Lucas 5:1-39
5 Shuj punllami Jesusca Genesaret cucha* cꞌuchupi carca. Chaipica Diospaj shimita Jesús huillacujpi uyangapajmi achca gentecuna tꞌangarinacushpa paipaj muyundijpi shayarircacuna.
2 Chaipi cashpami Jesusca cucha uripi ishqui barcocuna shayacujta ricurca. Pescadocunata japij runacunaca barcocunamanta uriyashpami pescadota japina mallacunata* tajshacurcacuna.
3 Chaipi shayacuj barcocunamantaca shujca Simonpajmi carca. Jesusca chai barcoman huichiyashpami Simontaca chai barcota yacu urimanta ashata caruyachichun mañarca. Chai barcopi tiyarishpami tucui chaipi caj gentecunaman yachachi callarirca.
4 Ña tucuita parlashca qꞌuipami Jesusca Simontaca: “Barcota hondo yacuman apashpa, pescadocunata japingapaj chaipi mallata shitaichij” nirca.
5 Shina nijpimi Simonca: “Yachachij, tucui tutami mana samarishpa trabajashcanchij. Shinapish imata mana japishcanchijchu. Ashtahuanpish can mandashcamantami mallataca yacuman shitasha” nirca.
6 Paicuna mallata yacupi shitashpaca achca pescadocunatami japircacuna. Yallitaj pescadocuna jundajpimi mallaca lliquiri callarirca.
7 Chaimi caishuj barcopi caj paicunahuan tandalla trabajajcunataca, ayudanaman shamuchun maquihuan señasta rurashpa cayarcacuna. Paicuna shamushpaca ishquindij barcopimi pescadocunataca jundachircacuna. Yallitaj junda cajpimi barcocunaca yacupi pambari callarirca.
8 Chaita ricushpami Simón Pedroca Jesuspaj ñaupajpi cungurishpaca: “Amito, ñucamanta anchuri, ñucaca yallitaj juchayujmi cani” nirca.
9 Pedropish paihuan cajcunapish pescadocunata chashna japishcamantami yallitaj mancharircacuna.
10 Zebedeopaj churi Santiagopish, Juanpish chashnallatajmi mancharircacuna. Paicunaca Simonhuanmi tandalla trabajajcuna carca. Chaita ricushpami Jesusca Simontaca: “Ama manchaichu. Cunanmantaca pescadocunata mashcaj shinami gentecunata mashcangui” nirca.
11 Chashna nijpimi paicunaca barcocunata yacu uriman tigra apamushpa, chaipi tucuita saquishpa Jesusta catircacuna.
12 Shujtaj cutinca Jesús shuj llajtapi cajpimi lepra* ungüihuan anchayashca runa ricurirca. Chai runaca Jesusta ricushpami paipajman cꞌuchuyarca. Paipaj ñaupajpi cungurishpaca: “Amito, can jambisha nishpaca ñucata jambihuai” nirca.
13 Chashna nijpimi Jesusca paipaj maquita chutashpa chai runata tuparishpaca: “Ari jambisha ninimi. Alli tucuilla”* nirca. Jesús chashna nijpica ñapish chai runaca lepra ungüimanta alliyarcallami.
14 Chai runata alliyachishpaca ama piman huillangui nishpami Jesusca mandarca. Shina nishca qꞌuipaca: “Sacerdotecunapaj ñaupajpi ricurigri. Can alliyashcamantaca Moisesman cushca leypi nishca shina shuj ofrendata cugri. Chashnami paicunaca can alliyashcata yachangacuna” nircami.
15 Chashna nijpipish Jesús imallata rurashcataca ashtahuan ashtahuanmi yachaj chayarcacuna. Chaimi Jesusta uyangapaj, paicunapaj ungüicunata jambichunpish achca gentecuna tandanacujcuna carca.
16 Shinapish Jesusca siempremi pi mana causan chulunlla ladoman rishpa Diosta mañaj carca.
17 Shuj punllaca Jesusca shuj huasipimi yachachicurca. Chaipica fariseocunapish, Moisesman cushca leyta yachachijcunapishmi tiyacurcacuna. Paicunaca Galileamanta, Judeamanta, Jerusalenmantapishmi shamushcacuna carca. Jehová* Diosmi ungushcacunata jambichun Jesusmanca poderta curca.
18 Chaipimi huaquin runacunaca mana cuyuri tucuj runata shuj camillapi huandushpa apamurcacuna. Paicunaca Jesús yachachicun ucuman yaicushpami paipaj ñaupajpi churanata yuyarcacuna.
19 Ashtahuanpish achca gentecuna chaipi junda cashcamantami ungushcahuan maita mana yaicui tucushpa, huasi jahuaman huichiyarcacuna. Chaimantaca huasi tejata anchuchishpami ungushcataca tucuicunapaj chaupiman camillapi uriyachishpa Jesuspaj ñaupajpi churarcacuna.
