Lucas 8:1-56
-
Jesusta compañaj huarmicunamanta (1-3)
-
Tarpuj runamanta chꞌimbapurai (4-8)
-
¿Jesusca imamantataj chꞌimbapuraicunahuan yachachirca? (9, 10)
-
Tapuj runamanta chꞌimbapurai ima nisha nishcamanta (11-15)
-
Maijanpish lamparataca mana tapanchu nishcamanta (16-18)
-
Jesuspaj mamamanta, paipaj huauquicunamantapish (19-21)
-
Yacutapish, huairatapish Jesús casijlla cai nishcamanta (22-25)
-
Demoniocunata cuchicunapi yaicuchun cachashcamanta (26-39)
-
Jairopaj ushushimanta, shuj huarmi Jesuspaj churanapi tuparishcamantapish (40-56)
8 Chai qꞌuipami Jesusca paipaj 12 apostolcunandij chꞌican chꞌican llajtacunapi, chꞌican chꞌican uchilla pueblocunapi Diospaj Gobiernomanta alli huillaicunata huillashpa purirca.
2 Shinallataj millai espiritucunamanta alliyashca huarmicunapish, ungüicunamanta alliyashca huarmicunapishmi Jesushuanca purijcuna carca. Canchis demoniocunamanta* alliyashca Magdalena nishca Mariapish,
3 rey Herodespaj* huasipi mandaj Cuza shuti runapaj huarmi Juanapish, Susana shuti huarmipish, shujtaj achca huarmicunapishmi paicunahuan carca. Cai tucui huarmicunami imalla charishcacunahuan Jesustapish, paita catijcunatapish ayudajcuna carca.
4 Achca gentecunami Jesushuan, chꞌican chꞌican llajtacunamanta paihuan purijcunahuanpish tandanacurcacuna. Paicunamanmi cai chꞌimbapuraita churashpa Jesusca yachachirca:
5 “Shuj tarpuj runaca muyuta tarpunamanmi llujshirca. Pai tarpucujpica asha muyuca ñanpimi urmarca. Ñanpi urmashca muyutaca gentecunami sarurcacuna, pajarocunapishmi micurcacuna.
6 Cutin asha muyuca rumilla allpapimi urmarca. Huiñashca qꞌuipaca yacu mana tiyashcamantami chaquirirca.
7 Cutin asha muyuca cashacuna chaupipimi urmarca. Cashacuna igual huiñajpimi chai muyuca mana huiñai tucurca.
8 Cutin asha muyuca alli allpapimi urmarca. Chai tarpushca muyu huiñashpaca cada unomi 100 cutinhuan yalli pꞌucurca” nircami. Chaita nishca qꞌuipami Jesusca: “¡Uyasha nijca, alli uyachun!” nishpa sinchita caparirca.
9 Shinapish Jesusta catijcunaca chai chꞌimbapurai ima nisha nishcatami paitaca tapurcacuna.
10 Chashna tapujpimi Jesusca: “Diosca paipaj Gobiernomanta pi mana yachai tucushcacunata intindichunmi cancunata ayudashca. Ashtahuanpish shujtajcunamanca chꞌimbapuraicunata churashpami yachachini. Paicunaca ricushpapish imata mana ricuncunachu. Uyashpapish imata mana intindincunachu.
11 Cai chꞌimbapuraica caitami nisha nin. Muyuca Dios huillashca shimimi.
12 Ñanpi urmashca muyu shinaca Diospaj shimita uyajcunami. Shinapish Diablo shamushpami paicuna ama crichun, ama quishpirichunpish paicuna uyashca shimita paicunapaj shungumanta anchuchin.
13 Cutin rumilla allpapi urmaj muyu shinaca Diospaj shimita uyashpa cushilla chasquijcunami. Shinapish paicuna uyashca shimicuna mana sapiyajpimi asha tiempota crishpapish, llaquicuna ricurijpica crishcata saquinllacuna.
14 Cutin casha chaupipi urmashca muyu shinaca Diospaj shimita uyajcunami. Shinapish cunan punlla causaipaj yallitaj sustarishpa, charijyana munaicuna, aicha munaicunapish pandachijpimi ahogarishpa ima alli granota mana pꞌucuncuna.
15 Ashtahuanpish alli allpapi urmaj muyu shinaca alli shunguhuan Diospaj shimita uyashpa, huillashcata mana cungarijcunami. Chaimantami llaquicuna japijpipish ahuantashpa alli granota pꞌucun.
16 Maijanpish shuj lamparata japichishpaca mana canastahuan tapanchu, cama ucupipish mana churanchu. Ashtahuanpish huasiman yaicujcuna luz achijyachicujta ricuchunmi shuj mesa jahuapi churan.
17 Pacallapi cashcacunaca mana ima pacalla saquiringachu. Shinallataj ama yacharichun nishpa alli pacashca tiyacujpish ima horaca tucuimi yacharinga.
