Lucas 14:1-35
-
Cuerpo pꞌunguishca runata sábado punllapi alliyachishcamanta (1-6)
-
Invitajpi humilde cashcata ricuchinamanta (7-11)
-
Imahuan mana pagai tucujcunata invitanamanta (12-14)
-
Invitashcacuna mana ri tucunichu nishcamanta chꞌimbapurai (15-24)
-
¿Jesusta catij cangapajca imatataj rurana canchij? (25-33)
-
Cachimanta sabor anchujpi (34, 35)
14 Jesusca shujtaj sábado punllami shuj fariseopaj huasipi micunaman rirca. Paica fariseocunata pushajmi carca. Chai huasipi cajcunaca Jesustami chaparacurcacuna.
2 Jesuspaj ñaupajpica tucui cuerpo pꞌunguishca* shuj runami tiyacurca.
3 Chaimi Jesusca Moisesman cushca leyta yachachijcunatapish, fariseocunatapish: “¿Sábado punllapi pita jambinaca allichu canga o mana?” nishpa tapurca.
4 Shina nijpimi paicunaca upalla saquirircacuna. Chai huashaca ungushca runapaj jahuapi maquita churashpami Jesusca paita alliyachirca. Chashna alliyachishpaca cacharcallami.
5 Chai qꞌuipami Jesusca: “¿Cancunapaj churi o shuj huagra jutcupi urmajpica sábado punlla cajpipish manachu utca llujshichinguichijman?” nirca.
6 Shina nijpica imata mana ni tucurcacunachu.
7 Invitashcacuna maipi tiyaringapaj alli puestocunata mashcacujta ricushpami Jesusca cai chꞌimbapuraita churashpa paicunamanca cashna yachachirca:
8 “Canta shuj bodaman invitajpica ashtahuan alli puestopica ama tiyaringuichu. Ñataj invitaj runa cantapish yalli alli nishca runata invitashca canman.
9 Invitaj runa shamushpaca cantaca: ‘Jatari, pai caipi tiyarichun saqui’ ningami. Chashna nijpica pingarishpami, ultimopi tiyarinaman ringui.
10 Ashtahuanpish canta invitajpica último puestoman rishpa tiyaringui. Chaipi tiyarijpimi canta invitaj runa shamushpaca: ‘Amigo, cai ñaupajman shamui’ ninga. Chashnami tucuicunapaj ñaupajpi canca alli nishca cangui.
11 Maijanpish jatun tucujca pingaipi churashcami canga. Ashtahuanpish humilde cajca jatunyachishcami canga” nircami.
12 Chai qꞌuipami Jesusca micunaman invitaj runataca cashna nirca: “Jatun micuita rurashpaca cambaj amigocunata, huauquicunata, familiacunata, charij vecinocunatapish ama invitanguichu. Paicunata invitajpica chashnallataj tigrachingapajmi cantapish invitasha ningacuna. Chashna rurajpica can japina cashcatami ña chasquingui.
13 Ashtahuanpish shuj jatun micuita rurashpaca pobrecunata, lisiarishcacunata, cojocunata, mana ricujcunatapish invitangui.
14 Chashna rurashpami canca cushicungui. Paicunaca imahuan mana pagai tucunchu. Shinallataj cashcata rurajcunata Dios causachijpica allicunatami chasquingui” nircami.
15 Jesús chashna nijta uyashpami invitashcacunamanta shuj runaca: “Diospaj Gobiernopi micujca* cushicunmi” nirca.
16 Chaimi Jesusca cashna nirca: “Shuj runaca jatun micuita ruragrishpaca achca gentecunatami invitarca.
17 Micuna horas chayajpica invitashcacunata cayanamanmi paita sirvijta cacharca. Cayanaman cachashpaca: ‘Shamuichij ñami tucuita allichishcani nigri’ nircami.
