Hechos 19:1-41
19 Corinto llajtapi Apolos cajpimi Pabloca Asia llajta urcucunata pasashpa Éfeso llajtaman uriyarca. Chaipimi Jesusta catij huaquin runacunahuan tupashpa
2 paicunataca: “¿Jesusta catijcuna tucushpaca espíritu santota chasquircanguichijchu?” nishpa tapurca. Chaimi paicunaca: “Ñucanchijca espíritu santo tiyashcataca nunca mana uyashcanchijchu” nishpa cutichircacuna.
3 Chaimi Pabloca: “Shinaca ¿ima bautismotataj chasquircanguichijyari?” nirca. Chashna nijpimi paicunaca: “Juanpaj bautismota” nircacuna.
4 Paicuna shina nijpimi Pabloca: “Juanca paicuna arrepintirishcata ricuchichunmi gentecunataca bautizaj carca. Shinallataj gentecunamanca paipaj qꞌuipa shamuj Jesuspi crichunmi huillaj carca” nirca.
5 Chaita uyashpami paicunaca Amito Jesuspaj shutipi bautizarircacuna.
6 Paicunapaj jahuapi Pablo paipaj maquicunata churajpimi espíritu santota chasquircacuna. Chaimantami chꞌican chꞌican rimaicunapi parlai callarishpa, Dios ima nishcatapish huillai callarircacuna.
7 Paicunaca 12 cꞌaricunami carca.
8 Chaimantaca sinagogaman* yaicushpami Pabloca mana manchashpa quimsa quillacunata chaipi parlarca. Paica Diospaj Gobiernomanta yachachishpami paicuna intindichun ayudarca.
9 Ashtahuanpish maijancunaca rumi shungu tucushpami mana crishun nircacuna. Diospaj Ñanmantapish mana allita nishpami gentecunapaj ñaupajpi rimajcuna carca. Chaimantami Pabloca paicunata chaipi saquishpa, Jesusta catijcunataca Tiranopaj yachana huasiman pushashpa punllanta chaipi yachachij carca.
10 Chashnami Pabloca ishqui huatacunata chai yachana huasipi yachachij carca. Chaimantami Asia llajtapi causajcunaca judiocuna cashpapish, griegocuna cashpapish tucuicuna Diospaj* shimitaca uyarcacuna.
11 Pabloca Dios ayudajpimi jatun milagrocunata rurashpa catirca.
12 Chaimi gentecunaca Pablo churashca pañuelocunata, delantalcunatapish japishpa ungushcacunapajman apajcuna carca. Chashna rurajpimi ungushcacunaca alliyarcacuna, millai espiritucunapish paicunamanta llujshircacuna.
13 Shinapish chꞌican chꞌican ladocunata rishpa demoniocunata* llujshichishpa purij huaquin judiocunapishmi, Amito Jesuspaj shutipi demoniocuna japishca runacunamanta millai espiritucunata llujshichishun nircacuna. Chaimi paicunaca: “Pablo huillacushca Jesuspaj shutipimi cancunataca llujshichun mandani” nijcuna carca.
14 Chashna rurajcunaca Esceva shuti judiopaj canchis churicunami carca. Chai runaca sacerdotecunata mandajmi carca.
15 Shinapish shuj millai espirituca: “Jesustaca rijsinimi, Pablo pi cashcatapish yachanimi. Ashtahuanpish ¿cancunaca picunataj canguichijyari?” nishpami cutichirca.
16 Chai qꞌuipami millai espíritu japishca runaca paicunahuan macanacushpa tucuicunata misharca. Chaimi paicunaca chugririshca, lluchulla chai huasimantaca callpashpa rircacuna.
17 Chashna tucushcataca Éfeso llajtapi causaj judiocunapish, griegocunapish tucuicunami yachaj chayarcacuna. Chaimantami tucuicuna yallitaj mancharishca saquirircacuna. Amito Jesuspaj shutitapish gentecunaca ashtahuanmi jatunyachishpa catircacuna.
18 Shinallataj Jesusta catij tucujcunaca achcacunami paicunapaj juchacunata, mana alli ruraicunatapish tucuita huillarcacuna.
19 Magiata rurashpa ñaupa causajcunapish achcacunami paicunapaj librocunata tandachishpa tucuicunapaj ñaupajpi rupachircacuna. Chai rupachishca librocuna mashna valishcata yupajpica 50.000 moneda cullquimi valishca carca.
20 Chashnami Jehová* Diospaj shimica paipaj podermanta tucui ladocunaman chayarca. Shinallataj achca jarcaicunatami misharca.
21 Tucui chaicuna pasashca qꞌuipami Pabloca Macedonia llajtata, Acaya llajtatapish pasashpa Jerusalenman rinata yuyarirca. Ashtahuanpish paica: “Jerusalenman rishca qꞌuipaca Roma llajtamanpishmi rina cani” nircami.
22 Chaimi Macedonia llajtamanca paita ayudajcunamanta ishqui runacunata cacharca. Paicunaca Timoteo shuti, Erasto shutimi carcacuna. Cutin Pabloca Asia llajtapimi asha tiempota saquirirca.
