Lucas 12:1-59
-
Fariseocunapaj levaduramanta (1-3)
-
Gentecunata manchanapaj randica Diosta manchanamanta (4-7)
-
Cristota catij cashcata ricuchinamanta (8-12)
-
Achcata charij yuyaj illaj runamanta chꞌimbapurai (13-21)
-
“Ama sustarichijchu” nishcamanta (22-34)
-
Ashalla ovejacunamanta (32)
-
-
Chaparashpa shuyanamanta (35-40)
-
Alli cazuj sirvijmanta, mana cazuj sirvijmantapish (41-48)
-
Sumaj causai tiyanapaj randi pꞌiñanacuicuna tiyanamanta (49-53)
-
Cai punllacunapi ima tucucushcata yachanamanta (54-56)
-
Pꞌiñanacushcata allichinamanta (57-59)
12 Paicuna chashna tapungacamaca achca huaranga gentecuna tandanacushpami, caishuj chaishuj sarurinacucurcacuna. Chaipimi Jesusca paita catijcunataraj cashna nirca: “Fariseocunapaj levaduramanta cuidarichij. Chaica paicunapaj shungu ucupi llulla canami.
2 Ima alli pacashca tiyacujca tucuimi ricuchishca canga. Ima mana yacharishcapish tucuimi yacharinga.
3 Chaimanta, amsapi ima nishcapish achijpimi uyaringa. Cancunapaj huasi ucullapi upalla nishcapish, terrazacuna jahuamantami huillashca canga.
4 Ñuca amigocunalla, cancunamanca cashnapishmi nini: cancunata huañuchi tucujcunataca ama manchaichijchu. Paicunaca huañuchishca huashaca imata mana ashtahuan rurai tucuncunachu.
5 Shinaca ñucami pita manchana cashcata huillasha. Cancunaca Diostami manchana canguichij. Paimi huañuchishpa tucui tucuchi* tucun. Chaimantami paillata manchana canguichij.
6 Pichca uchilla pajarocunataca ishqui uchilla cullquipimi* cꞌatuncuna ¿nachu? Chashna cajpipish Diosca paicunamantaca shujllatapish mana cungarinchu.
7 Ashtahuanpish Diosca cancunapaj umapi mashna ajcha tiyashcatapish allimi yachan. Shinaca ama manchaichijchu. Cancunacarin cai tucui uchilla pajarocunatapish yalli valishcamari canguichij.
8 Ñucaca cashnami nini, maijanpish gentecunapaj ñaupajpi ñucata catij cashcata ricuchijtaca, Runapaj Churipish Diospaj angelcunapaj ñaupajpica paita catij cashcatami ricuchinga.
9 Shinapish gentecunapaj ñaupajpi ñucata mana rijsinichu nijtaca, Runapaj Churipish Diospaj angelcunapaj ñaupajpica mana rijsinichu ningami.
10 Maijanpish Runapaj Churita mana allita nishpa rimajtaca Diosca perdonangami. Ashtahuanpish espíritu santota cꞌamijtaca Diosca manataj perdonangachu.
11 Tandanacushca gentecunapajman,* mandajcunapajman, autoridadcunapajman cancunata pushajpica ‘¿Imatataj nishun? ¿Ima shinataj cutichishun?’ nishpa ama yallitaj sustaringuichijchu.
12 Diospaj espíritu santomi chai ratollataj* imata ninataca yuyachinga” nircami.
13 Chaipi cajcunamanta shuj runami: “Yachachij, herenciata ñucahuan chaupichun ñuca huauquita mandai” nirca.
14 Chashna nijpimi Jesusca: “¿Ñucataca, pitaj cancunapaj juez cachun o herenciata chaupichunca churashcari?” nirca.
15 Chashna nishca qꞌuipami Jesusca: “Alli ricujcuna caichij, shujtajcunapajta munanamantapish jarcarichij. Shuj runa achcata charijpipish, chai charishcacunaca causaitaca mana cunchu” nirca.
16 Chai qꞌuipaca Jesusca cai chꞌimbapuraitami parlarca: “Shuj charij runapaj allpapica achca granocunami pꞌucurca.
17 Chaimi chai runaca paipaj shungupica: ‘¿Cunanca imatashi rurasha? Ñuca cosechashca granocunataca ña mana maipi huaquichi tucunica’ nishpa yuyai callarirca.
18 Chaimantami paica cashna nirca: ‘Caitami ruragrini: grano huaquichinacunata urmachishpami shujtaj ashtahuan jatuncunata shayachigrini. Chaipimi tucui ñuca granocunata, tucui imalla charishcatapish huaquichisha.
19 Qꞌuipaca ñucallatajmi:* “Canca tauca huatacunapajmi achca allicunata huaquichishpa charicungui. Chaimanta cunanca samari, micui, ubyai, cushicui” nirisha’ ningami.
