Mateo 21:1-46
-
Jesusca Jerusalenmanmi yaicurca (1-11)
-
Jesusca Diospaj huasimantami cꞌatujcunata llujshichishpa cacharca (12-17)
-
Jesusca higo yuratami maldicirca (18-22)
-
“¿Pi mandajpitaj caicunataca ruracunguiyari?” nishpa tapushcamanta (23-27)
-
Ishqui churicunamanta chꞌimbapurai (28-32)
-
Huañuchij tarpujcunamanta chꞌimbapurai (33-46)
-
Jahua esquinapi tandachij rumita mana nishpa shitashcamanta (42)
-
21 Jerusalenman cꞌuchuyamushpaca Betfagué pueblomanmi chayarcacuna. Chai puebloca Olivos yuracuna tiyan urcupimi saquirin. Chaipi cashpami Jesusca paita ishqui catijcunata cachashpa
2 cashna nirca: “Chai chꞌimbanijpi caj uchilla puebloman richij. Chaiman chayashpaca shuj mama burrota malta burritondij huatashca shayacujtami ricunguichij. Chaicunata cacharishpa pushamugrichij.
3 Pi imata nijpica: ‘Ñucanchij Amitomi burrocunataca minishtin’ ninguichij. Chashna nijpica pushachun saquingallami” nircami.
4 Tucui caicunaca Dios paipaj profetaman huillachishca pajtarichunmi chashna tucurca. Profetaca cashnami nirca:
5 “Sionpaj ushushimanca:* ‘¡Ricui! Canta jatun mandajca cambajmanmi shamucun. Paica manso shungumi, shuj burropi tiyarishcami shamucun. Aparij burropaj huahua malta burritopimi paica tiyarishca shamucun nichij’” nircami.
6 Chaimi Jesusta catijcunaca chaimanta rishpa Jesús mandashca shina rurarcacuna.
7 Mama burrota malta burritondij pushamushpaca paicunapaj jahua churanacunatami burrocunapaj jahuapi churarcacuna. Chaimi Jesusca malta burritopi tiyarirca.
8 Achca gentecunami paicunapaj jahua churanacunata Jesús rina ñanpi tindircacuna. Cutin shujtajcunaca yuracunamanta ramacunata pꞌitishpami ñanpi churarcacuna.
9 Shinallataj ñaupashpa, catishpa rijcunaca: “¡Davidpaj Churita quishpichichunmi roganchij!* ¡Jehová* Diospaj shutipi shamujca alli nishca cachun! ¡Jahua pachapi caj Dioslla paita quishpichichunmi roganchij!” nishpami caparircacuna.
10 Jerusalenman Jesús chayajpica tucui chaipi cajcunami mancharinacushpaca: “¿Pitaj cai runaca?” nishpa tapurircacuna.
11 Chashna ninacujpimi Jesushuan shamujcunaca: “¡Paica profeta Jesusmari. Galilea llajtapi tiyaj Nazaret pueblomantamari!” nircacuna.
12 Jesusca Diospaj huasiman yaicushpami cꞌatujcunata, randijcunatapish tucuicunata llujshichishpa cacharca. Cullquita cambiajcunapaj mesacunatapish, palomacunata cꞌatujcunapaj bancocunatapish urata janajtami shitarca.
13 Chashna rurashpami Jesusca: “Quillcachishcapica ‘Ñuca huasica ñucata mañana huasi nishcami canga’ ninmi. Ashtahuanpish cancunaca shuhuacunapaj huasitamari ruracunguichij” nirca.
14 Diospaj huasipi Jesús cajpimi ñahui mana ricujcunapish, cojocunapish paipajman cꞌuchuyarcacuna. Chaipimi paicunataca jambirca.
15 Sacerdotecunata mandajcunapish, mandashcacunata quillcajcunapish Jesús chai milagrocunata rurajta ricushpa, uchilla huambritocunapish: “¡Davidpaj Churita quishpichichunmi roganchij!”* nishpa Diospaj huasipi caparicujta uyashpaca achcatami pꞌiñarircacuna.
16 Chaimantami Jesustaca: “¿Cai huambracuna imata nicujtaca uyanguichu?” nircacuna. Shina nijpimi Jesusca: “Ari, uyanitajmari. ‘Uchilla huambracunapish, chuchucuj huahuacunapish alabangacunami’ nishcataca ¿cancunaca manachu liyishcanguichij?” nirca.
