Efesios 2:1-22
2 Cancunapaj pandarishcacunamanta, cancunapaj juchacunamanta huañushca shina cajpipish Diosmi cancunamanca causaita curca.
2 Ñaupaca cai pacha* gentecunata catishpami juchata rurashpa causarcanguichij. Shinallataj cai pachata mandajpaj munaitami rurarcanguichij. Paica mana cazuj gentecunapaj yuyaicunatami mandacun. Chai yuyaica huaira shinami tucui ladocunapi can.
3 Ñaupaca ñucanchijpish tucuicunami chai gentecuna shinallataj causarcanchij. Chaimi ñucanchij aicha munashcallata rurashpa, ñucanchij yuyashcallata rurashpa causarcanchij. Shujtajcuna shinallatajmi ñucanchijpish huacharishca punllamanta Dios pꞌiñashca cana carcanchij.
4 Chashna cajpipish Diosca yallitaj llaquij cashcamantami ñucanchijtaca achcata cꞌuyarca.
5 Ñucanchij pandarishcacunamanta huañushca shina cajpipish Cristohuan tandalla cachunmi ñucanchijmanca causaita curca (Dios yallitaj llaquij cashcamantami cancunaca quishpichishca cashcanguichij).
6 Ashtahuanpish ñucanchijcuna Cristo Jesushuan shuj shinalla cashcamantami, Diosca Cristohuan tandalla causachun ñucanchijman causaita cushca. Shinallataj paihuan tandalla tiyarichunmi jahua pachapica ñucanchijman shuj lugarta cushca.
7 Diosca ñucanchijcuna Cristo Jesushuan shuj shinalla cashcamantami allicunata rurashpa shamuj punllacunapica* yallitaj llaquij cashcata ñucanchijman ricuchinga.
8 Dios yallitaj llaquij cashcata ricuchijllapimi cancunaca feta charishcamanta quishpirishcanguichij. Shinapish quishpiringapajca cancunaca imata mana rurarcanguichijchu. Ashtahuanpish Diosmi shuj regalota cuj shina cancunata quishpichirca.
9 Shinaca cancunapaj ruraicunamantaca mana quishpirishcanguichijchu. Chaimantami maijanpish mana jatun tucuna canguichij.
10 Diosmi ñucanchijtaca rurarca. Alli ruraicunata rurangapajmi Cristo Jesushuan shuj shinalla rurashca canchij. Chai alli ruraicunata rurachunmi Diosca ñaupamanta ñucanchijtaca agllarca.
11 Ñaupaca cancunaca shujtaj llajtamanta gentecunami carcanguichij. Chaitaca mana cungarinachu canguichij. Chaimantami runacunapaj maquihuan cuerpopi “circuncisionta rurachishca” gentecunaca cancunataca “circuncisionta mana rurachishcacunami canguichij” nincuna.
12 Chai tiempopica Cristota mana rijsircanguichijchu. Israel llajtamantapish chꞌicanyachishcami carcanguichij. Sumaj allicunata Dios cusha nishpa ari nishcacunapish mana cancunapajchu carca. Cancunaca cai pachapica esperanza illajmi causacurcanguichij. Diostapish mana rijsircanguichijchu.
13 Shinapish cunanca Cristo Jesushuanmi shuj shinalla canguichij. Ñaupaca Diosmantaca carupimi carcanguichij. Cunanca Cristopaj yahuarmantami Diospajman cꞌuchuyashcanguichij.
14 Cristomi ñucanchijmanca sumaj causaita cun. Paica ishqui grupo gentecunatami shujllapi tandachirca. Shinallataj ishquindij grupota chꞌicanyachij pircatami urmachirca.
15 Cristomi paipaj causaita cushpa Moisesman cushca leymantaca mandashcacunata, leycunatapish anchuchirca. Cai mandashcacunami ishquindij grupotaca chꞌicanyachirca. Chai qꞌuipami Cristoca paicunamanta shuj mushuj grupota rurarca. Cunanca ishquindij grupocunami Jesusta catijcuna can. Chashnami Cristoca paicunamanca sumaj causaita curca.
16 Shinallataj ishquindij grupo shuj cuerpolla tucuchunmi Cristoca llaquichina caspipi* huañurca. Chashnami Dioshuan alli tucuchun paica ishquindij grupota ayudarca.
17 Cristo shamushpaca sumaj causaimanta alli huillaicunatami huillarca. Chai alli huillaicunataca cancuna Diosmanta carupi cajcunamanpish, Diospaj cꞌuchullapi cajcunamanpishmi huillarca.
18 Pai huañushcamantami ishquindij grupo gentecunaca chai espiritullatataj chasquinchij. Chaimantami jahua pachapi caj Yayata mañai tucunchij.
19 Cunanca mana rijsishcacuna shina, shujtaj llajtamanta gentecuna shinaca ña mana canguichijchu. Ashtahuanpish jucha illajcunahuanmi chai llajtallamantataj canguichij. Diospaj familiapuramantapishmi canguichij.
20 Cancunaca apostolcunapaj, profetacunapaj pirca jahuapi huasichishcami canguichij. Chai pircapaj callaripi churashca rumica Cristo Jesusmi.
21 Paihuan shuj shinalla cashcamantami tucui huasica Jehová* Diospajlla chꞌicanyachishca huasi tucun. Cai huasipaj tucui partecunaca alli tandachishcami can.
22 Cancunapish Cristohuanmi shuj shinalla canguichij. Diosmi cancunatapish caishujcunahuan shuj huasillapi tandachishca. Chai huasipimi paica causan. Paipaj espiritupish chaipimi can.
Notacuna
^ “Cai pacha” shimita huasha diccionariopi ricui.
^ Griego rimaipica: “aión” ninmi. “Shamuj punlla” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ “Jehová” shutita huasha diccionariopi ricui.
