Juan 19:1-42
19 Chai qꞌuipami Pilatoca Jesusta pushashpa azotichun soldadocunata mandarca.
2 Chai soldadocunaca shuj coronata cashahuan chꞌimbashpami Jesuspaj umapi churachircacuna. Shinallataj morado capatami paimanca churachircacuna.
3 Chashna rurashpami paipajman cꞌuchuyashpaca: “¡Alabado,* judiocunata jatun mandaj!” nishpa burlarircacuna. Shinallataj quijadospimi huajtarcacuna.
4 Pilato cutin canllaman llujshishpami gentecunamanca: “¡Ricuichij! Cai runa imamanta culpayuj cashcataca mana japinichu. Chaimantami cancuna ricuchun paitaca canllaman pushamuni” nirca.
5 Jesusca casha coronata churashca, morado capata churarishcami canllaman llujshirca. Chashna llujshijpimi Pilatoca: “¡Ricuichij cai runata!” nirca.
6 Ashtahuanpish sacerdotecunata mandajcunapish, guardiacunapish Jesusta ricushpaca: “¡Paitaca huañuchi! ¡Paitaca huañuchi!”* nishpami caparircacuna. Shina caparijta uyashpami Pilatoca: “Paita pushashpa cancunallataj huañuchichijlla.* Ñucaca cai runa imamanta culpayuj cashcataca mana japinichu” nirca.
7 Chaita uyashpami judiocunaca: “Ñucanchijca shuj leytami charinchij. Cai runaca Diospaj churimi cani nishcamantami chai leypi nishca shina huañuna can” nircacuna.
8 Paicuna chashna nishcata uyashpami Pilatoca ashtahuan mancharirca.
9 Chaimantami Pilatoca mandana huasiman cutin yaicushpa Jesustaca: “¿Maimantataj cangui?” nishpa tapurca. Shina tapujpipish Jesusca imata mana cutichircachu.
10 Chaimi Pilatoca: “¿Manachu ñuca tapushcataca cutichingui? Ñucaca canta cacharingapajpish, huañuchingapajpish* autoridadta charinimi. ¿Chaitaca manachu yachangui?” nirca.
11 Chashna nijpimi Jesusca: “Dios canman autoridadta mana cushca cajpica ñuca contraca imata mana rurai tucunguimanchu. Chaimantami ñucata canman entregaj runaca cantapish yalli juchayuj can” nirca.
12 Chaimi Pilatoca Jesusta ima shinapish cacharinata yuyarca. Shinapish judiocunaca: “¡Cai runata cacharishpaca mana Cesarpaj* amigo canguichu! ¡Maijanpish jatun mandaj tucushpaca Cesarpaj contrami tucun!”* nishpami caparircacuna.
13 Pilatoca chashna nijta uyashpami Jesustaca canllaman llujshichirca. Chai qꞌuipaca juzgana asientopimi tiyarirca. Chai asientoca rumicunahuan rurashca pamba jahuapimi carca. Chai rumi pambaca hebreo rimaipica Gábbatha shutimi can.
14 Chai punllaca Pascua fiestapaj allichirina punllami carca. Chai punllaca casi chaupi punlla shina cajpimi Pilatoca judiocunataca: “¡Ricuichij, cancunapaj jatun mandajta!” nirca.
15 Shina nijpimi paicunaca: “¡Huañuchi! ¡Huañuchi! ¡Paitaca huañuchi!”* nishpa caparircacuna. Chashna caparijpimi Pilatoca: “Shinaca ¿cancunapaj jatun mandajtachu huañuchichun ninguichij?” nirca. Chaimi sacerdotecunata mandajcunaca: “Cesarmi ñucanchijta jatun mandajca. Pi shujtaj jatun mandajtaca mana charinchijchu” nishpa cutichircacuna.
16 Chai huashami Pilatoca Jesusta caspipi clavashpa huañuchichun soldadocunaman curca.
Chaimi paicunaca Jesusta pushashpa rircacuna.
17 Jesusca paita llaquichina caspita* aparishpami Uma Tullu shuti lugarman ringapaj llujshirca. Uma Tullu shutica hebreo rimaipica Gólgota nisha ninmi.
18 Chaipimi Jesustaca caspipi clavarcacuna. Jesuspaj ladopica ishqui runacunatapishmi churarcacuna. Shujtaca alli ladoman, caishujtaca lluqui ladomanmi churarcacuna. Cutin Jesusca paicunapaj chaupipimi carca.
19 Shinallataj Pilatoca llaquichina caspi* jahuapimi shuj letrerota churarca. Chaipica: “Nazaret llajtamanta Jesusmi. Paica judiocunata jatun mandajmi” nishpami quillcarca.
20 Jerusalén cꞌuchullapimi Jesustaca caspipi clavashpa churarcacuna. Chaimantami achca judiocunaca letreropi ima nishcata liyircacuna. Chai letreroca hebreo, latín, griego rimaicunapimi quillcashca carca.
21 Chashnapish judiocunapaj sacerdotecunata mandajcunami Pilatotaca: “‘Paica judiocunata jatun mandajmi’ nishpaca ama quillcaichu. Chaipaj randica pai nishcata quillcai. Paica: ‘Ñucami judiocunata jatun mandaj cani’ nircami” nircacuna.
22 Chashna nijpimi Pilatoca: “Ñuca quillcashcaca, ñami quillcashca” nishpa cutichirca.
23 Jesusta caspipi clavashca qꞌuipami soldadocunaca paipaj jahua churanacunata japishpa, chuscupi chaupishpa shuj shuj japircacuna. Shinallataj Jesuspaj ucu churanatapishmi japircacuna. Jesuspaj ucu churanaca jahuamanta ucucama ahuashca cashcamantami mana sirashca carca.