17 Chai qꞌuipami Jesusca Jerusalenmanta llujshishpa Betania uchilla puebloman rishpa chaipi pacarirca.
18 Jerusalenman cayandij tutamanta utca tigracushpami Jesusca yaricachirca.
19 Chaimantami ñan cꞌuchullapi shayacuj shuj higo yurata ricushpaca, chaiman cꞌuchuyarca. Shinapish chai yurapica ima granota mana japircachu. Ashtahuanpish pꞌangacunalla junda cashcatami ricurca. Chaimi chai yurataca: “Cunanmantapachaca ima granota mana pꞌucunguichu” nirca. Chashna nijpica chai higo yuraca ñapish chaquirircallami.
20 Chaita ricushpami Jesusta catijcunaca mancharinacushpa: “¿Ima nishpataj higo yuraca ñapish chaquirinyari?” nircacuna.
21 Chashna nijpimi Jesusca: “Cancunamanca mana llullanichu. Tucui shunguhuan crishpa, caita chaita mana yuyashpaca cai higo yurata ñuca chaquichishca shinallaca mana ruranguichijchu. Ashtahuanpish cai urcuta ‘Caimanta anchurishpa, mama cucha yacupi shitari’ nijpica shitaringallami.
22 Ima mañashcatapish chasquina cashcata crishpaca, japinguichijmi” nircami.
23 Chai qꞌuipami Jesusca Diospaj huasiman yaicurca. Chaipi yachachicujpimi sacerdotecunata mandajcunapish, autoridadcunapish* Jesuspajman cꞌuchuyashpaca: “¿Pi mandajpitaj caicunataca ruracunguiyari? ¿Pitaj canmanca poderta curcari?” nishpa tapurcacuna.
24 Chashna tapujpimi Jesusca cashna cutichirca: “Ñucapish cancunataca caitami tapusha nini. Cancuna cutichijpica ñucapish pi mandajpi caicunata ruracushcatami huillasha.
25 Juan bautizachunca, ¿pitaj cacharca? ¿Jahua pacha Dios o runacuna?” nirca. Chaimi paicunapura parlanacushpaca: “Jahua pacha Diosmi cacharca nijpica: ‘¿Imamantataj pai huillashcataca mana crircanguichijyari?’ ningami.
26 Cutin ‘runacunami cacharca’ nijpica caipi cajcunaca, ¿ñucanchijtaca imatashi rurangacuna? Tucuicunamari Bautizaj Juantaca shuj profeta cashcata crincuna” ninacurcacunami.
27 Chashna ninacushca qꞌuipami Jesusmanca: “Mana yachanchijchu” nishpa cutichircacuna. Chaimi Jesusca cashna nirca: “Ñucapish pi mandajpi caicunata ruracushcataca mana huillanichu.
28 ¿Imatataj yuyanguichij? Shuj runaca ishqui churicunatami charirca. Punta churipajman cꞌuchuyashpaca: ‘Huahua, uva chagrapi cunanca trabajagri’ nircami.
29 Yaya chashna mandajpimi churica: ‘Mana rishachu’ nirca. Qꞌuipataca chashna nishcamanta arrepintirishpami uva chagrapi trabajanaman rirca.
30 Qꞌuipa churipajman cꞌuchuyashpapish chai runaca chashnallatajmi mandarca. Chashna mandajpimi qꞌuipa churica: ‘Ari yayitu, rishallami’ nirca. Chashna nishca jahuapish paica mana rircachu.
31 ¿Cai ishqui churicunamantaca maijantaj yayapaj munaita rurarca?” nircami. Chashna nijpimi chai runacunaca: “Punta churimi yayapaj munaita rurarca” nircacuna. Chaimi Jesusca cashna nirca: “Cancunamanca mana llullanichu. Impuestota cobrajcunapish, huainayaj huarmicunapishmi cancunata ñaupashpa Diospaj Gobiernopica yaicungacuna.
32 Bautizaj Juanca cashcata rurana ñanta yachachingapajmi shamurca. Pai yachachishcataca cancunaca mana crircanguichijchu. Ashtahuanpish impuestota cobrajcuna, huainayaj huarmicunami Juan yachachishcataca crircacuna. Cancunaca chaita ricushpapish mana arrepintirircanguichijchu. Pai yachachishcatapish mana crircanguichijchu.