20 Jesusca paicuna crishcata ricushpami, mana cuyuri tucuj runataca: “Cambaj juchacunataca perdonanimi” nirca.
21 Shina nijpimi mandashcacunata quillcajcunapish, fariseocunapish: “¿Diosta cꞌamingapajca cai runaca pitajyari? Juchacunataca pi mana perdonai tucunchu. Diosllamari perdonai tucun” nishpa yuyacurcacuna.
22 Shinapish Jesusca chashna yuyacujta yachashpami paicunataca: “¿Ima nishpataj cancunapaj shungupica chashna yuyacunguichij?
23 ¿Imata ninataj ashtahuan jahualla canga? ¿‘Cambaj juchacunaca perdonashcami’ nina, mana cashpaca ‘jatarishpa puri’ nina?
24 Runapaj Churi cai pachapi causajcunapaj juchacunata perdonangapaj poderta charishcata yachachunmi munani...” nirca. Chai qꞌuipaca mana cuyuri tucuj runata ricushpami: “Ñucaca cashnami nini: Jatari, cambaj camillata apashpa cambaj huasiman rilla” nirca.
25 Chashna nijpimi chai runaca paicunapaj ñaupajpi shayarirca. Pai siricushca camillata japishpami Diosta jatunyachishpa paipaj huasiman rirca.
26 Chaita ricushpami tucui chaipi cajcunaca mancharishpa Diosta jatunyachi callarircacuna. Chashna yallitaj mancharinacushpami paicunaca: “Cunanca sumaj ruraicunatamari ricushcanchij” nircacuna.
27 Chai qꞌuipami Jesusca chaimanta llujshishpaca Leví* shuti runa impuestota cobrana ucupi tiyacujta ricurca. Paita ricushpaca: “Shamui, ñucata cati” nircami.
28 Shina nijpimi Leví runaca jatarishpa, tucuita saquishpa Jesusta catirca.
29 Chai qꞌuipami Leví runaca Jesusta chasquingapaj shuj jatun micuita paipaj huasipi rurarca. Chaipica impuestota cobraj achca runacunapish, shujtaj gentecunapishmi paicunahuan micucurcacuna.*
30 Chaita ricushpami fariseocunapish, mandashcacunata quillcajcunapish Jesusta catijcunataca: “¿Ima nishpataj impuestota cobrajcunahuan, juchayujcunahuan cancunaca micunguichij, ubyanguichij?” nishpa rimarcacuna.
31 Chashna nijta uyashpami Jesusca cashna nirca: “Sano gentecunaca jambijtaca mana minishtincunachu. Ungushcacunami jambijtaca minishtincuna.
32 Ñucaca cashcata rurajcunata cayanamanca mana shamurcanichu. Ashtahuanpish juchayujcunatami arrepintirichun cayanaman shamurcani” nircami.
33 Jesús chashna nijpimi paicunaca: “Bautizaj Juanta catijcunapish, fariseocunata catijcunapish cutin cutinmi ayunancuna. Diostapish rogarishpami mañancuna. Cutin canta catijcunaca micunllacunami, ubyanllacunami” nircacuna.
34 Shina nijpimi Jesusca cashna nirca: “Novio paipaj amigocunahuan cajpica paicuna ayunachunca mana mañanguichijchu ¿nachu?
35 Ashtahuanpish noviota paicunamanta quichuna punllaca chayamungami. Chai punllami paicunaca ayunangacuna” nircami.
36 Jesusca cai chꞌimbapuraitapishmi churarca: “Maijanpish mushuj telata pꞌitishpa mauca churanataca mana siranchu. Chashna rurajpica mushuj tela chutarishpami mauca churanataca ashtahuan lliquinga. Ashtahuanpish mushuj telaca mauca churanapica mana alli ricuringachu.
37 Shinallataj maijanpish mushuj vinotaca, mauca capachucunapica* mana churanchu. Chashna churajpica mushuj vinoca capachucunata tugyachishpami jicharinman. Capachucunapish ña imapaj mana valinmanchu.
38 Chaimantami mushuj vinotaca mushuj capachucunapi churana can.
39 Maijanpish pꞌucushca vinota ubyashpaca mushuj vinotaca mana ubyasha ninmanchu. ‘Pꞌucushca vinomi ashtahuan alli’ ninmanmi” nircami.
Notacuna
^ Caipica Galilea mama cuchamantami parlacun.
^ O “linchicunata”, “atarrayacunata”.
^ “Lepra” shimita huasha diccionariopi ricui.
^ O “Limpio saquirilla”.
^ “Jehová” shutita huasha diccionariopi ricui.
^ “Leví” shutica Mateopaj caishuj shutimi.
^ O “mesapi tiyacurcacuna”.
^ “Capachu” shimita huasha diccionariopi ricui.