20 Ashtahuanpish Diosca chai runataca: ‘Yuyai illaj, cunan tutallatajmari huañugringui.* ¿Can huaquichishcacunataca pitaj japishpa saquiringari?’ nirca.
21 Yallitaj valishca charinacunata* paipajlla huaquichij runaca chashnallatajmi tucun. Diospaj ñaupajpica huajchami can” nircami.
22 Jesusca paita catijcunamanca cashnami nirca: “Chaimantami cancunataca cashna nini, ‘imatataj micushun’ nishpa cancunapaj causaimantaca* ama sustarichijchu. Shinallataj ‘imatataj churashun’ nishpa cancunapaj cuerpomantapish ama sustarichijchu.
23 Causaimi* micunatapish yalli, cuerpomi churanatapish yalli valin.
24 Cuervocunata* ricuichij. Paicunaca mana tarpunchu, mana tandanchu, granocuna huaquichinatapish mana charinchu. Shinapish Diosca paicunamanca caranllami. ¿Manachu cancunacarin chai pajarocunatapish yalli valinguichij?
25 Cancunamantaca, ¿maijantaj yalli sustarishpapish quiquin causaitaca shuj minutollahuanpish mirachi tucunguichij?
26 Chaillatapish mana rurai tucushpaca, ¿ima nishpataj shujtaj ruraicunamantacarin yallitaj sustaringuichij?
27 Shinallataj lirio sisacuna ima shina huiñajta ricuichij. Paicunaca mana sinchita trabajanchu, mana puchcanchu. Shinapish ñucaca cashnami nini, Salomonca achca sumaj cosascunata charishpapish cai sisacuna shinaca manataj churarircachu.
28 Plantacunaca alajata cunan huiñacushpapish cayaca ninapi shitashca cangapajllami. Chashna cajpipish Diosca paicunataca sumajtami churachin. ¡Ashalla feta charij runacuna, cancunatacarin chaicunatapish yallimi churachinga!
29 Chaimanta imatataj micushun, imatataj ubyashun nishpa ama purichijchu. Chaicunamantaca ama yallitaj sustarichijchu.
30 Diosta mana rijsij gentecunallami* chaicunamantaca yallitaj sustarishpa causancuna. Ashtahuanpish cancunapaj Yayaca cancuna imalla minishtishcataca allimi yachan.
31 Chaimanta paipaj Gobiernotaraj mashcaichij. Chashna rurajpimi Diosca tucui cancuna imalla minishtishcata cunga.
32 Ashalla ovejacuna ama manchaichijchu, cancunapaj Yayaca paipaj Gobiernotami cancunamanca cunata munan.
33 Cancuna imalla charishcacunata cꞌatushpa pobrecunata ayudaichij.* Cullquita huaquichina mana maucayaj uchilla bolsacunata ruraichij. Chaicunaca jahua pachapi tandachishca mana tucurij charinacunami. Chaipica shuhuapish mana cꞌuchuyanchu, polillapish mana micunchu.
34 Maipimi cambaj charinacunata huaquichingui, chaipimi cambaj shungupish canga.
35 Ropata churarishpa* allichirichij. Lamparacunatapish japichichij.
36 Bodamanta amo shamushpa pungupi huajtajpi rato pascangapaj chaparacuj runacuna shina caichij.
37 ¡Amo tigrangacama chaparashpa shuyacuj runacunaca cushicungacunami! Cancunamanca mana llullanichu. Chai amoca sirvij runa shina churarishpami paicunapajman cꞌuchuyashpa, sumajta tiyachishpa micunata paicunaman caranga.
38 Chaupi tutata,* o gallo cantai horasta* amo shamushpa allichirishcata japijpica paicunaca cushicungacunami.
39 Caita yuyarichij: ima hora shuhua shamunata huasiyuj yachashpaca paipaj huasiman shuhua yaicuchunca mana saquinmanchu.
40 Cancunapish allichirishca shuyacuichij, Runapaj Churipish cancuna mana yuyashca horapimi shamunga” nircami.
41 Chashna nijpimi Pedroca: “Amito, ¿cai chꞌimbapuraica ñucanchijllapajchu o tucuicunapajchu?” nirca.
42 Chaimi Jesusca* cashna nirca: “¿Pitaj alli cazuj, alli yuyaiyuj* mayordomoca?* Paimanmi amoca micuna horaspi caishuj sirvijcunaman* minishtishca micunata carashpa catichun minganga.
43 ¡Amo shamushpa chaitataj ruracujta japijpica, chai sirvijca cushicungami!
44 Cancunamanca mana llullanichu. Amoca paipaj tucui imalla charishcacunata cuidachunmi chai sirvijtaca churanga.
45 Shinapish chai sirvij runaca ‘Ñuca amoca uniyacunmi’ nishpachari paipaj shungupica yuyai callaringa. Chashna yuyai callarishpaca caishuj sirvijcunatachari macai callaringa. Shinallataj micushpa, ubyashpa, machashpachari puringa.
