Hechos 1:1-26
1 Cꞌuyashca Teófilo, punta libropi canman quillcashpaca Jesús tucui imalla rurashcata, imalla yachachishcata,
2 paita jahua pachaman Dios pushashca punllacamami quillcarcani. Jesusca espíritu santo ayudajpimi pai agllashca apostolcunamanca imalla ruranata yachachirca. Chai huashami paica jahua pachaman pushashca carca.
3 Jesusca huañungacama llaquita apashca qꞌuipami achca cutin paicunapaj ñaupajpi ricurirca. Pai ciertotaj causacushcata yachachunmi chashna ricurirca. Paicunaca 40 punllacunatami paita ricurcacuna. Jesusca Diospaj Gobiernomantami paicunamanca parlarca.
4 Paicunahuan tandalla cashpaca cashnami mandarca: “Jerusalenmantaca ama ringuichijchu. Ashtahuanpish ñuca parlashca shina Yaya cusha nishcataca shuyashpa catichijlla.
5 Juanca yacuhuanmi bautizarca. Ashtahuanpish cancunaca asha punllacuna qꞌuipaca espíritu santohuanmi bautizashca canguichij” nircami.
6 Paicuna tandanacushpaca: “Amito, ¿cunan tiempollatajchu Israel llajtapaj gobiernotaca cutin churagringui?” nishpami Jesusta tapurcacuna.
7 Chashna tapujpimi Jesusca: “Jahua pacha Yayallami ima hora, ima punlla caicuna pajtarina cashcata ricuchingapajca autoridadta charin. Cancunaca chai tiempomantaca mana yachanata minishtinguichijchu.
8 Ashtahuanpish espíritu santo* cancunapaj jahuaman shamujpimi poderta chasquinguichij. Chashna cashpami Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij”* nirca.
9 Chaita nishca qꞌuipami Jesusca paita catijcuna ricucujpi jahua pachaman huichiyarca. Pꞌuyu tapajpimi paicunaca ña mana ricui tucurcacuna.
10 Jesús jahua pachaman huichiyacujta paicuna ricucujpimi yurajlla churanata churarishca ishqui runacunaca ñapish paicunapaj ladopi ricurirca.
11 Chashna ricurishpami paicunaca: “Galileamanta runacuna, ¿imamantataj jahua pachata ricurashpa shayacunguichij? Cancunahuan caj Jesusca jahua pachamanmi rirca. Ima shinami jahua pachaman rijta ricurcanguichij chashnallatajmi paica shamunga” nircacuna.
12 Chai qꞌuipaca Olivos yuracuna tiyan urcumantami paicunaca Jerusalenman tigramurcacuna. Cai urcuca Jerusalenmantaca mana carupichu carca, casi shuj kilometrollapimi* saquirij carca.
13 Chaiman chayashpaca paicuna saquiricushca jahua cuartomanmi huichiyarcacuna. Chaipica Pedro, Juan, Santiago, Andrés, Felipe, Tomás, Bartolomé, Mateo, Alfeopaj churi Santiago, Cushicuihuan ruraj Simón, Santiagopaj churi Judaspishmi carcacuna.
14 Paicunaca tucuicunami shuj yuyailla tucushpa Jesuspaj mama Mariahuan, Jesuspaj huauquicunahuan, shujtaj huarmicunahuanpish Diosta mañarashpa caticurcacuna.
15 Chai punllacunapica casi 120 huauqui panicunami tandanacushca carcacuna. Chaipimi Pedroca paicunapaj chaupipi shayarishpa cashna nirca:
16 “Huauquicuna, Dios quillcachishca shimicunaca pajtarinatajmi carca. Espíritu santo ayudajpimi Davidca Judas ima tucuna cashcata huillarca. Paimi Jesusta japij runacunataca Jesuspajman pushashpa rirca.
17 Paica ñucanchijpuramantami carca. Ñucanchijhuan tandalla Diosta sirvingapaj agllashcami carca.
18 (Cai runaca millaita rurashcamanta paiman pagashca cullquihuanmi shuj allpata randirca. Qꞌuipaca de corona urmajpimi paipaj cuerpo tujyashpa* tripacunapish libri tallirirca.
19 Chashna tucushcataca Jerusalenpi causajcunaca tucuicunami yachaj chayarcacuna. Chaimantami chai allpataca paicunapaj rimaipica Akéldama nishpa shutichircacuna. Akéldama shimica ‘Yahuarhuan randishca allpa’ nisha ninmi).
20 Salmos libropi quillcashcapica: ‘Paipaj huasica shitashca saquirichun, chaipica ni pi ama causachun’. Shinallataj ‘Paiman mingashca trabajotapish* shujtaj runa rurachun’ ninmi.
21 Chaimantami paipaj randica ñucanchijhuan purijcunamanta shuj runata agllana canchij. Ñucanchijhuan purijcunaca Amito Jesús tucui tiempo ñucanchijpurapi cashpa imata rurajpipish* ñucanchijhuanmi carcacuna.
22 Jesusta Juan bautizashca punllamanta, paita jahua pachaman pushangacamami paicunaca ñucanchijhuan carca. Chaimantami paicunapuramanta shujtaca Jesús causarishcata ñucanchijhuan huillaj cachun minishtinchij” nirca.
23 Chashna nishca qꞌuipami paicunaca ishqui runacunata agllarcacuna: Barsabás nishca Joseta, paitaca Justo nishpapishmi rijsijcuna carca. Matiastapishmi agllarcacuna.
24 Chai huashami paicunaca Diosta mañashpa cashna nircacuna: “Ñucanchij Jehová* Dioslla, canca tucuicunapaj shungupi ima tiyashcatami yachangui. Cai ishqui runacunamanta maijanta can agllashcata ricuchihuai.
25 Judaspaj randi apóstol cachun, canta sirvichunpish maijanta agllashcata ricuchihuai. Judasca paipaj munaita rurangapajmi paiman mingashca trabajota shitashpa saquirca” nircacunami.
26 Chashna mañashca qꞌuipa sorteajpica Matiaspajmi chai suerteca urmarca. Chaimi paica 11 apostolcunahuan tandanacurca.*
Notacuna
^ “Espíritu santo” shimita huasha diccionariopi ricui.
^ O “ñuca testigocuna canguichij”.
^ Griego rimaipica: “sábado punllapi purina shinapimi” ninmi. Judiocunaca casi shuj kilometrollatami sabadopica purina carcacuna.
^ O “ishquipi chaupirishpa”.
^ Caipica paipaj randi congregacionta cuidanamanta, ricunamantami parlacun.
^ Griego rimaipica: “llujshijpipish, yaicujpipish” ninmi.
^ “Jehová” shutita huasha diccionariopi ricui.
^ Paitaca caishuj 11 apostolcunata shinami chasquircacuna.
