Lucas 10:1-42
-
Jesusca 70 runacunatami cacharca (1-12)
-
Mana arrepintirij llajtacunata sinchita rimashcamanta (13-16)
-
Jesús cachashca 70 runacuna tigramushcamanta (17-20)
-
Humildecunata ayudashcamantami Jesusca paipaj Yayata alabarca (21-24)
-
Samaria llajtamanta caj alli runamanta parlashca chꞌimbapurai (25-37)
-
Jesusca Martata, Mariatapishmi visitarca (38-42)
10 Chai qꞌuipami Jesusca* paita catijcunamanta shujtaj 70 runacunata agllashpaca pai rina tucui llajtacunaman, uchilla pueblocunamanpish ishqui ishqui ñaupachishpa cacharca.
2 Paicunata cachashpaca cashnami nirca: “Granota tandanaca achcami, ashtahuanpish tandajcunaca ashallami. Chaimanta, chagrayuj Amota ashtahuan tandajcunata cachachun mañaichij.
3 ¡Richij! Cancunataca ovejacunata lobocunapaj chaupiman cachaj shinami cachacuni.
4 Cullquitapish, micunata apana bolsatapish,* pargatetapish ama apanguichijchu. Ñanpi pitapish saludashpaca ama uniyanguichijchu.*
5 Maijan huasiman yaicushpaca puntapica: ‘Cai huasipica sumaj causai tiyachun’ ninguichij.
6 Chai huasipi sumaj causaita munaj shuj amigo tiyajpica, cancuna nishca sumaj causaica paihuanmi saquiringa. Mana tiyajpica, sumaj causaica cancunapajman tigrangallami.
7 Chaimanta cancuna yaicushca huasillapitaj ima carashcata micushpa, ubyashpa saquiringuichijlla. Trabajaj runaca pagota japintajmi. Pajta shuj huasimanta llujshishpa caishuj huasiman yaicushpa puringuichijman.
8 Shinallataj maijan llajtapi cancunata chasquijpica paicuna carashcata micunguichijlla.
9 Chai llajtapi ungushcacuna tiyajpica alliyachinguichij. Chashnallataj: ‘Diospaj Gobiernoca ñamari chayamucun’ nishpa huillanguichij.
10 Ashtahuanpish maijan llajtapi cancunata mana chasquijpica jatun ñancunaman llujshishpa cashna ninguichij:
11 ‘Cai llajtamanta ñutu allpa ñucanchij chaquicunapi japirishcatapish cancuna mana allita rurashcata yachachunmi chaspirinchij. Ashtahuanpish caita yuyarichij: Diospaj Gobiernoca ñamari chayamucun’.
12 Chaimantami cashna huillani, Juicio Punllapica Sodoma llajtapi causajcunata yallimi chai llajtapi causajcunaca llaquichishca canga.
13 ¡Aij Corazín llajtapi causajcunalla! ¡Aij Betsaida llajtapi causajcunalla! Tiro, Sidón llajtacunapi causajcuna cashna milagrocunata ricushca cashpaca sacota churarishpa, ushpapi tiyarishpami ima vida arrepintirinman carcacuna.
14 Chaimantami Jucio Punllapica Tiro, Sidón llajtacunapi causajcunata yalli cancunaca llaquichishca canguichij.
15 Capernaúm llajtapi causajcunalla, ¿jahua pachamanca ri tucunguichijchu? Mana. ¡Cancunaca Pambana Jutcumanmi* ringuichij!
16 Cancunata uyajca ñucatapish uyanmi. Cancunata mana cazujca ñucatapish mana cazunchu. Ashtahuanpish ñucata mana cazujca ñucata cachajtapish mana cazunchu” nircami.
17 Chai 70 runacuna cushilla tigramushpami Jesustaca: “Amito, cambaj shutipi mandajpica demoniocunapish* ñucanchijtaca cazunllamari” nircacuna.
18 Chashna nijpimi Jesusca paicunamanca: “Satanastaca jahua pachamanta rayo shina ña urmashcatami ricuni.
19 ¡Ricuichij! Culebracunatapish, escorpioncunatapish saruchunmi poderta cushcani. Cancunata pꞌiñajpaj tucui poderta mishachunpishmi fuerzata cushcani. Chaimantami cancunataca imapish mana llaquichinga.
20 Shinapish millai espiritucuna cazushcallamantaca ama cushicuichijchu. Ashtahuanpish cancunapaj shuticuna jahua pachapi quillcashca cashcamanta cushicuichij” nircami.
21 Chai ratollatajmi Diosca paipaj espíritu santota Jesusmanca curca. Chaimi paica achcata cushicushpa cashna nirca: “Yayitu jahua pachatapish, cai pachatapish canmi rurashcangui.* Chaimantami tucuicunapaj ñaupajpi canta alabani. Canca caicunataca alli yachajcunaman, alli yuyaiyujcunamanca mana ricuchishcanguichu. Ashtahuanpish uchilla huahuacuna shina cajcunamanmi ricuchishcangui. Ñuca Yayitu, can munashpami chashna rurashcangui” nircami.
22 Jesusca cashnapishmi nirca: “Ñuca Yayaca tucuitami ñucaman cushca. Churi pi cashcataca pi mana rijsinchu, Yayallami rijsin. Yayatapish pi mana rijsinchu, Churillami rijsin. Churi yachachijllapimi shujtajcunapish Yayataca alli rijsi tucun” nircami.