46 Ashtahuanpish chai sirvij runapaj amoca pai mana yuyashca punllapi, mana yachashca horapimi shamunga. Chashna shamushpami paitaca jatunta llaquichinga. Diosta mana cazujcunahuanpishmi churanga.
47 Amo imata rurachun nishcata yachashca jahua mana allichirishcamanta, mandashcatapish* mana rurashcamantami amoca chai sirvij runataca achcata macanga.
48 Cutin mana yachashcamanta ima mana allita rurajpica macana cajpipish amoca mana yalli macangachu. Piman achcata cushpaca, achcallatatajmi mañanga. Maijanman ashtahuan mingashpaca, ashtahuan rurachunmi mañanga.
49 Ñucaca cai allpapi ninata japichingapajmi shamurcani. Ninaca ñamari japirishca, ¿imatataj ashtahuan munasha?
50 Shuj bautismohuanmi bautizashca cana cani. ¡Chai pajtangacamaca llaquillami casha!
51 ¿Sumaj causaita cai allpapi cungapaj shamushcatachu ñucataca yuyanguichij? Mana. Ashtahuanpish pꞌiñanacuicuna tiyachunmi shamurcani.
52 Cunanmantapachaca shuj huasipica pꞌiñanacuimi tiyanga. Pichcapura causacushpaca, quimsaca ishquipaj contra, cutin ishquica quimsapaj contrami canga.
53 Yayaca churipaj contra, churica yayapaj contra, mamaca ushushipaj contra, ushushica mamapaj contra, suegraca nuerapaj contra, nueraca suegrapaj contrami tucunga” nircami.
54 Chai qꞌuipami Jesusca chaipi cajcunamanca cashnapish nirca: “Cancunaca inti huashicun ladopi yana pꞌuyuta ricushpaca ‘Achcatami tamyagrin’ ninguichijmi. Chaica cancuna nishca shinami pajtan.
55 Shinallataj ura ladomanta huaira jatarimujta ricushpaca ‘Yallitaj rupaimi canga’ ninguichijmi. Chaica cancuna nishca shinami pajtan.
56 Mishqui shimi jayaj shungucuna cancunaca cai allpapi, cielopi ima tucucushcataca yachanguichijmi. Ashtahuanpish ¿cai punllacunapi ima tucucushcataca ima nishpataj mana yachanguichijyari?
57 ¿Cashcata rurana cashcataca ima nishpataj cancunallataj mana ricunguichijyari?
58 Yuyashun, maijanpish canta imamanta juchachishpa shuj mandajpajman apacujpica, ñanpi cashparaj pꞌiñanacushcataca paihuan allichingui. Mana chashna rurajpica chai juchachij runaca, juezpaj maquipimi cantaca churanga. Cutin juezca carcelta cuidajpaj maquipimi cantaca churanga. Chai cuidaj runami cantaca carcelpi churanga.
59 Carcelmantaca can dibishca cullquita* tucui pagangacama manataj llujshinguichu. Chaica chashnatajmi canga” nircami.
Notacuna
^ Griego rimaipica: “Gehena” ninmi. “Gehena” shimita huasha diccionariopi ricui.
^ Griego rimaipica: “ishqui asarioncunapimi” ninmi. Shuj runaca 45 minutocunata trabajashpami shuj asarionta ganaj carca.
^ Caitaca “Sinagogacunaman” nishpapishmi traducishcacuna.
^ Griego rimaipica: “chai horallataj” ninmi.
^ O “ñuca almallatatajmi”. “Alma” shimita huasha diccionariopi ricui.
^ O “cambaj almataca quichungacuna”. “Alma” shimita huasha diccionariopi ricui.
^ O “Tesorocunata”.
^ O “almamantaca”. “Alma” shimita huasha diccionariopi ricui.
^ O “Almami”.
^ Caica shuj jatun yana pajaromi.
^ Griego rimaipica: “Cai pacha llajtacunallami” ninmi.
^ “Pobrecunata ayudana” shimita huasha diccionariopi ricui.
^ O “Chumbillirinata chumbillirishpa”.
^ Griego rimaipica: “Segunda vigilia” ninmi. Jesuspaj tiempopica cai segunda vigilia nishcaca más o menos nueve de la nochemanta chaupi tutacamami carca.
^ Griego rimaipica: “tercera vigilia” ninmi. Jesuspaj tiempopica cai tercera vigilia nishcaca más o menos chaupi tutamanta las tres de la mañanacamami carca.
^ Griego rimaipica: “Amitoca” ninmi.
^ O “alli yachaj”.
^ O “huasita cuidajca”.
^ O “huasipi sirvijcunaman”.
^ O “paipaj munaitapish”.
^ Griego rimaipica: “último leptón” ninmi. Shuj leptón cullquitaca casi cinco minutocunata trabajashcamantami pagajcuna carca.