18 Imata uyacushcataca alli uyaichij. Imata intindijmanca Diosca ashtahuanmi intindichinga. Shinapish imata mana intindijmanca, ashallata intindishcatapish Diosca quichungami” nircami.
19 Chaipimi Jesuspaj mamapish, huauquicunapish paita ricunaman shamurcacuna. Achca gentecuna chaipi cashcamantami paipajmanca mana cꞌuchuyai tucurcacuna.
20 Chaimi gentecunaca: “Cambaj mamapish, cambaj huauquicunapish canta ricushun nishpami canllapi shayacuncuna” nircacuna.
21 Shina nijpimi Jesusca: “Ñuca mama, ñuca huauquicunaca Diospaj shimita uyashpa pajtachijcunami” nirca.
22 Shuj punllaca paita catijcunandijmi Jesusca shuj barcoman huichiyarca. Chaipimi Jesusca paita catijcunataca: “Cucha caishuj ladoman jacuchij” nirca. Chai qꞌuipaca rircallacunami.
23 Barcopi ricushpami Jesusca dormirirca. Chaipica ñapishmi sinchi huaira shamushpa yacuta jatarichirca. Chashna tucujpimi yacuca barcopi jundai callarirca. Yacu jundajpimi barcoca yacupi huashicugrirca.*
24 Chaimi Jesusta catijcunaca paita rijchachinaman rishpaca: “¡Yachachij! ¡Yachachij! ¡Huañugrinchijmari!” nircacuna. Chashna nijpimi Jesusca jatarishpa huairatapish, yacutapish sinchita rimarca. Shina rimajpimi tucui casijlla tucurca.
25 Chai qꞌuipami Jesusca: “¿Dios ayudanataca ima nishpataj mana cringuichij?” nishpa tapurca. Shinapish achcata mancharinacushpami paicunapuraca: “¿Cai runaca pitaj canyari? Pai mandajpica huairapish, yacupish cazunllamari” nircacuna.
26 Chaimantaca Galilea llajta caishuj lado cucha uripi caj Gerasa llajtamanmi chayarcacuna.
27 Barcomanta Jesús uriyajpica demonio japishca shuj runami paita tupanaman shamurca. Chai runaca chai cꞌuchulla llajtamantami carca. Paica achca tiempotami lluchulla, huasipi mana causashpa panteonpi causaj carca.
28 Chai runa Jesusta ricushpaca caparishpami paipaj ñaupajpi cungurirca. Chashna cungurishpami: “¿Jatun Diospaj Churi Jesús, imata ninamantaj shamunguiyari? Ñucata ama llaquichichunmi rogani” nishpa sinchita caparirca.
29 (Jesusca millai espiritutaca chai runamanta llujshichunmi mandacushca carca. Achca cutinmi chai runataca millai espirituca japishca carca.* Chaimantami paitaca cutin cutin cadenacunahuan chaquicunapi, maquicunapi huatashpa cuidachun churashcacuna carca. Chashna churajpipish, cadenacunataca pꞌitijllami carca. Shinallataj millai espirituca mai shitashca pambamanmi paitaca apajlla carca).
30 Jesusca: “¿Ima shutitaj cangui?” nishpami tapurca. Chashna tapujpimi: “Legión* shutimi cani” nirca. Achca demoniocuna chai runapi yaicushcamantami chashna cutichirca.
31 Chai demoniocunaca jatun jutcuman* ama cachachunpishmi rogarircacuna.
32 Chai urcu quinripica achca cuchicunami micucurcacuna. Chaita ricushpami millai espiritucunaca, chai cuchicunapi yaicunaman cachachun rogarircacuna. Chashna rogarijpimi Jesusca richun saquirca.
33 Chaimi demoniocunaca chai runamanta llujshishpaca cuchicunapi yaicurcacuna. Shina yaicujpimi achca cuchicuna cꞌacata* huashicushpa cucha yacupi ahogarircacuna.
34 Chaita ricushpami cuchicunata cuidaj runacunaca callpashpa rishpa imalla tucushcata pueblopi causajcunaman, campopi causajcunamanpish huillarcacuna.
35 Chashna huillajpimi gentecunaca ima tucushcata ricunaman rircacuna. Chai gentecuna Jesús maipi cashcaman chayashpaca demonio japishca runa churanatapish churarishca, ña alli yuyaiyuj Jesuspaj ñaupajpi tiyacujtami ricurcacuna. Chaita ricushpami achcata mancharircacuna.
36 Demonio japishca runata Jesús ima shina alliyachishcata ricujcunami, gentecunamanca tucuita parlarcacuna.
37 Chashna parlajpimi paicunaca yallitaj mancharircacuna. Chaimantami Gerasa llajta ladocunapi causajcunaca, paicunapaj llajtamanta richun Jesustaca mañarcacuna. Chaimi Jesusca chaimanta ringapaj barcoman huichiyarca.
