Lucas 20:1-47
-
“¿Pitaj canmanca poderta curcari?” nishpa Jesusta tapushcamanta (1-8)
-
Huañuchij tarpujcunamanta chꞌimbapurai (9-19)
-
Diosmantapish, Cesarmantapish (20-26)
-
Huañushcacuna causarinamantami tapurcacuna (27-40)
-
¿Cristoca Davidpaj churichu can? (41-44)
-
“Mandashcacunata quillcajcunamanta cuidaringuichij” nishcamanta (45-47)
20 Shuj punllaca Jesusca Diospaj huasipimi gentecunaman yachachicurca, alli huillaicunatapish huillacurca. Chaipimi sacerdotecunata mandajcunapish, mandashcacunata quillcajcunapish, autoridadcunapish* Jesuspajman shamurcacuna.
2 Paicunaca: “Huillai, ¿pi mandajpitaj caicunataca ruracunguiyari? ¿Pitaj canmanca poderta curcari?” nishpami tapurcacuna.
3 Chashna tapujpimi Jesusca cashna cutichirca: “Ñucapish cancunataca caitami tapusha nini, cutichichij.
4 Juan bautizachunca, ¿pitaj cacharca? ¿Jahua pacha Dios o runacuna?” nirca.
5 Chaimi paicunapura yuyarinacushpaca cashna ninacurcacuna: “Jahua pacha Diosmi cacharca nijpica: ‘¿Imamantataj pai huillashcataca mana crircanguichijyari?’ ningami.
6 Cutin ‘runacunami cacharca’ nijpica tucui gentecunami rumicunahuan ñucanchijtaca shitangacuna. Paicunaca Bautizaj Juantaca shuj profeta cashcatami crincuna” ninacurcacunami.
7 Chaimantami paicunaca: “Pi cachashcataca mana yachanchijchu” nishpa cutichircacuna.
8 Chaimi Jesusca: “Ñucapish pi mandajpi caicunata ruracushcataca mana huillanichu” nirca.
9 Chai qꞌuipami Jesusca cai chꞌimbapuraicunata churashpa gentecunaman parlarca: “Shuj chagrayuj runaca uvacunatami tarpurca. Chai qꞌuipami uva chagrata shujtaj tarpujcunaman arrendachishpa,* achca huatacunata caru llajtaman rirca.
10 Uvacunata cosechana punlla chayamujpimi chagrayuj runaca, pai japina cashcata japingapaj tarpuj runacunapajman paita sirvijta cacharca. Ashtahuanpish paicunaca chai sirvij runataca macashpami, chushaj maquillata tigrachishpa cacharcacuna.
11 Chai runaca cutinllatajmi shujtaj sirvijta cacharca. Paitapish macashpa, pingaipi churashpami chushaj maquillata tigrachishpa cacharcacuna.
12 Chashna rurajpipish chagrayuj runaca cutinllatajmi shujtaj sirvijta cacharca. Caihuanca ñami quimsa sirvijcunata cacharca. Paitapish macashpami chaimanta llujshichishpa cacharcacuna.
13 Chai qꞌuipami chagrayuj dueñoca: ‘¿Imatataj rurashari? Ñuca churitaca respetangacunami’ nishpami tarpuj runacunapajman paipaj cꞌuyashca churita cacharca.
14 Tarpuj runacuna chagrayujpaj churita ricushpaca, paicunapura parlanacushpami: ‘Paimari herenciataca japigrin. Paita huañuchishpa, pai japina herenciata japishunchij’ nircacuna.
15 Chaimantami paitaca uva chagramanta llujshichishpa huañuchircacuna. Shinaca ¿uva chagrayuj runaca paicunataca imatashi ruranga?
16 Pai shamushpaca chai tarpuj runacunata huañuchishpami uva chagrataca shujtaj tarpujcunaman cunga” nircami.
Chai chꞌimbapuraita uyashpami gentecunaca: “¡Chaica amataj tucuchun!” nircacuna.
17 Shina nijpimi Jesusca paicunata ricurashpaca cashna nirca: “Shina cajpica: ‘Huasita rurajcuna mana nishpa shitashca rumillatajmi, pircacunata jahua esquinapi tandachij rumi* tucushca’ nishpa quillcashca shimicunaca, ¿imatataj nisha nin?
18 Maijanpish cai rumi jahuapi urmajca yallitajmi chugriringa. Shinallataj maijanpaj jahuapi cai rumi urmashpaca tucuimi ñutunga” nircami.
19 Chai chꞌimbapuraita uyashpami mandashcacunata quillcajcunapish, sacerdotecunata mandajcunapish paicunapi yuyashpa parlacushcata cuentata curcacuna. Chaimantami Jesustaca chai rato japishun nircacuna. Shinapish gentecunatami mancharcacuna.
20 Chaimi Jesús parlacushpa imapi pandarijpi juchachishpa mandajcunapaj maquipi, llajtata mandajpaj maquipi churangapaj huaquin runacunata pacalla pagashpa cacharcacuna. Chai runacunaca cashcata rurajcuna shina tucushpami
21 cashna nishpa tapurcacuna: “Yachachij, canca alajatami parlangui, mana pandarishpami yachachingui. Pitapish jahua ñahuillataca mana ricunguichu. Diosmantapish mana llullashpami yachachingui. Chaitaca ñucanchijca allimi yachanchij.
