Juan 11:1-57
11 Lázaro shuti runami Betania uchilla pueblopi ungushca carca. Paipaj panicuna Marta, Mariapish chai uchilla pueblopimi causarcacuna.
2 Lazaropaj pani Mariami mishquijlla ashnacuj aceiteta Jesuspaj* chaquicunapi churashpa, paipaj ajchahuan chaquichirca. Paipaj turi Lazaromi ungushca carca.
3 Chaimi Lazaropaj panicunaca Jesusmanca: “Amito, ricui cambaj cꞌuyashca amigoca ungushcamari” nishpa huillachun cacharcacuna.
4 Jesús chaita uyashpaca: “Cai ungüica paitaca mana huañuiman apangachu. Ashtahuanpish Diosta jatunyachingapaj, Diospaj Churipish jatunyachishca cachunmi chashnaca tucunga” nircami.
5 Jesusca Martatapish, Mariatapish, Lazarotapishmi cꞌuyaj carca.
6 Lázaro ungushca cashcata uyashpapish Jesusca ishqui punllahuanmi pai maipi cashcapi saquirirca.
7 Chai qꞌuipami Jesusca paita catijcunataca: “Judea llajtaman cutin jacuchij” nirca.
8 Chashna nijpimi Jesusta catijcunaca: “Yachachij,* sarunllamari Judea llajtapica rumicunahuan cantaca shitashun nircacuna, ¿chashna jahuachu cutin chaimanca risha ninguiyari?” nircacuna.
9 Chaimi Jesusca cashna cutichirca: “Punllapica 12 horastami luzca tiyan ¿nachu? Maijanpish punlla luzpi purijca cai pachapaj luzta ricushcamantami imapi mana ñitcarin.
10 Ashtahuanpish tutapi purijca luz paipi mana tiyashcamantami ñitcarinlla” nircami.
11 Chaita nishca huashami Jesusca: “Ñucanchij amigo Lazaroca dormirishcamari. Shinapish paita rijchachinamanmi chaiman rigrini” nirca.
12 Chashna nijpimi Jesusta catijcunaca: “Amito, dormicushpaca paica alliyangallami” nircacuna.
13 Shinapish Jesusca Lázaro huañushcatami huillasha nicurca. Ashtahuanpish paicunaca dormishpa samaricujllapimi chashna nicunga nishpami yuyacurcacuna.
14 Paicuna chashna yuyacujpimi Jesusca achijta cashna nirca: “Lazaroca huañushcami.
15 Shinapish cancuna crichunmi ñuca mana chaipi cashcamanta cushicuni. Cunanca pai maipi cashcaman jacuchij” nirca.
16 Chaimantami Gemelo nishca Tomasca Jesusta catij caishujcunataca: “Ñucanchijpish paihuan huañungapaj jacuchij” nirca.
17 Jesús chayanapajca Lazaroca ñami chuscu punllacunata pambana jutcupi churashca carca.
18 Betania uchilla puebloca Jerusalenmantaca quimsa kilometrocuna* shinallapimi carca.
19 Achca judiocunami Martatapish, Mariatapish paicunapaj turi huañushcamanta cushichinaman shamushcacuna carca.
20 Martaca Jesús shamucushcata yachaj chayashpami paita tupanaman rirca. Cutin Mariaca huasipimi saquirirca.
21 Jesushuan Marta tupashpaca cashnami nirca: “Amito, can caipi cashca cajpica ñuca turica mana huañunmanchu carca.
22 Shinapish cunanca, Diosta can imatapish mañajpica Dios canman cuna cashcataca yachanimi” nirca.
23 Chashna nijpimi Jesusca: “Cambaj turica jataringami” nirca.
24 Chaimi Martaca: “Tucuri punllapi, huañushcacuna causarina punllapi paipish jatarina cashcataca yachanimi” nishpa cutichirca.
25 Shina nijpimi Jesusca: “Ñucami causaita cujpish, causachijpish cani. Maijanpish ñucapi feta charijca huañushpapish cutin causaringami.
26 Shinallataj ñucapi crishcata ricuchishpa causajca mana nunca huañungachu. ¿Chaitaca cringuichu?” nirca.
27 Chashna nijpimi Martaca: “Ari, Amito. Canca cai pachaman shamuna cashca Cristo, Diospaj Churi cashcatami crini” nirca.
28 Chaita nishca qꞌuipami Martaca paipaj ñaña Mariata cayanaman rirca. Paillata cayashpami: “Yachachijca caipimi. Cantami cayacun” nirca.
29 María chaita uyashpaca jatarishcahuanmi Jesusta ricunaman rirca.
30 Jesusca chai uchilla pueblomanca manaraj yaicushcachu carca. Ashtahuanpish Martahuan maipi tupashcallapitajmi paica carca.
31 Mariata huasipi cushichishpa tiyacuj judiocunaca María jatarishcahuan huasimanta llujshishpa rijtami ricurcacuna. Chaimi paicunaca pambana jutcupi huacanaman ricushcata yuyashpa Mariata catishpa rircacuna.
32 Jesús maipi cashcaman María chayashpaca paipaj ñaupajpi cungurishpami: “Amito, can caipi cashca cajpica ñuca turica mana huañunmanchu carca” nirca.