33 Cai catij chꞌimbapuraitapish uyaichij. Shuj chagrayuj amoca paipaj allpapimi uvacunata tarpurca. Chai tarpushca muyundijtami pircacunata shayachirca. Uvacunata sarungapajpish shuj jutcutami rurarca. Shinallataj shuj jatun torretami* shayachirca. Chai qꞌuipaca uva chagrata shujtaj tarpujcunaman arrendachishpami* caru llajtaman rirca.
34 Uvacunata cosechana punlla chayamujpimi chagrayuj amoca, pai japina cashcata japingapaj tarpuj runacunapajman paita sirvijcunata cacharca.
35 Amota sirvijcuna chayajpica, tarpuj runacunaca shujtaca japishpami manchanaita macarcacuna. Caishujtaca huañuchircacuna. Shujtajtaca rumicunahuanmi shitarcacuna.
36 Chagrayuj amoca cutinmi ñaupa cachashcatapish yalli shujtaj sirvijcunata cacharca. Paicunatapish chashnallatajmi rurarcacuna.
37 Ultimotaca: ‘Ñuca churitaca respetangacunami’ nishpami chagrayuj amoca paipaj churita cacharca.
38 Tarpuj runacunaca amopaj churita ricushpami paicunapura parlanacushpaca: ‘Paimari herenciataca japigrin. ¡Jacuchij, paita huañuchishpa paipaj herenciata japishunchij!’ nircacuna.
39 Chaimi amopaj churita japishpa, uva chagramanta llujshichishpa huañuchircacuna.
40 Chashna rurajcunataca chagrayuj amo shamushpaca, ¿imatashi ruranga?” nircami.
41 Jesús chashna nijpimi sacerdotecunata mandajcunapish, autoridadcunapish:* “Millaicuna cashcamantami chagrayuj amoca paicunataca tucuchinga. Uva chagratapish shujtaj tarpuj runacunamanmi arrendachinga. Paicunami cosechana punlla chayajpica japina cashcata amomanca cungacuna” nircacunami.
42 Chaimi Jesusca: “Dios quillcachishcacunapica: ‘Huasita rurajcuna mana nishpa shitashca rumillatajmi, pircacunata jahua esquinapi tandachij rumi* tucushca. Chai rumica Jehová* Diosmantami shamushca. Ñucanchijpajpish sumajmi’ ninmi. ¿Caitaca manachu nunca liyishcanguichij?
43 Chaimantami cashna nini, Diosca paipaj Gobiernotaca cancunamanta quichushpami alli granota pꞌucuj llajtaman cunga.
44 Maijanpish cai rumi jahuapi urmajca yallitajmi chugriringa. Shinallataj maijanpaj jahuapi cai rumi urmashpaca tucuimi ñutunga” nircami.
45 Chai chꞌimbapuraicunata uyashpami sacerdotecunata mandajcunapish, fariseocunapish paicunamanta parlacushcata cuentata curcacuna.
46 Chaimantami Jesusta japishun nircacuna. Shinapish gentecunata manchashcamantami mana imata rurarcacuna. Gentecunaca Jesús shuj profeta cashcatami crircacuna.
Notacuna
^ “Sionpaj ushushi” nishpaca Sion llajtamanta o chaipi causaj gentecunamantami parlacuj yuyachin.
^ Griego rimaipica: “hosanna” ninmi. Dios quishpichichun nishpa mañangapaj, cushilla cashcata ricuchingapajpishmi chashna nijcuna carca.
^ “Jehová” shutita huasha diccionariopi ricui.
^ Griego rimaipica: “hosanna” ninmi. Dios quishpichichun nishpa mañangapaj, cushilla cashcata ricuchingapajpishmi chashna nijcuna carca.
^ Griego rimaipica: “ancianocunapish” ninmi.
^ Torre jahuamantami shuhuacuna, animalcuna chagraman ama yaicuchun cuidajcuna carca.
^ O “partido saquishpami”.
^ Griego rimaipica: “ancianocunapish” ninmi.
^ O “caishuj rumicunamanta yalli importante rumi”.
^ “Jehová” shutita huasha diccionariopi ricui.