24 Chaimantami soldadocunaca paicunapura parlanacushpaca: “Cai churanataca ama lliquishunchijchu. Ashtahuanpish pi japina cashcata yachangapaj sorteashunchij”* nircacuna. Caica Dios quillcachishcapi nishca pajtarichunmi chashna tucurca. Quillcachishcapica: “Ñuca churanacunataca paicunapurami chaupinacushpa, sorteanacushpa japircacuna” ninmi. Soldadocunaca Quillcachishcapi nishca shinallatajmi rurarcacuna.
25 Jesusta llaquichina caspi* ladopica Jesuspaj mamapish, paipaj mamapaj ñañapish, Clopas shuti runapaj huarmi Mariapish, María Magdalenapishmi carca.
26 Jesusca paipaj mamata, paipaj cꞌuyashca catijtapish chai cꞌuchullapi cajta ricushpami paipaj mamataca: “¡Mamita, cunanmantaca paimi cambaj churi!” nirca.
27 Chai huashaca paita catijtapish: “¡Cunanmantaca paimi cambaj mama!” nircami. Chai punllamantami Jesusta catijca paipaj huasiman Jesuspaj mamata pusharca.
28 Chai qꞌuipami Jesusca paipaj Yaya mandashcata tucui pajtachishcata yachashpaca: “Yacunayanmi” nirca. Chaitaca Dios quillcachishcapi nishca pajtarichunmi chashna nirca.
29 Chaipica puñu junda jayaj vinomi tiyacurca. Chaimi chaipi caj gentecunaca shuj esponjata japishpa jayaj vinopi satishpaca shuj hisopo* carrizopi churarcacuna. Chashna churashpami Jesuspaj shimiman cꞌuchuyachircacuna.
30 Jesusca chai jayaj vinota probashpaca: “¡Tucuimi pajtarishca!” nircami. Chai qꞌuipaca paipaj umata huarcushpami huañurca.*
31 Chai punllaca sábado punllapaj allichirina punllami* carca. Chaimantami judiocunaca sábado punllapi huañushca cuerpocuna llaquichina caspipi* ama saquirichun, chai runacunapaj changacunata pꞌaquishpa chaimanta anchuchichun Pilatota mañarcacuna. (Chai sabadoca shuj jatun sabadomi carca).
32 Chaimi soldadocuna rishpaca Jesuspaj ladopi caj ishquindij runacunapaj changacunata pꞌaquircacuna.
33 Shinapish Jesuspajman cꞌuchuyashpaca ña huañushcatami ricurcacuna. Chaimantami Jesuspaj changacunataca mana pꞌaquircacuna.
34 Ashtahuanpish shuj soldadoca lanzahuanmi Jesuspaj costilla chaupipi tujsirca. Chashna tujsijpimi ñapish yahuarpish, yacupish llujshirca.
35 Chashna tucujta ricujmi caitaca huillashca. Pai huillashcaca mana llullachu. Cancuna crichunmi pai nishcacuna mana llulla cashcatapish paica yachan.
36 Tucui caicunaca Dios quillcachishcapi nishca pajtarichunmi chashna tucurca. Quillcachishcapica: “Paipaj shuj tullullapish mana pꞌaquishcachu canga” ninmi.
37 Shinallataj Dios quillcachishca shujtaj ladopica: “Paita lanzahuan tujsijtami ricungacuna” ninmi.
38 Chai qꞌuipami Arimatea llajtamanta José shuti runaca Jesuspaj cuerpota apai tucunichu nishpa Pilatota tapurca. Shina tapujpimi Pilatoca Jesuspaj cuerpota apachun saquirca. Chaimi José shamushpaca Jesuspaj cuerpota aparca. (Joseca Jesusta catijmi carca. Shinapish judiocunata manchashcamantami piman mana huillashca carca).
39 Shinallataj Nicodemo runapishmi chaiman chayarca. (Paimi punta cutin Jesusta tuta ricunaman rishca carca). Paica mishquijllata ashnacuj mirrahuan* aloehuan chagrushcatami casi 100 libracunata* apamurca.
40 Paicunaca huañushcacunata pambangapaj judiocuna ima shina ruraj cashca shinallatajmi, Jesuspaj cuerpota apashpaca lino telahuan pilluchishpa mishquijllata ashnacuj qꞌuihuacunata churarcacuna.
41 Jesusta caspipi huañuchishca chai cꞌuchullapimi shuj huerta tiyarca. Chai huertapimi shuj mushuj pambana jutcu tiyarca. Chai jutcupica manaraj pita churashcachu carca.
42 Judiocunapaj allichirina punlla cashcamanta, pambana jutcupish chaillapi cashcamantami Jesuspaj cuerpotaca chaipi churarcacuna.
Notacuna
^ O “Viva”.
^ O “¡Paitaca caspipi clavashpa huañuchi! ¡Paitaca caspipi clavashpa huañuchi!”.
^ O “caspipi clavashpa huañuchichijlla”.
^ O “caspipi clavashpa huañuchingapajpish”.
^ “César” shutita huasha diccionariopi ricui.
^ Griego rimaipica: “contrami riman” ninmi.
^ O “¡Paitaca caspipi clavashpa huañuchi!”. “Caspi” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ “Sorteana” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ “Hisopo” shimita huasha diccionariopi ricui.
^ Griego rimaipica: “paipaj espirituta entregarca” ninmi.
^ “Allichirina punlla” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ “Mirra” shimita huasha diccionariopi ricui.
^ Caica casi chaupi saco cemento valimi carca.
