Lucas 19:1-48
19 Jesusca Jericó llajtaman yaicushpami chaita pasacurca.
2 Chai llajtapica achcata charij Zaqueo shuti runami causarca. Paica impuestocunata cobrajcunapaj jefemi carca.
3 Jesusta ricunata munashpapish uchilla cashcamanta, achca gentecunapish Jesuspaj muyundijpi cashcamantami mana ricui pudirca.
4 Chaimantami Zaqueoca paita ricungapaj ñaupashpa rishpaca shuj sacha higo* yuraman huichiyarca. Jesusca ñallami chai ñanta pasagrirca.
5 Jesús chaiman chayashpaca huichilla ricushpami: “Zaqueo chaimanta utca uriyamui. Cunanca cambaj huasipimi saquirigrini” nirca.
6 Chashna nijpimi Zaqueoca yuramanta chai rato uriyashpa, Jesustaca paipaj huasipi cushicushpa chasquirca.
7 Chaita ricushpaca tucuicunami: “Paica juchayuj runapaj huasipimari saquirin” nishpa huashalla rimai callarircacuna.
8 Shinapish Zaqueoca shayarishpami Jesustaca:* “Ricui Amito, ñuca tucui charishcacunamantaca chaupitami pobrecunaman cugrini. Shinallataj umashpa shuhuashca cullquitapish chuscu cutinhuanmi tigrachigrini” nirca.
9 Chashna nijpimi Jesusca cashna nirca: “Diosca cunan punllami cai runatapish, paipaj familiatapish quishpichishca. Paipish Abrahanpaj churimi can.
10 Runapaj Churica chingarishcacunata mashcangapaj, quishpichingapajpishmi shamurca” nircami.
11 Jesusca chai nishcacunata paicuna uyacujpirajmi shujtaj chꞌimbapuraita parlarca. Paita catijcunaca Jerusalenman chayashpaca Diospaj Gobiernota ña ricuna cashcatami yuyacurcacuna. Chaimantami cai chꞌimbapuraita parlashpaca
12 cashna nirca: “Shuj reypaj churica rey tucushpa tigrangapajmi caru llajtaman rirca.
13 Paica manaraj rishpami paipaj chunga sirvijcunata cayashpa chunga mina* cullquita curca. Chashna cushpaca: ‘Ñuca tigramungacama cai cullquihuan negociacuichij’ nircami.
14 Ashtahuanpish paipaj llajta gentecunallatajmi chai runataca pꞌiñajcuna carca. Chaimantami: ‘Cai runa ñucanchijta mandachunca mana munanchijchu’ nishpa huillachun, pai rishca llajtaman huillajcunata cacharcacuna.
15 Asha tiempo qꞌuipaca rey tucushpami chai runaca tigramurca. Chashna tigramushpaca, pai saquishca cullquihuan* negociashpa mashnata ganashcata ricungapajmi paita sirvijcunata cayarca.
16 Punta sirvij runa cꞌuchuyamushpaca: ‘Amito, cambaj mina cullquimantaca, chungahuanmi mirachishcani’ nircami.
17 Chashna nijpimi reyca: ‘¡Allitami rurashcangui, canca alli sirvijmi cangui! Ashallapipish allita ruraj cashcata ricuchishcamantami cunanca chunga llajtacunata mandangui’ nirca.
18 Catij sirvij shamushpaca: ‘Amito, cambaj mina cullquimantaca, pichcahuanmi mirachishcani’ nircami.
19 Chashna nijpimi paitapish: ‘Canca pichca llajtacunatami mandangui’ nirca.
20 Cutin caishuj sirvij shamushpaca cashnami nirca: ‘Amito, cambaj mina cullquica caipimi. Shuj telapimi pacashpa churarcani.
21 Manchaimantami chashna rurarcani. Canca yallitaj millaimi cangui. Cullquita mana huaquichishpapish japinguillami. Mana tarpushpapish tandanguillami’ nircami.
22 Shina nijpimi chai reyca: ‘Millai sirvij runa, can nishca shinallatajmi cantaca juzgasha. Ñuca yallitaj millai cashcata, cullquita mana huaquichishpapish japijlla cashcata, mana tarpushpapish tandajlla cashcataca yachanimi ninguimari.
23 ¿Chashna yachashca jahuachu ñuca cullquitaca* bancopi mana churarcangui? Ñuca tigramushpaca intereshuanmi japiman carcani’ nircami.
24 Chai qꞌuipami reyca chaipi cajcunataca: ‘Chai mina cullquita paita quichushpa, chunga mina cullquita charijman cuichij’ nirca.
25 Shina nijpimi paicunaca: ‘¡Amito, paica ñamari chunga mina cullquita charin!’ nircacuna.
26 Chaimi rey cutichishpaca: ‘Ñucaca cashnami nini, achcata charijmanca ashtahuanmi cunga. Cutin mana charijtaca, pai ashallata charishcatapish quichungami.
