaca juzgangami.Paita sirvijcunataca llaquingami.Fuerza illaj saquirijta ricushpa,mana difindiri tucujcunalla, debilcunalla saquirijta ricushpami llaquinga.
37 Chaimi paica cashna ninga: ‘¿Paicunapaj dioscunaca maipitajyari?¿Paicuna miticuna jatun rumica maipitajyari?
38 ¿Paicunapaj sacrificiocunamanta huirata micujcunaca maipitajyari?¿Paicunapaj vino ofrendata ubyajcunapish maipitajyari?
Paicuna shayarishpa cancunata ayudachun.
Paicuna cancunapaj miticuna cachun.
39 Cunanca ricuichij, ñucami Dios cani.Shujtaj dioscunaca mana tiyanchu, ñucallami Dios cani.
Ñucami huañuchini, ñucami causachini.
Ñucami chugrichini, ñucami alliyachisha.Ñuca maquimantaca ni pi mana quishpichi tucunchu.
40 Ñuca maquicunata huichiman alzashpami jurani.“Ñucaca huiñai huiñaitami causani”.
41 Ñuca achijnicuj espadata afilashpa,cashcata rurashpa juzgangapaj ñuca maquita allichishpacañuca contracunatami llaquichisha.Ñucata pꞌiñajcunatapishmi castigasha.
42 Ñuca flechacunataca yahuarhuanmi machachisha,huañushcacunapaj, prezu apashcacunapaj yahuarhuanmi machachisha.Ñuca espadaca aichatami micunga,contracunata pushajcunapaj umacunatami micunga’ ningami.
43 Tucui llajta gentecuna Diospaj pueblohuan cushicuichij.Paimi paita sirvijcunapaj yahuarmanta llaquichinga.Paipaj contracunataca llaquichingami.Paipaj pueblopaj allpamantapish juchacunata anchuchingami” nircami.
44 Chashnami Moisesca cai cantopi nishca tucui shimicunata israelitacunapaj ñaupajpi nirca. Paica Nunpaj churi Hosea* runandijmi chaita nirca.
45 Moisesca tucui israelitacunaman tucui cai shimicunata nishca qꞌuipaca
46 cashnami nirca: “Cunan ñuca cushca cai tucui advertenciacunata alli uyaichij. Cai Leypi nishca tucui shimicunata cancunapaj huahuacunapish cazuchun mandaichij.
47 Cai shimicunaca cancunapajca mana yanga shimicunallachu. Ashtahuanpish cai shimicunata cazushpaca causanguichijmi. Cancunaca cai shimicunata cazushpaca Jordán jatun yacuta pasashpa cancuna japigrishca allpapica achca tiempotami causanguichij” nircami.
48 Chai punllallatajmi Jehová Diosca Moiseshuan parlashpaca cashna nirca:
49 “Cai Abarimpi caj urcuman, Nebo urcuman huichiyai. Cai urcuca Moab allpapi, Jericó chꞌimbapurapimi can. Cai urcumantami israelitacunapaj cachun cugrishca Canaán allpataca ricungui.
50 Chai qꞌuipaca can huichiyagrishca urcupimi huañungui. Cambaj ñaupa yayacuna shinallatajmi pambashca cangui.* Ima shinami cambaj huauqui Aaronpish Hor shuti urcupi huañushpa paipaj ñaupa yayacuna shinallataj pambashca carca, chashnallatajmi canhuanpish tucunga.
51 Cancuna ishquica Zin nishca chaquishca pambapi, Cadés nishcapi, Meribá yacucuna cꞌuchupica israelitacunapurapica ñucataca mana cazurcanguichijchu. Israelitacunapaj ñaupajpipish ñucataca mana jatunyachircanguichijchu.
52 Israelitacunaman cugrishca allpamanca mana yaicunguichu. Chai allpataca carullamantami ricungui” nircami.
Notacuna
^ Caitaca “gentecunata” nishpapishmi traducishcacuna.
^ Caipica Jacobmantami parlacun.
^ Hebreo rimaipica: “ovejacunapaj huirata” ninmi.
^ “Jesurún” shutica ‘cashcata ruraj runa’ nisha ninmi. Cai shutica Israel llajta jatun cashcata ricuchingapajmi can.
^ “Demonio” shimita huasha diccionariopi ricui.
^ Hebreo rimaipica: “mana tigra ricushachu” ninmi.
^ O “Seolpi”. Cai shimica huañushcacuna samaricujta ricuchingapajllami can. “Seol” shimita huasha diccionariopi ricui.
^ Caitaca “consejocunata mana uyaj” nishpapishmi traducishcacuna.
^ O “cobracunapaj”. Cai culebracunaca Asia, África ladocunapimi causan. Achca venenotami charin.
^ Ñaupaca cai shutihuanmi Josuetaca rijsijcuna carca. Hosea shutica Hosaya shutipaj ashalla letracunami can. “Hosea” shutica ‘Jah quishpichishca’ nisha ninmi.
^ Hebreo rimaipica: “Cambaj pueblohuanmi tandanacungui” ninmi.