33 Mariapish, paihuan shamuj judiocunapish huacacujta ricushpami Jesusca shungupi* nanarishpa achcata llaquirirca.
34 Chashna achcata llaquirishpami: “Maipitaj churarcanguichij” nishpa tapurca. Shina tapujpimi paicunaca: “Amito, jacu ricungui” nircacuna.
35 Chaipimi Jesusca huiqui muyurishpa huacarca.
36 Jesús huacajta ricushpami judiocunaca: “¡Ricuichij, paica Lazarotaca achcatami cꞌuyashca!” nircacuna.
37 Shinapish chaipi cajcunamanta maijancunaca: “Cai runaca shuj mana ricuj runatami alliyachirca.* ¿Lázaro ama huañuchunca manachu imata rurai tucurca?” nircacunami.
38 Jesusca cutinllataj shungupi achcata nanarishpami Lazarota churashca jutcuman rirca. Chai jutcuca urcu quinripimi carca. Jutcu punguca shuj rumihuanmi tapashca carca.
39 Chaipimi Jesusca: “Rumita anchuchichij” nirca. Chashna nijpimi huañushcapaj pani Martaca: “Amito, ñamari chuscu punlla pasashca, ñamari ashnacunga” nirca.
40 Chaimi Jesusca: “¿Manachu can crishpaca Diospaj podertami* ricungui nircani?” nirca.
41 Chai qꞌuipami rumita anchuchircacuna. Chashna anchuchijpimi Jesusca jahua pachata ricushpa cashna nirca: “Yayitu, ñuca mañashcata uyashcamantami cantaca pagui nini.
42 Ñuca mañashcataca canca siempremi uyangui. Chaitaca yachanimi. Ashtahuanpish cai muyundijpi cajcuna ñucata can cachashcata crichunmi chashna nini” nirca.
43 Chaita nishca qꞌuipami Jesusca sinchita caparishpa: “¡Lázaro, llujshimui!” nirca.
44 Chashna nijpimi huañushca Lazaroca llujshimurca. Paipaj chaquicunapish, maquicunapish vendacunahuanmi pilluchishca carca. Paipaj ñahuipish shuj telahuanmi tapashca carca. Chaimi Jesusca: “Pai purichun vendacunata anchuchichij” nirca.
45 Jesús chashna rurajta ricushpami Mariata visitanaman shamuj achca judiocunaca Jesuspi crircacuna.
46 Shinapish maijancunaca Jesús imalla rurashcatami fariseocunaman huillanaman rircacuna.
47 Chaimi sacerdotecunata mandajcunapish, fariseocunapish, mandaj juezcunata* tandachishpa cashna nirca: “¿Imatataj rurashunyari? Cai runaca achca milagrocunatamari ruracun.
48 Paita chashna rurachun saquijpica tucuicunami paipica cringacuna. Chashna tucujpica Roma llajtamanta gentecuna shamushpami ñucanchij Diosta adorana huasitapish, ñucanchij llajtatapish quichungacuna” nircacuna.
49 Chaimi paicunapuramanta chai huatapi sacerdotecunata jatun mandaj Caifás shuti runaca cashna nirca: “Cancunaca imata mana yachanguichijchu.
50 Tucui cai llajta tucuchishca canapaj randica shujlla runa tucuicunamanta huañunami cancunapajca alli canga. ¿Chaitaca manachu intindinguichij?” nirca.
51 Shina nishpaca mana paipaj yuyaimantachu caitaca nirca. Ashtahuanpish chai huatapi sacerdotecunata jatun mandaj cashcamantami tucui judiocunamanta Jesús huañuna cashcata huillarca.
52 Shinapish paica mana judiocunallamantachu huañuna carca. Ashtahuanpish chꞌican chꞌican ladocunapi causaj Diospaj huahuacunata tandachingapajmi huañuna carca.
53 Chai punllamantami paicunaca Jesusta huañuchinata yuyarircacuna.
54 Chaimantami Jesusca judiocuna ama ricuchun pacalla purirca. Ashtahuanpish chaimantaca chaquishca pamba cꞌuchullapi caj, Efraín nishca llajtamanmi rirca. Chaipimi Jesusca paita catijcunandij saquirirca.
55 Judiocunapaj Pascua* fiesta punllami chayacurca. Pascua punlla manaraj chayajpica Moisesman cushca leypi nishca shina chuyayangapajmi, campomanta achca gentecunaca Jerusalenman huichiyarcacuna.
56 Paicunaca Jesustami mashcai callarircacuna. Shinallataj caishuj chaishujmi Diospaj huasipica: “¿Jesusca manachu Pascua fiestamanca shamugrin? ¿Cancunaca imatataj yuyanguichij?” nircacuna.
57 Ashtahuanpish sacerdotecunata mandajcunapish, fariseocunapish Jesús maipi cashcata ricushpaca paita japingapaj maijanpish huillachunmi mandashcacuna carca.
Notacuna
^ Griego rimaipica: “Amitopaj” ninmi.
^ O “Rabí”.
^ Griego rimaipica: “casi 15 estadiocuna” ninmi. Shuj estadioca 185 metrocunatami charirca.
^ Griego rimaipica: “espiritupi” ninmi.
^ Griego rimaipica: “mana ricuj runapaj ñahuicunatami pascarca” ninmi.
^ O “achijnicujtami”.
^ O “Sanedrinta”.
^ “Pascua” shimita huasha diccionariopi ricui.
