Filipenses 1:1-30
-
Pablo saludashcamanta (1, 2)
-
Pablo Diosta mañashpa pagui nishcamanta (3-11)
-
Problemacuna tiyajpipish alli huillaicunata ashtahuan huillashcamanta (12-20)
-
Cristopajmi causani, shinapish huañunami ashtahuan alli can nishcamanta (21-26)
-
Alli huillaicunata chasquishca shinallataj alli causaichij (27-30)
1 Cristo Jesusta sirvij Pablopish, Timoteopishmi Filipos llajtapi Cristo Jesushuan shuj shinalla caj jucha illajcunaman, ancianocunaman,* siervo ministerialcunaman* cai cartata cachanchij:
2 Ñucanchij Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
3 Cancunata yuyarishpaca siempremi ñuca Diosta pagui nini.
4 Diosta rogarishpa mañacushpaca tucui cancunamantami mañani. Chaitaca cushicushpami rurani.
5 Alli huillaicunata chasquishca punllamanta cunancama cancuna huillashpa ayudacushcamantami chashna mañani.
6 Diosmi cancunapi pai callarichishca alli obrataca tucuchinga. Chai obrataca Cristo Jesús shamuna punllacamami rurashpa catinga. Chaitaca seguromi cani.
7 Ñuca shungupi cancuna cashcamantami cancunamanta chashna yuyanaca ñucapajca alli can. Tucui cancunami carcelpi ñuca cajpipish, alli huillaicunata huillashpa catingapaj autoridadcunapaj ñaupajpi difindicujpipish ñucataca ayudarcanguichij. Chaimantami Diosca pai yallitaj llaquij cashcataca cancunamanpish, ñucamanpish ricuchishca.
8 Ñuca cancunata mashnata ricusha nicushcataca Diosca allimi yachan. Cancunataca Cristo Jesús cꞌuyashca shinallatajmi ñucapish cꞌuyani.
9 Cancunapaj cꞌuyai alli yachaihuan, alli yuyaihuan huiñashpa catichunmi Diosta mañani.
10 Shinallataj ashtahuan valij cashcacunallata cancuna agllachunmi Diosta mañani. Chashnami cancunaca tucuipi alli canguichij. Cristo shamuna punllacamapish shujtajcunata mana pandachinguichij.
11 Jesucristopaj ayudahuan ashtahuan ashtahuan allicunata ruraichij. Chashnami Diosta jatunyachinguichij, paita alabanguichij.
12 Huauquicuna, caita yachachunmi munani. Ñuca ima pasashcaca alli huillaicunata ashtahuan huillangapajmi ayudashca.
13 Cristota catij cashcamanta cai cadenacunahuan ñuca huatashca cashcatami Roma llajtata mandajta cuidajcunapish, shujtaj gentecunapish yachancuna.
14 Carcelpi ñuca cashcamantami Amitota sirvij achca huauquicunaca animarishcacuna. Paicunaca mana manchashpami Diospaj shimimantaca ashtahuan ashtahuan huillashpa caticuncuna.
15 Maijancunaca envidiallamanta, mishanacuna yuyaita charishcallamantami Cristomantaca huillacuncuna. Ashtahuanpish shujtajcunaca alli munaihuanmi huillacuncuna.
16 Alli munaihuan huillajcunaca cꞌuyaimantami Cristomanta huillacuncuna. Paicunaca alli huillaicunata huillangapaj ñucata Dios agllashcatami yachancuna.
17 Cutin envidiallamanta, mishanacuna yuyaita charishcallamanta huillajcunaca mana alli munaihuanmi huillacuncuna. Paicunaca carcelpi ñuca cajpi problemacunata rurangaraicullami chashna ruracuncuna.
18 ¿Chashna cajpipish imataj tucushca? Alli munaihuan, mana alli munaihuan chashna huillacujpipish gentecunaca Cristomanta huillashcatami uyacuncuna. Chaimantami cushicuni. Ashtahuanmi cushicushpa catisha.
19 Ñucaca Jesucristopaj espíritu ayudashcamanta, cancuna shungumanta Diosta mañashcamantapish quishpirina cashcatami yachani.
20 Imamantapish mana pingaipi saquirinatami shuyacuni. Chaitaca tucui shunguhuanmi munani. Shinapish mana manchashpa parlashcamantami ñaupaman rurashca shinallataj cunanpish Cristota jatunyachini. Paitaca causashpapish, huañushpapishmi jatunyachisha.
21 Ñuca causashpaca Cristopajmi causasha. Shinapish ñucapajca huañunami ashtahuan alli can.
22 Cai cuerpopi causanaraj cashpaca Cristopajca ashtahuanmi rurai tucusha. Shinapish imata agllanataca mana yachanichu.
23 Cai ishquimanta maijanta agllanaca ñucapajca sinchimi. Ñucaca Cristopajman rishpami paihuan casha nini. Chaimi ñucapajca ashtahuan alli can.
24 Ashtahuanpish ñuca cai aichapi causashpa catinami cancunapajca ashtahuan alli can.
25 Chaimantami ñuca causashpa catina cashcata yachani. Diosta cancuna ashtahuan sirvichun, crishcapipish cushicuchunmi tucui cancunahuan causashpa catisha.
26 Chashnami cutin cancunapajman ñuca tigrajpica Cristo Jesusta catijcuna cashcamanta cancunaca ashtahuan cushicunguichij.
27 Cristomanta alli huillaicunata huillajcuna shina alli causaichij. Chashnami cancunata ñuca visitanaman rijpipish o mana rijpipish cancunaca sinchi, shuj yuyailla, shuj shinalla canguichij. Shinallataj alli huillaicunapi crishpa catingapaj tucuicuna tandalla trabajanguichij.
28 Cancunata pꞌiñajcunataca ama manchaichijchu. Tucui caicunaca paicuna llaquichishca cana cashcata, shinallataj cancuna quishpirina cashcatami ricuchin. Chaica Diosmantami shamun.
29 Cancunaca Cristopi feta churana bendicionllataca mana chasquishcanguichijchu. Ashtahuanpish Cristomanta llaquita apana bendiciontapishmi chasquishcanguichij.
30 Cancunaca ñuca ima shina llaquicunata charishcatami ricurcanguichij. Chai shina llaquicunallatatajmi cancunapish apacunguichij. Shinapish cunancama cai llaquicunata ñuca apacushcatami cancunaca uyashcanguichij.
Notacuna
^ Caipica congregacionta pushaj huauquicunamantami parlacun. “Anciano” shimita huasha diccionariopi ricui.
^ “Siervo ministerial” shimita huasha diccionariopi ricui.