23 Chashna nishpaca paita catijcunapajman tigrarishpami Jesusca paicunallata cashna nirca: “Cancuna ricucushcata ricujcunaca cushicuncunami.
24 Cancunamanca caitami nini. Achca profetacunapish, reycunapish cancuna ricucushcata ricushun nishpapish mana ricurcacunachu. Cancuna uyacushcata uyashun nishpapish mana uyarcacunachu” nircami.
25 Chai qꞌuipaca Moisesman cushca leyta yachachij shuj runa shayarishpami Jesusta pandachisha nishpaca: “Yachachij, ¿huiñai causaita chasquingapajca imatataj rurana cani?” nishpa tapurca.
26 Chaimi Jesusca: “¿Moisesman cushca leypica imataj quillcashca tiyacun? ¿Chaipica imatataj liyishcangui?” nirca.
27 Shina nijpimi chai runaca: “‘Jehová* Diostaca cambaj tucui shunguhuan, cambaj tucui causaihuan,* cambaj tucui fuerzahuan, cambaj tucui yuyaihuan cꞌuyangui’. ‘Can quiquin cꞌuyarij shinallataj shujtajcunatapish cꞌuyangui’ ninmi” nircami.
28 Chashna nijpimi Jesusca: “Allimi cutichishcangui. Chaita pajtachishpa cati, shinami huiñai causaita chasquingui” nirca.
29 Ashtahuanpish chai runaca Jesuspaj ñaupajpi cashcata ruraj shina ricurisha nishpami: “¿Pi shujtajcunatataj cꞌuyana cani?” nishpa tapurca.
30 Chaipimi Jesusca cashna cutichirca: “Shuj runaca Jerusalenmantami Jericó llajtaman uriyacurca. Chai ñanta uriyacujpimi shuhuacuna japishpaca churanatapish quichushpa, macashpa, chahuata huañuchishpa shitashpa rircacuna.
31 Chai ñanllatatajmi shuj sacerdotepish uriyacurca. Shinapish chai runata ricushpaca caishuj ladota pasashpa rircallami.
32 Shuj levita runapish chai ñanllatatajmi pasacurca. Chai runata ricushpaca chashnallatajmi caishuj ladota pasashpa rirca.
33 Chai qꞌuipaca Samaria llajtamanta shuj runapishmi chai ñanta shamucurca. Chai runapajman chayashpaca paita ricushpami achcata llaquirirca.
34 Chaimi paipajman cꞌuchuyashpaca chugricunata aceitehuan, vinohuan maillashpa pilluchirca. Chai qꞌuipaca paipaj burro jahuapi churashpami shuj samarina huasiman pushashpa, chaipi paitaca cuidarca.
35 Cayandij punllaca huasi dueñoman ishqui denario* cullquita cushpami: ‘Cai runata cuidapangui. Cullqui mana pajtajpica ñuca tigramushpa pagashallami’ nirca.
36 Cambaj yuyaipica cai quimsa runacunamantaca, ¿shuhuacuna japishca runamanca maijantaj cꞌuyaita ricuchirca?” nircami.
37 Shina nijpimi paica: “Llaquishpa ayudaj runa” nirca. Chaimi Jesusca: “Ri, canpish chaillatataj ruragri” nirca.
38 Paicuna ñanta ricushpaca shuj uchilla pueblomanmi chayarcacuna. Chaipimi Marta shuti huarmica paipaj huasiman richun Jesusta invitarca.
39 Martaca María shuti ñañatami charirca. Mariaca Jesuspaj* ñaupajpimi imata yachachishcata* uyangapaj tiyarirca.
40 Ashtahuanpish Martaca caita chaita ruracushcamantami yallitaj ocupada carca. Chaimantami Jesuspajman cꞌuchuyashpaca: “Amito, ¿ñuca ñaña cai tucui ruraicunahuan ñucallata saquijtaca manachu ricungui? Ñucata ayudachun niyari” nirca.
41 Chaimi Jesús* cutichishpaca: “Marta, Marta, achca ruraicunamantami yallitaj sustarishca cangui,
42 shinapish mana achcata minishtinchijchu, shujllatami minishtinchij. Mariaca ashtahuan allitami agllashca. Chaitaca pi mana quichungachu” nircami.
Notacuna
^ Griego rimaipica: “Amitoca” ninmi.
^ Ñaupa punllacunapica viajangapajca carahuan rurashca bolsacunapimi micunata, churanata, shujtaj minishtirishca cosascunatapish apajcuna carca.
^ O “ama ugllarishpa saludanguichijchu”.
^ O “Hadesmanmi”. Cai shimica huañushcacuna samaricujta ricuchingapajllami can. “Hades” shimita huasha diccionariopi ricui.
^ O “supaicunapish”.
^ Griego rimaipica: “jahua pacha, cai pacha Amito” ninmi.
^ “Jehová” shutita huasha diccionariopi ricui.
^ O “almahuan”. “Alma” shimita huasha diccionariopi ricui.
^ “Denario” shimita huasha diccionariopi ricui.
^ Griego rimaipica: “Amitopaj” ninmi.
^ Griego rimaipica: “pai nishcata” ninmi.
^ Griego rimaipica: “Amito” ninmi.
