Jueces 4:1-24
4 Ehúd huañushca qꞌuipami israelitacunaca cutin Jehová Diospaj ñaupajpi mana allicunata rurai callarircacuna.
2 Chaimi Jehová Diosca israelitacunataca Canaán llajtata mandaj rey Jabinpaj maquipi entregarca.* Rey Jabinca Hazor llajtapimi mandaj carca. Paipaj soldadocunata mandajca Sisarami carca. Sisaraca llajtacunapaj Haróset* llajtapimi causarca.
3 Rey Jabinca 900 macanacuna carretacunata, chai carretacunapaj ruedacunapipish fierro cuchillocunatami* charirca. Shinallataj rey Jabinca israelitacunataca 20 huatacunatami sinchita llaquichicushca carca. Chaimantami israelitacunaca Jehová Diosta rogarishpa mañarcacuna.
4 Chai tiempopica Lapidotpaj huarmi Débora shuti profetami Israelpi juzgaj carca.
5 Deboraca paipaj palmera yura ucupimi tiyarij carca. Chai yuraca Efraín urcucunapi tiyaj Ramapaj, Betelpaj chaupipimi carca. Israelitacunaca Dios juzgashcacunata yachangapajmi Deborapajman rijcuna carca.
6 Deboraca Neftalipi saquirij Quedes llajtamanta Abinoampaj churi Baractami cayanaman cacharca. Chaimi Deboraca cashna nirca: “Israelitacunapaj Jehová Diosca canmanca caitami mandashca: ‘Tabor urcuman ri. Shinallataj canhuanca Zabulonpaj familiamanta, Neftalipaj familiamanta 10.000 cꞌaricunata pushashpa ri.
7 Rey Jabinpaj soldadocunata mandaj Sisarataca Cisón larca yacumanmi apamusha. Paitaca paipaj macanacuna carretacunahuan, paipaj grupo soldadocunahuanmi apamushpa cambaj maquipi entregasha’ ninmi” nircami.
8 Chaita uyashpaca Baracca: “Can ñucahuan rijpica, ñucapish canhuanmi risha. Pero can mana ñucahuan rijpica, ñucapish mana rishachu” nircami.
9 Chaimi Débora huarmica: “Ñucaca canhuanmi risha. Pero cai macanacuica mana canta jatunyachingachu. Ashtahuanpish Jehová Diosmi Sisarataca shuj huarmipaj maquipi entreganga” nirca. Chai qꞌuipami Deboraca jatarishpa Barac runahuan Quedes llajtaman rirca.
10 Baracca Zabulonpaj familiata, Neftalipaj familiatami Quedes llajtapi tandachirca. Chaimi paihuanca 10.000 cꞌaricuna rirca. Deborapish paihuanmi rirca.
11 Quenitacunapuramanta Héber runaca caishuj quenitacunamantami chꞌicanyarishca* carca. Quenitacunaca Moisespaj suegro Hobabpaj huahua huahuacunamantami carca. Héber runaca paipaj carpa huasitaca Quedes llajta cꞌuchupi caj Zaananim lugarpi tiyaj jatun yura cꞌuchupimi shayachishca carca.
12 Abinoampaj churi Barac Tabor urcuman huichiyashcatami Sisaramanca huillarca.
13 Chaita uyashcahuanmi Sisaraca tucui macanacuna carretacunata, llajtacunapaj Harosetmanta paihuan shamuj grupo soldadocunata Cisón larca yacuman ringapaj tandachirca. (Sisarapaj 900 carretacunaca ruedacunapipish fierro cuchillocunatami* charirca).
14 Deboraca Baracmanca: “Jacuchij, cunan punllami Jehová Diosca Sisarataca cambaj maquipi entregagrin. ¿Manachu cantaca Jehová Dios pushacun?” nircami. Chashna nijpimi Baracca 10.000 cꞌaricunahuan Tabor urcumanta uriyarca.
15 Jehová Diosca Sisarata, paipaj tucui macanacuna carretacunata, paipaj tucui soldadocunata pandachishpami Baracpaj espadahuan tucuchi callarirca. Chaimi Sisaraca paipaj carretamanta uriyashpa chaquillahuan miticushpa rirca.
16 Baracca Sisarapaj soldadocunatapish, macanacuna carretacunatapishmi Haróset llajtacama catishpa rirca. Chashnami Sisarapaj tucui soldadocunataca espadahuan huañuchirca. Paicunamantaca ni shujllapish mana saquirircachu.
17 Heberpaj familia Hazor llajtamanta rey Jabinhuan tranquilo causaita charishcamantami Sisaraca Jaelpaj carpa huasiman chaquillahuan miticushpa rirca. Jaelca Heberpaj huarmimi carca. Heberca quenitacunapuramantami carca.
18 Chaimi Jaelca Sisarata tupanaman llujshishpaca: “Ñuca amito, shamui, caiman yaicui. Ama manchaichu” nirca. Chashna nijpimi Sisaraca carpa huasiman yaicurca. Chaipimi Jaelca shuj cꞌatahuan paitaca taparca.
19 Shinapish Sisaraca: “Yacunaihuanmi cani. Asha yacuta convidahuai” nircami. Chashna nijpimi Jaelca capachuta* pascashpa chaipi tiyaj lecheta ubyachun curca. Qꞌuipaca cutinllatajmi Sisarata taparca.
20 Sisaraca Jaeltaca: “Cai carpa huasi pungu yaicunpi saquiringui. Pi caiman shamushpa, ‘¿caipi shuj runa tiyanchu?’ nishpa tapujpica, caipica mana pi tiyanchu ningui” nircami.
21 Pero Heberpaj huarmi Jaelca carpa huasita charichina shuj estacata, shuj martillotami japirca. Sisaraca shaicushca cashcamantami huañujta dormicurca. Chaimi Jaelca Sisarapajman allijlla cꞌuchuyashpa, paipaj rinrin jahuanijlla uma tullupi chai estacataca pambacama tacashpa yaicuchirca. Chaipimi Sisaraca huañurca.
22 Sisarata mashcashpa Barac chayajpica Jaelca paihuan tupanaman llujshishpami: “Shamui, can mashcacushca runatami ricuchisha” nirca. Chashna nijpimi Baracca paihuan carpa huasiman yaicushpaca Sísara paipaj rinrin jahuanijlla uma tullupi estacahuan satishca, huañushca cashcata ricurca.
23 Chai punllapimi Diosca israelitacuna Canaán llajtata mandaj rey Jabinta mishachun ayudarca.
24 Shinallataj israelitacunaca Canaán llajtata mandaj rey Jabinpaj contrami paita tucuchingacama ashtahuan sinchita macanacurcacuna.
Notacuna
^ Hebreo rimaipica: “cꞌaturca” ninmi.
^ O “Haróset-Ha-Goyim”.
^ Hebreo rimaipica: “fierromanta rurashca carretacunatami” ninmi.
^ O “separarishca”.
^ “Carreta” shimita huasha diccionariopi ricui.
^ “Capachu” shimita huasha diccionariopi ricui.
