Hechos 16:1-40
-
Pabloca Timoteotami agllarca (1-5)
-
Macedonia llajta runata muscuipi shina ricushcamanta (6-10)
-
Filipos llajtamanta Lidia shuti huarmica Jesusta catijmi tucurca (11-15)
-
Pablotapish, Silastapish carcelpi churashcamanta (16-24)
-
Carcelta cuidajpish, paipaj huasipi cajcunapishmi bautizarircacuna (25-34)
-
Autoridadcuna Pablota disculpahuai nishpa rogarinaman rishcamanta (35-40)
16 Chaimantaca Pabloca Derbe llajtaman, qꞌuipaca Listra llajtamanmi chayarca. Listra llajtapica Jesusta catij Timoteo shuti jovenmi causarca. Paica Jesusta catij judía huarmipaj churimi carca. Cutin paipaj yayaca griegomi carca.
2 Listramanta, Iconiomanta huauquicunaca Timoteomantaca allicunatami parlajcuna carca.
3 Chaimantami Pabloca Timoteota paihuan pushasha nirca. Chai llajtacunapica tucui judiocunami Timoteopaj yaya griego cashcata yacharcacuna. Chai judiocunamantami Pabloca Timoteota pushashpa circuncisionta* rurarca.
4 Paicunaca llajtan llajtan ricushpami apostolcuna, ancianocuna* Jerusalenpi imata decidishcata cazuchun huauqui panicunaman huillashpa rircacuna.
5 Chaimantami congregacioncunapi huauqui panicunaca crishcapi sinchiyarishpa, punllanta mirarishpa catircacuna.
6 Asia llajtapi Diospaj shimita espíritu santo huillachun mana saquijpimi paicunaca Frigia, Galacia llajtacunatapish pasashpa rircacuna.
7 Ashtahuanpish Misia llajtaman chayashpaca Bitinia llajtamanmi yaicushun nircacuna. Shinapish Jesuspaj espiritumi* chai llajtaman yaicuchunca mana saquirca.
8 Chaimantaca Misia llajtata pasashpami Troas llajtaman uriyarcacuna.
9 Chai tutami Pabloca muscuipi shina Macedoniamanta* shuj runa: “Macedoniaman shamui, ñucanchijta ayudai” nishpa paipaj ñaupajpi rogacujta ricurca.
10 Muscuipi shina Pablo ricushca huashami alli huillaicunata chai llajtapi huillachun Dios ñucanchijta cayashcata intindishpa Macedonia llajtaman ri callarircanchij.
11 Chaimi Troasmantaca barcopi huichiyashpa Samotracia llajtaman chayajta rircanchij. Cutin cayandij punllaca Neápolis llajtamanmi rircanchij.
12 Chaimantaca Filipos llajtamanmi rircanchij. Chai llajtaca romanocunapaj llajtami carca. Filipos llajtaca Macedoniapi saquirij llajtacunamanta ashtahuan importante llajtami carca. Chaipimi asha punllacunata saquirircanchij.
13 Sábado punllataca chai llajtapaj punguta llujshishpami shuj jatun yacu cꞌuchuman rircanchij. Chai yacu cꞌuchupi Diosta mañangapaj gentecuna tandanacuj cashcatami uyarcanchij. Ñucanchijpish chaipi tiyarishpami, chaipi tandanacushca huarmicunahuan parlanacui callarircanchij.
14 Paicunapurapica Tiatira llajtamanta Diosta adoraj Lidia shuti huarmimi uyacurca. Paica morado telacunata, morado churanacunatapish cꞌatujmi carca. Pablo ima nicushcata alli uyachunmi Jehová* Diosca chai huarmita ayudarca.*
15 Lidiapish, paipaj huasipi cajcunapish bautizarishca* qꞌuipami Lidiaca: “Jehová* Diosta tucui shunguhuan ñuca sirvicujta cancuna ricushpaca, ñuca huasipi saquirinaman shamupaichij” nishpa rogarca. Chashna rogacujllapimi ñucanchijca paipaj huasipi saquirircanchij.
16 Shuj punllaca Diosta mañangapaj gentecuna maipimi tandanacun chaimanmi ricurcanchij. Chaipimi adivinachij millai espíritu japishca shuj sirvij huarmi huambrahuan tuparcanchij. Paica shamuj punllacunapi ima tucunata huillashpami paipaj amocunapajca achcata ganaj carca.
17 Chai huarmi huambraca Pablotapish, ñucanchijtapishmi cati callarirca. Paica: “Cai runacunaca Jatun Diosta sirvijcunami. Paicunaca quishpirina ñanmantami cancunamanca huillacun” nishpami caparirca.
18 Achca punllacunatami chai huambraca chashna caparishpa purirca. Chaimi Pabloca ña mana ashtahuan uyasha nishpa tigrarishpaca, chai millai espiritutaca: “Jesucristopaj shutipimi paimanta llujshichun mandani” nirca. Shina nijpimi ñapish millai espirituca chai huambramanta llujshirca.
19 Chai huambrapaj amocunaca cullquita japina tucurishcata ricushpami Pablotapish, Silastapish japishpa sirij sirijta plazacama aisashpa, mandajcunapaj ñaupajpi churarcacuna.
20 Chai llajtata mandajcunapaj* ñaupajpi churashpami cashna nishpa juchachircacuna: “Cai runacunaca ñucanchij llajta gentecunatami yallitaj pandachicuncuna. Paicunaca judiocunami can,
21 ñucanchijca romanocunami canchij. Paicuna yachachishca costumbrecunata chasquinapish, ruranapish ñucanchijpajca mana allichu” nircacuna.
