Juan 15:1-27
15 Ñucami alli granota pꞌucuj uva yura cani. Tarpujca ñuca Yayami.
2 Paica ñucapi mana pꞌucuj ramacunataca pꞌitishpami shitan. Cutin pꞌucuj ramacunataca ashtahuan pꞌucuchunmi limpiashpa allichin.
3 Ñuca parlashca shimicunamantami cancunaca ña limpio canguichij.
4 Ñucahuan shuj shinalla catichij, ñucapish cancunahuanca shuj shinallami catisha. Ramaca pailla saquirishpaca mana pꞌucui tucunchu. Pꞌucungapajca uva yurapimi cana can. Chashnallatajmi cancunapish mana ñucahuan shuj shinalla cashpaca ima granota* mana pꞌucui tucunguichij.
5 Ñucaca uva yurami cani. Cancunaca ramacunami canguichij. Maijanpish ñucahuan shuj shinalla cajhuanca, ñucapish paihuanca shuj shinallami cani. Chaimantami paica achca granota pꞌucun. Cancunaca ñucamanta caruyashpaca imata mana rurai tucunguichijchu.
6 Maijanpish ñucahuan shuj shinalla mana catijca shuj ramata pꞌitijpi chaquirij shinami. Chai ramacunatami gentecunaca tandachishpa ninapi shitan. Chashna shitajpimi ramacunaca rupan.
7 Ñucahuan shuj shinalla catishpa, ñuca nishcacunatapish cazushpaca cancuna ima munashcata mañashpapish chasquinguichijmi.
8 Cancunaca achca granota pꞌucushpa, ñucata catijcuna cashcatapish ricuchishpaca ñuca Yayatami jatunyachinguichij.
9 Ñuca Yaya ñucata cꞌuyashca shinallatajmi cancunatapish ñucaca cꞌuyashcani. Chaimanta ñuca cꞌuyaita chasquishpa catichij.
10 Ñuca Yaya mandashcacunata cazushpami paipaj cꞌuyaita chasquishpa catini. Chashnallatajmi cancunapish ñuca mandashcacunata cazushpaca ñuca cꞌuyaita chasquishpa catinguichij.
11 Ñuca cushicuj shinallataj cancunapish cushicuchun, yallitaj cushilla cachunmi caicunataca huillashcani.
12 Caitami ñucaca mandani: cancunata ñuca cꞌuyashca shinallataj cancunapish caishuj chaishuj cꞌuyanacuichij.
13 Maijanpish paipaj amigocunamanta causaita* cujca yallitaj cꞌuyaj cashcatami ricuchin.
14 Ñuca mandashcacunata cazushpaca ñuca amigocunami canguichij.
15 Cancunataca ñucata sirvijmi canguichij nishpaca ña mana ninichu. Shuj sirvijca amo imata rurashcataca mana yachanchu. Ashtahuanpish cancunamanca ñuca Yaya imalla nishcata uyashpami tucuita huillashcani. Chaimantami cancunataca ñuca amigocunami canguichij nini.
16 Mana cancunachu ñucataca agllarcanguichij. Ashtahuanpish ñucami cancunataca agllarcani. Cancuna rishpa huiñaipaj pꞌucuj granota pꞌucuchishpa catichunmi agllarcani. Chashna rurajpimi ñuca Yayaca ñuca shutipi imata mañajpipish cancunamanca cungalla.
17 Caishuj chaishuj cꞌuyanacuchunmi cancunamanca caicunata mandani.
18 Cai pacha gentecuna cancunata pꞌiñajpica, manaraj cancunata pꞌiñashpa ñucataraj pꞌiñashcata yuyarichij.
19 Cai pacha gentecuna shina cajpica, cai pacha gentecunaca cancunataca cꞌuyanmanmi. Ashtahuanpish ñucami cancunataca agllashcani. Cancunaca mana cai pacha gentecuna shina canguichijchu. Chaimantami cai pacha gentecunaca cancunata pꞌiñancuna.
20 Ñuca nishcata yuyarichij: sirvijca amota yallica mana canchu. Paicunaca ñucata catirashpa llaquichishca shinallatajmi cancunatapish catirashpa llaquichingacuna. Ashtahuanpish ñuca nishcacunata cazushpaca cancunapaj nishcacunatapishmi cazungacuna.
21 Paicunaca ñucata cachajtaca mana rijsincunachu. Chaimantami cancunataca ñucata catijcuna cashcamanta tucui chaicunata rurangacuna.
22 Ñuca mana shamushca cajpi, paicunaman ñuca mana huillashca cajpica paicunaca ima juchayuj mana canmanchu carcacuna. Shinapish cunanca ima juchata mana rurashcanchijchu nishpaca paicunaca mana ni tucuncunachu.
23 Ñucata pꞌiñajca ñuca Yayatapishmi pꞌiñan.
24 Pi mana rurashcacunata paicunapaj ñaupajpi ñuca mana rurashca cajpica paicunaca ima juchayuj mana canmanchu carcacuna. Shinapish cunanca ñucata ricushpami ñucatapish, ñuca Yayatapish pꞌiñashcacuna.
25 Ashtahuanpish Leypi quillcashca shimicuna pajtarichunmi chashna tucushca. Chaipica: ‘Mana imata rurajpipish ñucataca pꞌiñarcacunami’ ninmi.
26 Cancunata ayudaj espíritu santo shamushpaca ñuca pi cashcatami huillanga. Chai espirituca ñuca Yayamantami shamun, mana llullatapishmi yachachin.
27 Callarimanta ñucahuan cashcamantami cancunapish shujtajcunaman ñucamanta huillana canguichij.
Notacuna
^ Caipica grano nishpaca alli ruraicunamantami parlacun.
^ O “almata”. “Alma” shimita huasha diccionariopi ricui.