22 Shinaca ¿Cesarman* impuestocunata paganaca allichu canga o mana?” nircacuna.
23 Ashtahuanpish Jesusca paicuna pandachisha nishpa chashna tapucushcata yachashpami cashna cutichirca:
24 “Shuj denario* cullquita ricuchichij. ¿Cai cullquipica pipaj ñahuitaj, pipaj shutitaj quillcashca tiyacun?” nirca. Chaimi paicunaca: “Cesarpajmi” nircacuna.
25 Chashna nijpimi Jesusca: “Cesarman cuna cashcataca Cesarman cuichij. Diosman cuna cashcataca Diosman cuichij” nirca.
26 Jesús ima shina cutichijta uyashpami paicunaca mancharishpa upalla saquirircacuna. Chaimantami gentecunapaj ñaupajpi tapushpapish imata mana juchachi tucurcacuna.
27 Chai qꞌuipaca huaquin saduceocunami Jesuspajman shamurcacuna. Paicunaca huañushcacuna causarinataca mana crincunachu. Chaimantami cashna tapurcacuna:
28 “Yachachij, Moisesca: ‘Shuj cazado runa huahuacunata manaraj charishpa huañujpica, viuda huarmihuanca paipaj huauquillataj cazarashpa, huauquipaj randi huahuacunata charichun’ nishpami quillcarca.
29 Ricungui, shuj familiapica canchis huauquicunami tiyarca. Punta huauqui cazarashpaca huahuacunata manaraj charishpami huañurca.
30 Qꞌuipa huauquipish,
31 chaipaj qꞌuipa huauquipishmi chai huarmihuanca cazararcacuna. Tucui canchis huauquicuna chai huarmihuan cazarashpapish huahuacunata mana charishpami huañurcacuna.
32 Chai huashaca huarmipishmi huañurca.
33 Shinaca huañushcacuna causarina punllapica, ¿maijanpaj huarmishi paica canga? Canchis huauquicunamari chai huarmihuanca cazararcacuna” nircacunami.
34 Shina nijpimi Jesusca cashna cutichirca: “Cai pacha* gentecunaca* cazarancunami,
35 ashtahuanpish huañushcacunapaj chaupimanta causarishpa shamuj punllacunapi* causangapaj agllashcacunaca mana cazarangacunachu.
36 Paicunaca mana huañungacunachu. Angelcuna shinami cangacuna. Huañushcacunapaj chaupimanta causachishca cashcamantami paicunaca Diospaj huahuacuna cangacuna.
37 Moisespish rupacuj zarza yuramanta* quillcashpaca huañushcacuna causarinamantapishmi parlarca. Paica Jehová* Diostaca: ‘Abrahanpaj, Isaacpaj, Jacobpaj Diosmi can’ nircami.
38 Paica huañushcacunapaj Diosca mana canchu. Ashtahuanpish causajcunapaj Diosmi can. Diospajca* tucuicunami causacuncuna” nircami.
39 Chaita uyashpami mandashcacunata quillcajcunamanta maijancunaca: “Yachachij, allimi cutichishcangui” nircacuna.
40 Chai qꞌuipaca paicunaca ña mana imata ashtahuan tapui tucurcacunachu.
41 Chaimi Jesusca paicunataca cashna nishpa tapurca: “¿Ima nishpataj gentecunaca Cristoca Davidpaj churimi can nincuna?
42 Salmos* libropica Davidllatajmi cashna nin: ‘Jehová* Diosca ñuca Amitotaca: “Ñuca alli ladopi tiyari.
43 Canta pꞌiñajcunata cambaj chaqui sarunapi churangacama” nircami’.
44 Davidllataj Amito nijpica, ¿ima shinataj Cristoca Davidpaj churi cangari?” nircami.
45 Chai qꞌuipaca tucui gentecuna uyacujpimi Jesusca paita catijcunataca cashna nirca:
46 “Mandashcacunata quillcajcunamanta cuidaringuichij. Paicunaca chaqui puntacama churanata churarishcami purinata munancuna. Plazacunapipish shujtajcuna saludachunmi munancuna. Sinagogacunapipish* ashtahuan alli asientocunapimi tiyarinata munancuna. Shinallataj jatun micuicunapipish alli puestocunapimi tiyarinata munancuna.
47 Paicunaca viudacunapaj imalla charishcacunatapishmi* quichuncuna. Shinallataj shujtajcuna alli nichunllami* uniyashpa Diosta mañancuna. Chaimantami paicunaca shujtajcunata yalli llaquichishca cangacuna” nircami.
Notacuna
^ Griego rimaipica: “ancianocunapish” ninmi.
^ O “partido saquishpa”.
^ O “caishuj rumicunamanta yalli importante rumi”.
^ “César” shutita huasha diccionariopi ricui.
^ “Denario” shimita huasha diccionariopi ricui.
^ Griego rimaipica: “aión” ninmi. “Cai pacha” shimita huasha diccionariopi ricui.
^ O “cai pachapaj huahuacunaca”.
^ Griego rimaipica: “aión” ninmi. “Shamuj punlla” shimita huasha diccionariopi ricui.
^ Caipica shuj uchilla casha yuramantami parlacun.
^ “Jehová” shutita huasha diccionariopi ricui.
^ O “Paipaj ñaupajpica”.
^ “Salmo” shimita huasha diccionariopi ricui.
^ “Jehová” shutita huasha diccionariopi ricui.
^ O “Tandanacuna huasicunapipish”.
^ Griego rimaipica: “huasicunatapishmi” ninmi.
^ O “nij tucushpallami”.