27 Ashtahuanpish ñucata pꞌiñashpa, rey cachun mana munajcunata caiman pushamuichij. Ñuca ñaupajpi paicunataca huañuchichij’ nirca” nircami.
28 Chashna nishca huashaca Jerusalenmanmi Jesusca huichiyashpa catirca.
29 Olivos yuracuna tiyan urcupi saquirij Betfagué, Betania pueblocunaman cꞌuchuyacushpaca Jesusca paipaj ishqui catijcunata cachashpami
30 cashna nirca: “Chai chꞌimbanijpi caj uchilla puebloman richij. Chaiman chayashca huashaca ni pi manaraj tiyarishca malta burrito huatashca shayacujtami ricunguichij. Chai burritota cacharishpa pushamugrichij.
31 Maijanpish cancunata ‘¿Imamantataj cacharicunguichij?’ nishpa tapujpica ‘Ñucanchij Amitomi minishtin’ ninguichij” nircami.
32 Jesusta catijcuna rishpaca Jesús nishca shinallatajmi malta burritotaca ricurcacuna.
33 Shinapish malta burritota cacharicujpimi dueñocunaca: “¿Imamantataj burritotaca cacharicunguichij?” nishpa tapurcacuna.
34 Chashna tapujpimi paicunaca: “Ñucanchij Amitomi minishtin” nircacuna.
35 Malta burritota Jesuspajman pushamushpaca paicunapaj jahua churanacunatami burrito jahuapi churarcacuna. Chashna churajpimi Jesusca chai malta burritopi tiyarirca.
36 Malta burritopi tiyarishpa Jesús ricujpica gentecunaca paicunapaj jahua churanacunatami ñanpi tindircacuna.
37 Olivos yuracuna tiyan urcumanta uriyaj ñanmanmi Jesusca chayacurca. Chaipimi paita catij tucui gentecunaca Jesús achca milagrocunata rurajta ricushcamanta cushicushpa Diosta alabashpa, caparishpaca
38 cashna nircacuna: “¡Jehová* Diospaj shutipi shamuj Jatun Mandajca alli nishca cachun! ¡Dioshuanpish ñucanchijhuanpish sumaj causai tiyachun! Jahua pacha Diostapish jatunyachishunchij” nircacunami.
39 Ashtahuanpish gentecunapaj chaupipi caj huaquin fariseocunaca: “Yachachij, canta catijcunata upallachun mandai” nircacunami.
40 Chaimi Jesús cutichishpaca: “Ñucaca cashnami nini, paicuna upalla saquirijpica rumicunami caparinga” nirca.
41 Jerusalenman ña chayacushpami Jesusca chai llajtata ricushpa huacarca.
42 Chashna huacashpami cashna nirca: “Canllataj cai punllapi sumaj causaihuan ima tucuna cashcata intindishca cashpaca... Ashtahuanpish cunanca imata mana ricui tucunguichu.
43 Canta pꞌiñajcuna cambaj muyundijta puntajlla jatun caspicunata shayachishpa, tucui ladocunamanta llaquichina punllami chayamunga.
44 Paicunami cantapish, cambaj huahuacunatapish pambaman urmachingacuna. Dios juzganaman shamushcataca mana intindishcanguichu. Chaimantami cai llajtapica shuj rumillapish caishuj rumi jahuapica mana saquiringa” nircami.
45 Chai qꞌuipami Jesusca Diospaj huasiman yaicushpaca chaipi cꞌatucujcunata llujshichishpa cacharca.
46 Chashna rurashpami: “Quillcachishcapica ‘Ñuca huasica ñucata mañana huasi nishcami canga’ ninmi. Ashtahuanpish cancunaca shuhuacunapaj huasitamari rurashcanguichij” nirca.
47 Jesusca punllantami Diospaj huasipica yachachishpa catirca. Shinapish sacerdotecunata mandajcunapish, mandashcacunata quillcajcunapish, llajtata pushajcunapish paita ima shina huañuchinatami mashcacurcacuna.
48 Ashtahuanpish Jesuspaj muyundijpica tucui gentecunami cushicushpa pai yachachishcata uyacurcacuna. Chaimantami paicunaca Jesusta ima shina huañuchinataca mana yacharcacuna.
Notacuna
^ O “sicómoro”.
^ Griego rimaipica: “Amitotaca” ninmi.
^ Griegocunapajca shuj minaca 340 gramocunatami charij carca. Shuj minataca casi quimsa quillacunata trabajashcamantami pagajcuna carca.
^ Griego rimaipica: “plata” ninmi.
^ Griego rimaipica: “plata” ninmi.
^ “Jehová” shutita huasha diccionariopi ricui.