23 Chai punllacunapica Diospaj Ñanpi purijcunapaj contra jatarijcunami tiyarca.
24 Paicunapurapica Demetrio shuti runami carca. Paica Ártemis* diosta adorana huasita shinami uchilla huasicunata cullquimanta ruraj carca. Chashnami pai shinallataj trabajaj runacunamanca achca cullquita ganachij carca.
25 Chaimi Demetrio runaca pai shinallataj trabajajcunatapish, cullquihuan trabajaj shujtaj runacunatapish tandachishpa cashna nirca: “Amigocuna, cashna trabajashpami ñucanchijca cullquita japinchij. Chaitaca cancunaca allimi yachanguichij.
26 Cunanca cancunallatajmi uyanguichij, ricunguichij mana Éfeso llajtallapichu, ashtahuanpish casi tucui Asia llajtapimi chai Pabloca maquihuan rurashca dioscunaca yanga dioscunallami nishpa yachachicun. Achca gentecunamari pai nishcataca crishcacuna.
27 Chaica mana allichu. Gentecunaca ñucanchij negociomantami mana allita nishpa rimangacuna. Ártemis jatun diospaj huasitapish yangata shinami ricungacuna. Tucui Asia llajtapi, tucui cai pachapi causajcunapishmi Ártemis diostaca adorancuna. Shinapish Pablo chaicunata nishcamantami paitaca ña mana jatunyachingacuna” nircami.
28 Chaita uyashpami chai runacunaca achcata pꞌiñarishpaca: “¡Efesopi causajcunapaj Ártemis diosca jatunmari!” nishpa capari callarircacuna.
29 Chashnami chai llajta gentecuna jatarishpaca tucuicuna tandanacushpa Pablohuan purij Gayotapish, Aristarcotapish sirij sirijta aisashpa teatro* ucuman callpashpa yaicurcacuna. Gayopish, Aristarcopish Macedoniamantami carcacuna.
30 Pablopishmi chai gentecunahuan parlangapaj teatro ucuman yaicusha nirca. Shinapish Jesusta catijcunaca mana saquircacunachu.
31 Fiestacunata, pugllaicunata rurangapaj huaquin agllashca runacunapishmi teatroman ama yaicuchun huillanaman cacharcacuna. Chai runacunaca Pablopaj amigocunami carca.
32 Chaicamaca tandanacushca gentecunaca musparishpami shujcunaca shujta, caishujcunaca shujtajta nishpa caparicurcacuna. Achcacunacarin imamanta tandanacushcataca mana yacharcacunachu.
33 Chashna tucucujpimi judiocunaca ñaupajman pasachun Alejandrotaca tꞌangashcacuna carca. Chaimi maijancunaca Alejandrotaca parlachun mañarcacuna. Chashna parlachun mañajpimi Alejandroca ima tucucushcata huillasha nishpa maquihuan señasta rurarca.
34 Ashtahuanpish chaipi cajcunaca Alejandro runa judío cashcata cuentata cushpami tucuicunallataj: “¡Efesopi causajcunapaj Ártemis diosca jatunmari!” nishpa ishqui horasta caparircacuna.
35 Chai llajtapi mandaj alcaldemi tucuicunata upallachishpaca cashna nirca: “Éfeso llajtapi causaj runacunalla, ¿Ártemis diospaj jatun huasitapish, paiman rijchaj jahua pachamanta urmashcatapish ñucanchijcuna cuidaj cashcataca manachu tucuicuna yachan?
36 Chaitaca ni pi mana negai tucunchu. Chaimanta tranquilo caichij, mana alli yuyarishpaca ama imatapish ruraichijchu.
37 Cancunaca yangamantami cai runacunataca caiman pushamushcanguichij. Paicunaca dioscunapaj huasicunata shuhuajcunaca mana canchu. Shinallataj ñucanchij Ártemis diostapish mana cꞌamishcacunachu.
38 Demetrio runa pita juchachisha nijpi, cullquihuan trabajaj caishuj runacunapish pita juchachisha nijpica ñucanchijca tribunalcunatami charinchij. Llajtata mandajcunapish* tiyanmi. Chaicunapajman rishpa caishujmanta chaishujmanta juchachinacugrichun.
39 Shinapish cancuna imata ashtahuan mashcacushpaca tucuicuna tandanacushpami leypi nishca shina allichina canchij.
40 Cai punlla ima tucushcamantaca ñucanchijca llaquipimi urmashun. Cai gentecuna imamanta bullata ruracushcataca mana ricuchi tucunchijchu. Ashtahuanpish ñucanchijtaca gobiernopaj contra jataricushcatami juchachingacuna” nircami.
41 Chashna nishca qꞌuipami mandaj alcaldeca tandanacushca gentecunataca chaimanta cacharca.
Notacuna
^ O “tandanacuna huasiman”.
^ Griego rimaipica: “Amitopaj” ninmi.
^ O “supaicunata”.
^ “Jehová” shutita huasha diccionariopi ricui.
^ O “Diana”.
^ Teatroca rumicunahuan rurashca, chaupi estadio shina redondomi carca. Chaipica casi 25.000 gentecunami yaicujcuna carca.
^ Griego rimaipica: “procónsul” ninmi. “Procónsul” shimita huasha diccionariopi ricui.