38 Jesús barcoman huichiyacujpica demonio japishcamanta alliyashca runaca paitapish pushachunmi rogarca. Chashna rogajpipish Jesusca chai runataca cashna nishpami cacharca:
39 “Huasiman tigrashpa rilla. Canmanta Dios imata rurashcatapish tucuicunaman huillagri” nirca. Shina nijpimi chai runaca, Jesús paimanta imata rurashcata tucui pueblopi huillashpa rirca.
40 Galilea llajtaman Jesús tigrajpica gentecunaca allimi chasquircacuna. Paitaca tucuicunami shuyacushcacuna carca.
41 Chaipimi sinagogata* pushaj Jairo shuti runa Jesuspajman shamurca. Jesuspaj ñaupajpi cungurishpaca paipaj huasiman richunmi rogarirca.
42 Paica casi 12 huatacunata charij shujlla* ushushitami charirca. Chai ushushimi ña huañucurca.
Jesús chaiman ricujpica achca gentecunami llapirinacushpa caticurcacuna.
43 Chai gentecunapurapica yahuar cachariricuj ungushca shuj huarmipishmi carca. Paica 12 huatacunatami chai ungüitaca charishca carca. Paitaca ni pi mana jambi tucushcachu carca.
44 Chai huarmica Jesuspaj huashata shamushpami paipaj jahua churana puntapi tuparirca. Chashna tuparijpimi yahuarca chai rato chaquirirca.
45 Chaimi Jesusca: “¿Pitaj ñucapi tuparirca?” nishpa tapurca. Chashna tapujpimi tucuicuna ñucanchijca mana tuparishcanchijchu nircacuna. Ashtahuanpish Pedroca: “Yachachij, cambaj huashataca achca gentecunami llapirinacushpa shamucun” nirca.
46 Chashna nijpimi Jesusca: “Maijantajshimi ñucapica tuparirca. Ñucamanta poder llujshishcatami sintini” nirca.
47 Chai huarmica paihuan ima tucushcata mana ashtahuan pacai tucushpami chujchushpa Jesuspajman cꞌuchuyarca. Jesuspaj ñaupajpi cungurishpaca imamanta tuparishcata, ima shina chai rato alliyashcatapishmi tucuicunapaj ñaupajpi huillarca.
48 Chashna huillajpimi Jesusca: “Huahua, canca feta charishcamantami alliyashcangui. Ama manchashpa rilla” nirca.
49 Jesús chashna nicujpirajmi Jairopaj huasimanta shuj runa shamushpaca: “Cambaj ushushica ñami huañushca. Yachachijtaca ama ashtahuan pꞌiñachichu” nirca.
50 Chashna nijta uyashpami Jesusca Jairotaca: “Ama manchaichu,* feta charishcata ricuchilla, paica causangami” nirca.
51 Jairopaj huasiman chayashpaca Pedrota, Juanta, Santiagota, chai huahuapaj yaya mamata pushashpallami Jesusca yaicurca. Pi shujtaj yaicuchunca mana saquircachu.
52 Chai huahua huañushcamantaca tucuicunami llaquirishpa pechopi huajtaricurcacuna, huacacurcacunapish. Chaimantami Jesusca: “Ama ashtahuan huacaichijchu, huahuaca mana huañushcachu dormicunllami” nirca.
53 Chaita uyashpami chaipi cajcunaca paimanta burlarishpa asircacuna. Paicunaca chai huahua huañushcataca allimi yacharcacuna.
54 Ashtahuanpish Jesusca huahuata maquimanta japishpaca: “Huahua, ¡jatari!” nishpami cayarca.
55 Chashna cayajpimi huahuaca chai rato causarirca.* Chaimi Jesusca huahuaman imallatapish caraichij nishpa mandarca.
56 Shinapish huahuapaj yaya mamaca yallitajmi cushicurcacuna. Ashtahuanpish Jesusca ima tucushcataca ama piman huillanguichij nishpami paicunataca mandarca.
Notacuna
^ O “supaicunamanta”.
^ “Herodes” shimita huasha diccionariopi ricui.
^ O “pambarigrirca”.
^ Caitaca “achca tiempotami sinchita charicushca carca” nishpapishmi traducishcacuna.
^ Roma llajta soldadocunaca shuj legionpica 4 mil a 6 mil soldadocunami tandanacujcuna carca.
^ “Jatun jutcu” shimita huasha diccionariopi ricui.
^ O “ucu quinrita”.
^ O “tandanacuna huasita”.
^ Griego rimaipica: “pailla” ninmi.
^ O “Manchaita charinata saqui”.
^ Griego rimaipica: “paipaj espíritu tigrarca” ninmi.
