Juan 21:1-25
21 Chai qꞌuipaca cutinllatajmi Jesusca Tiberíades mama cucha* ladopi paita catijcunapaj ñaupajpi ricurirca. Paica cashnami ricurirca.
2 Chaipica Simón Pedropish, Gemelo nishca Tomaspish, Galileapi saquirij Caná llajtamanta Natanaelpish, Zebedeopaj churicunapish, Jesusta catij caishuj ishqui runacunapishmi tandalla carcacuna.
3 Chashna tandanacushca cashpami Simón Pedroca: “Ñucaca pescadocunata japinamanmi rigrini” nirca. Chashna nijpimi caishujcunaca: “Ñucanchijpish canhuanmi rigrinchij” nircacuna. Chaimantaca barcoman huichiyashpami rircacuna. Shinapish chai tutaca ima pescadota mana japircacunachu.
4 Ña pacaricujpica Jesusca chai mama cucha uripimi shayacurca. Ashtahuanpish Jesusta catijcunaca pai cashcataca mana cuentata curcacunachu.
5 Chaimi Jesusca: “Ñuca huahuacunalla, micungapajca mana imata* charinguichijchu ¿nachu?” nirca. Shina nijpimi paicunaca: “Mana imata charinchijchu” nishpa cutichircacuna.
6 Chashna cutichijpimi Jesusca: “Barco alli ladoman mallata* shitaichij. Chaipimi huaquin pescadocunata japinguichij” nirca. Cashna nijpimi mallata shitarcacuna. Achca pescadocuna mallapi jundajpimi mana llujshichi tucurcacuna.
7 Chashna tucujpica Jesús cꞌuyashca catijmi Pedromanca: “¡Paica Amito Jesusmari!” nirca. Amito Jesusmari nishcata uyashpami Simón Pedroca lluchulla* cashcamanta paipaj jahua churanata churarishpa mama cuchaman shitarirca.
8 Shinapish Jesusta catij caishuj runacunaca malla junda pescadocunata aisashpami uchilla barcopi shamurcacuna. Paicunaca yacu urimantaca mana carupichu carcacuna. Ashtahuanpish casi 90 metrocuna carullapimi carcacuna.
9 Paicunaca yacu uriman chayashpaca nina carbón jahuapi pescado tiyacujta, tandatapishmi ricurcacuna.
10 Chaimi Jesusca: “Cunanlla japishca huaquin pescadocunata apamuichij” nirca.
11 Shina nijpimi Simón Pedroca barcoman huichiyashpa malla junda jatun pescadocunata yacu uriman aisamurca. Chai mallapica 153 pescadocunami tiyarca. Chashna achca pescadocunahuan junda cashpapish mallaca mana lliquirircachu.
12 Shinapish Jesusca paicunataca: “Micunaman shamuichij” nircami. Chashna nijpimi Jesusta catijcunamantaca shujllapish paitaca “¿Pitaj cangui?” nishpa mana tapurcacuna. Paicunaca Amito Jesús cashcataca yacharcacunami.
13 Jesusca tandata japishpami paicunaman cararca. Chashnallatajmi pescadotapish cararca.
14 Jesusca huañushcacunapaj chaupimanta causarishca qꞌuipaca, caihuanca ñami paita catijcunapaj ñaupajpica quimsa cutin ricurirca.
15 Micushca qꞌuipami Jesusca Simón Pedrotaca: “Juanpaj churi Simón, ¿caicunatapish yallichu ñucata cꞌuyangui?” nirca. Shina nijpimi Pedroca: “Ari, Amito, ñuca canta cꞌuyashcataca canllatajmari yachangui” nishpa cutichirca. Chaimi Jesusca: “Ñuca ovejitacunaman carangui” nirca.
16 Cutinllatajmi Jesusca: “Juanpaj churi Simón, ¿ñucata cꞌuyanguichu?” nishpa tapurca. Chaimi Pedroca: “Ari, Amito, ñuca canta cꞌuyashcataca canllatajmari yachangui” nirca. Chashna nijpimi Jesusca: “Ñuca ovejitacunata michingui” nirca.
17 Jesusca caihuanca quimsa cutinmi Pedrotaca: “Juanpaj churi Simón, ¿ñucata cꞌuyanguichu?” nishpa tapurca. Chaimi Pedroca “¿Ñucata cꞌuyanguichu?” nishpa quimsa cutin Jesús tapujpica llaquilla sintirirca. Chaimantami Pedroca: “Amito, canca tucuitami yachangui. Ñuca canta cꞌuyashcataca canllatajmari yachangui” nirca. Shina nijpimi Jesusca: “Ñuca ovejitacunaman carangui.
18 Canmanca manataj llullanichu. Can joven cashpaca canllatajmi churanataca churarij carcangui. Can maiman risha nishcamanmi rij carcangui. Shinapish yuyajyashpaca cambaj maquicunata chutajpimi shujtaj runa canmanca churachinga. Shinallataj can maiman mana risha nishcamanmi pushanga” nirca.
19 Caitaca Pedro ima shina huañushpa Diosta jatunyachina cashcata ricuchingapajmi chashna nirca. Chaita nishca qꞌuipami Jesusca Pedrotaca: “Ñucata caticuilla” nirca.
20 Pedro tigrarishpaca Jesús cꞌuyashca catij paicunapaj huashata shamucujtami ricurca. Chai catijllatajmi Jesushuan meriendata micucushpaca paipaj cꞌuchullapi* tiyarishca carca. Paimi Jesustaca: “Amito, ¿pitaj cantaca contracunaman entregagrin?” nishpa tapushca carca.
21 Paita ricushpami Pedroca Jesustaca: “Amito, ¿paihuanca imataj tucunga?” nishpa tapurca.
22 Shina tapujpimi Jesusca: “Ñuca munashcamanta ñuca shamungacama pai caipi cana cajpica, ¿canca imapajtaj yachasha ningui? Ashtahuanpish canca ñucata caticuilla” nirca.
23 Chaimantami Jesusta catijcunapurapica cai catijca mana huañungachu nishca parlo tiyarca. Shinapish Jesusca paita catij mana huañuna cashcataca mana nircachu. Ashtahuanpish: “Ñuca munashcamanta ñuca shamungacama pai caipi cana cajpica, ¿canca imapajtaj yachasha ningui?” nishcami carca.
24 Jesusta cai catijmi caicunataca mana llullashpa huillan. Paillatajmi caicunataca quillcashca. Pai huillashcaca mana llulla cashcatami yachanchij.
25 Shinapish Jesusca shujtaj achca ruraicunatami rurarca. Ima hora tucui chaicunata quillcajpica chai quillcashca rollocunaca cai pachapica mana yaicunmanchu yuyanimi.
Notacuna
^ O “ima pescadota”.
^ O “linchita”, “atarrayata”.
^ O “ashalla ropahuan”.
^ Griego rimaipica: “pechopi” ninmi.
