Filipenses 3:1-21
3 Shinaca ñuca huauquicuna, Amitohuan shuj shinalla cashcamanta siempre cushicuichij. Cancunapaj allipaj cashcamantami chaillatataj cutin quillcanataca mana shaicuni.
2 Allcucunamanta cuidarichij, llaquichisha nijcunamanta cuidarichij, circuncisionta rurachichun nijcunamantapish cuidarichij.
3 Ñucanchijmi circuncisionta rurachishcacunataj canchij. Diospaj espíritu ayudajpimi ñucanchijca paita sirvicunchij. Cristo Jesús imata rurashcamantapishmi jatunyarinchij. Shinapish runacuna confiashcapica mana confianchijchu.
4 Ashtahuanpish tucuicunamantaca ñucami runacuna confiashcapica confiai tucuni.
Maijanpish runacuna confiashcapi jatunyarisha nijpica ñucami paitapish yalli jatunyarini:
5 ñucataca huacharishca pusaj punllacunapimi circuncisionta rurachircacuna. Ñucaca Israel llajtamantami cani. Benjaminpaj familiamantami cani. Ñuca yaya mamaca hebreocunami can. Chaimi ñucapish hebreo cani. Fariseo cashcamantapish leypi nishcataca tucuitami pajtachircani.
6 Huauqui panicunatapish catirashpami yallitaj llaquichircani. Leypi nishca shina cashcata rurashpami ima culpata mana charishcata ricuchircani.
7 Shinapish ñucapaj valishca cashcacunataca Cristomantami cunanca imapaj mana valishcata shina ricuni.
8 Ñuca Amito Jesusmanta yachashcacuna achca valishca cashcamantami tucui chaicunataca imapaj mana valishcata shina ricuni. Paimantami tucui chaicunataca saquishcani. Cristohuan shuj shinalla cangapajmi chaicunataca basurata shina ricuni.
9 Chashnami ñucataca Cristohuan shuj shinalla cashcata ricungacuna. Shinapish Leypi nishcata pajtachishcallamantaca cashcata rurajca mana canichu. Ashtahuanpish Cristopi feta charishcamantami cashcata ruraj nishca cani. Diosca feta charijcunatami cashcata rurajcunata shina ricun.
10 Ñucaca Cristota rijsinatapish, huañushcacunapaj chaupimanta paita causachij podertapishmi rijsinata munani. Pai shinallataj llaquicunata apashpami pai shinallataj huañusha nini.
11 Huañushcacunapaj chaupimanta punta causarijcunapurapi causarishapishchari yuyashpami caitaca tucui shunguhuan ruracuni.
12 Premiotaca manaraj japishcanichu. Jucha illajpish manaraj canichu. Shinapish chai premiota japingapajmi tucui avanzarishcata ruracuni. Cristo Jesusca chaipajmi ñucataca agllarca.
13 Huauquicuna, premiota ña japishcataca mana yuyanichu. Ashtahuanpish caitami ruracuni: huashaman saquishcacunata tucui cungarishpami shamuj punllacunapi ima japina cashcata chasquingapaj esforzaricuni.
14 Ñucaca Dios cusha nishca premiota japingapajmi callpacuni. Chai premioca jahua pachapi causanami can. Diosca Cristo Jesusmantami pai cayashcacunamanca chai premiota cunga.
15 Chaimanta sinchi cajcunaca chai yuyaillatataj catishunchij. Shinapish cancuna shujtaj shina yuyajpica Diosllatajmi alli yuyachun ayudanga.
16 Shinaca mashnata sinchiyashca cashpapish chai ñanllapitaj allita rurashpa catishunchij.
17 Huauquicuna, ñuca ima shina rurashca shinallataj cancunapish ruraichij. Shujtajcuna ñucanchij ejemplota ima shina caticujtapish ricuichij.
18 Achcacunami llaquichina caspipi* Cristo huañushcataca mana valichincuna. Ñaupaca paicunamantaca allimi parlaj carcani. Shinapish cunanca paicunamantaca huacashpami parlani.
19 Paicunaca huañuipimi chingaringacuna. Paicunapaj diosca quiquin aicha munaicunallami.* Paicunaca pinganayaj ruraicunata rurashpami jatun tucuncuna. Shinallataj cai pachapi tiyashcacunallapimi yuyancuna.
20 Ashtahuanpish ñucanchij causanaca jahua pachapimi. Chaimantami jahua pachamanta shuj quishpichijta shuyacunchij. Paica Amito Jesucristomi.
21 Paica paipaj jatun poderhuanmi tucuita mandanga. Chai poderllahuantajmi paipaj sumaj cuerpo shinallataj cachun ñucanchij yanga cuerpotapish cambianga.
Notacuna
^ “Llaquichina caspi” shimita huasha diccionariopi ricui.
^ Griego rimaipica: “quiquin huijsami” ninmi.