22 Shina nijta uyashpami gentecunapish pꞌiñarishpa paicunapaj contra jatarircacuna. Chaimantami chai llajtata mandajcunaca Pablopaj, Silaspaj churanacunata lliquishpa, qꞌuipaca varacunahuan macachun mandarcacuna.
23 Paicunata achcata macashca qꞌuipami carcelpi churarcacuna. Chashna churashpami carcelta cuidajtapish paicunata alli cuidachun mandarcacuna.
24 Chashna mandajpimi carcelta cuidajca, cárcel ucujman caj cuartopi churashpa, paicunapaj chaquicunatapish jutcushca tablacunapi* canichirca.
25 Chaupi tuta shina cajpimi Pablopish, Silaspish Diosta mañashpa, cantocunahuan Diosta alabacurcacuna. Chaitaca carcelpi cajcunapishmi uyacurcacuna.
26 Chashna mañashpa cantacujpica, ñapishmi shuj jatun terremoto shamushpa tucui cárcel ucuta cuyuchirca. Chashna tucujpimi tucui pungucunapish chai rato pascarirca. Huatashca cadenacunapish tucuicunamantami cacharirirca.
27 Carcelta cuidaj rijcharishpaca, cárcel pungucuna pascashcatami ricurca. Chaimi paica carcelpi cajcuna llujshishpa rishcata yuyashpa, paipaj espadata llujshichishpaca paillataj huañuchirinata munarca.
28 Shinapish Pabloca sinchita caparishpami: “¡Ama chaita rurarichu! ¡Tucuicunami caipi canchij!” nirca.
29 Chaimi carcelta cuidajca lamparacunata cuchun mañashpa, cárcel ucujman caj cuartocama callpashpa rirca. Chaiman chayashpaca Pablopaj, Silaspaj ñaupajpimi chujchushpa cungurirca.
30 Chai qꞌuipami paicunata chai ucumanta llujshichishpaca: “Amitocuna, ¿quishpiringapajca imatataj rurana cani?” nishpa tapurca.
31 Chashna tapujpimi paicunaca: “Amito Jesuspi cri. Chashnami canpish, cambaj huasipi cajcunapish quishpiringuichij” nircacuna.
32 Chai qꞌuipaca carcelta cuidajmanpish, paipaj huasipi cajcunamanpishmi Jehová* Diospaj shimimanta huillarcacuna.
33 Chai tutallatajmi carcelta cuidajca Pablotapish, Silastapish pushashpa paicunapaj chugricunata maillarca. Chai huashami paipish, paipaj huasipi cajcunapish bautizarircacuna.
34 Bautizarishca qꞌuipami paica paipaj huasiman pushashpa paicunamanca micunata cararca. Cunanca Diospi crishcamantami paipish, paipaj huasipi cajcunapish yallitaj cushicurcacuna.
35 Ña pacarijpimi chai llajtata mandajcunaca: “Chai runacunata cacharishpa cachailla” nichun guardiacunata carcelta cuidajpajman cacharcacuna.
36 Chashna nishcatami carcelta cuidajca Pabloman huillarca. Paica: “Cai llajtata mandajcunaca cancuna ishquita cacharichichun nishpa huillachunmi guardiacunata cachashcacuna. Chaimanta cunanca llujshishpa, tranquilo ripaichijlla” nircami.
37 Chaimi Pabloca chai guardiacunataca: “Ñucanchijcuna Roma llajtamanta cajpipish manaraj juzgashpami tucuicunapaj ñaupajpi macashpa carcelpi churarcacuna. ¿Chashna jahuachu cunanca ñucanchijtaca pacalla llujshichishpa cachashun nincuna? ¡Mana rishunchu! Cunanca paicunallataj shamushpa ñucanchijtaca llujshichichun” nirca.
38 Guardiacunaca Pablo imata nishcatami chai llajtata mandajcunamanca huillarcacuna. Paicunaca chai runacuna Roma llajtamanta cashcata yachashpami achcata mancharircacuna.
39 Chaimantami Pablotapish, Silastapish disculpaichij ninaman rircacuna. Chai qꞌuipami carcelmanta llujshichishpa, paicunataca chai llajtamanta richun mañarcacuna.
40 Shinapish carcelmanta llujshishpaca Pablopish, Silaspish Lidiapaj huasimanmi rircacuna. Paicunaca huauquicunata* ricushpaca achcatami animarcacuna. Chai huashaca rircallacunami.
Notacuna
^ “Circuncisión” shimita huasha diccionariopi ricui.
^ Caipica congregacionta pushaj huauquicunamantami parlacun. “Anciano” shimita huasha diccionariopi ricui.
^ Cai espiritutami Jesusca Diosmanta chasquirca.
^ “Macedonia” shimita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “chai huarmipaj shunguta tucui pascarca” ninmi.
^ “Bautizana” shimita huasha diccionariopi ricui.
^ “Jehová” shutita huasha diccionariopi ricui.
^ “Llajtata mandajcuna” shimita huasha diccionariopi ricui.
^ O “cepo nishcapi”. “Cepo” shimita huasha diccionariopi ricui.
^ “Jehová” shutita huasha diccionariopi ricui.
^ Bibliapica huauquicuna nishpaca huaquinpica panicunamantapishmi parlacun.