18 Chashna cayanaman cachajpica tucuicunami caita chaita nircacuna. Shujca: ‘Ñucaca allpatami randircani, chaita ricunamanmi rina cani, quishpichihuai mana ri tucunichu’ nircami.
19 Cutin caishujca: ‘Ñucaca pichca yunta huagracunatami randircani, chai huagracuna ima shina yapujtami ricugrini, quishpichihuai mana ri tucunichu’ nircami.
20 Shujtajcarin: ‘Cunanllamari cazararcani, chaimantami mana ri tucuni’ nircami.
21 Paicuna imalla nishcatami sirvij runa tigrashpaca amoman tucuita huillarca. Chashna huillajpimi amoca yallitaj pꞌiñarishpa paita sirvijtaca: ‘Cai rato jatun ñancunaman, cai llajta uchilla ñancunaman rishpa pobrecunata, lisiarishcacunata, mana ricujcunata, cojocunatapish pushamugri’ nishpa mandarca.
22 Amo mandashcata rurashca qꞌuipami sirvij runaca: ‘Amito, can mandashca shinami rurashcani. Chashnapish huasipica lugar tiyanrajmi’ nirca.
23 Chashna nijpimi amoca paita sirvijtaca cashna nishpa mandarca: ‘Cai llajtamanta llujshina ñancunaman rishpa, chaqui ñancunamanpish rishpa ñuca huasipi jundachun gentecunata ima shinapish pushamugri.
24 Ñucaca cashnami nini, puntaman invitashca runacunaca shujllapish ñuca micunataca manataj micungacunachu’ nirca” nircami.
25 Jesushuanca achca gentecunami purijcuna carca. Paicunata ricushpami Jesusca cashna nirca:
26 “Maijanpish ñucata catisha nishpaca paipaj yayatapish, mamatapish, huarmitapish, huahuacunatapish, huauquicunatapish, panicunatapish, quiquin causaitapishmi* pꞌiñana* can. Mana chashna rurashpaca ñucata catijca mana cai tucunchu.
27 Maijanpish ñucata catisha nishpaca paipaj quiquin llaquichina caspita* apashpami catina can. Mana chashna rurashpaca ñucata catijca mana cai tucunchu.
28 Cancunamanta maijanpish shuj torreta shayachisha nishpaca tucuchingacama rurangapajca, ¿manachu mashna cullquita minishtishcata puntapica alli yuyarin?
29 Mana alli yuyarishpa callari rumicunallata churashpa torreta mana tucuchijpica, tucui chaita ricujcunami paimantaca burlari callaringacuna.
30 Chashna burlarishpami paicunaca: ‘Cai runaca torreta shayachi callarishpapish manamari tucuchi valinchu’ ningacuna.
31 Shinallataj shuj reyca caishuj reyhuan macanacugrishpaca, ¿10.000 soldadocunallahuan 20.000 soldadocunata mishai valishachu nishpa manachu puntapica shujtajcunataraj tapun?
32 Mana mishai tucunata yachashpaca, caishuj rey carupi cajpirajmi paihuan alli tucungapaj huillajcunata cachanga.
33 Chaimanta caita yuyarichij, cancunamanta maijanpish tucui imalla charishcacunata mana saquishpaca, ñucata catijca mana cai tucunchu.
34 Cachica allimari. Ashtahuanpish cachimanta sabor anchujpica, ¿imahuantaj cutin saboryachingari?
35 Chaimantami allpapi churangapajpish, majadahuan chagrungapajpish mana valin. Chaimi gentecunaca canllaman shitanlla. Uyasha nijca alli uyachun” nircami.
Notacuna
^ Cai ungüitaca hidropesía nincunami. Cuerpo ucupi yacu yalli jundashcamantami tucui pꞌunguin.
^ Griego rimaipica: “tandata micujca” ninmi.
^ O “almatapishmi”. “Alma” shimita huasha diccionariopi ricui.
^ O “ashallata cꞌuyana”.
^ “Llaquichina caspi” shimita huasha diccionariopi ricui.
