Mateo 5:1-48
-
URCUPI YACHACHISHCACUNA (1-48)
-
Jesusca urcupimi yachachi callarirca (1, 2)
-
Cushichij iscun yuyaicunamanta (3-12)
-
Cachimanta, luzmanta (13-16)
-
Jesusca Leyta pajtachinamanmi shamurca (17-20)
-
Mana pꞌiñarinamanta (21-26), mana huainayanamanta (27-30), divorciarinamanta (31, 32), ari nishcatapish mana nishcatapish pajtachinamanta (33-37), mana chashnallataj tigrachinamanta (38-42), pꞌiñajcunata cꞌuyanamanta (43-48)
-
5 Jesusca achca gentecunata ricushpami urcuman ashata huichiyashpa chaipi tiyarirca. Chaipi tiyacujpimi paita catijcunaca paipajman cꞌuchuyarcacuna.
2 Chaipimi Jesusca cashna nishpa yachachi callarirca:
3 “Diosmanta yachana munaita yuyaipi charijcunaca* cushicuncunami. Jahua pacha Gobiernoca* paicunapajmi canga.
4 Llaquilla cajcunaca cushicuncunami. Paicunaca cushichishcami cangacuna.
5 Manso shungucunaca cushicuncunami. Diosca paicunamanmi cai allpataca cunga.
6 Yaricachij shina, yacunachij shina allita ruranata munajcunaca cushicuncunami. Paicunapaj munashcaca pajtaringatajmi.
7 Shujtajcunata llaquijcunaca cushicuncunami. Paicunatapishmi shujtajcunaca* llaquingacuna.
8 Chuya shungucunaca cushicuncunami. Paicunaca Diostami ricungacuna.
9 Shujtajcunahuan sumajta alli causajcunaca cushicuncunami. Paicunaca Diospaj huahuacuna nishcami cangacuna.
10 Cashcata ruracushcamanta catirashpa llaquichishca cajcunaca cushicuncunami. Jahua pacha Gobiernoca paicunapajmi canga.
11 Ñucata caticushcamanta gentecuna cꞌamijpi, catirashpa llaquichijpi, llullashpa ima mana allicunata cancunamanta nijpipish cushicuichij.
12 Achcata cushicuichij, jahua pachapimi cancunaca jatun bendicioncunata chasquinguichij. Ñaupa profetacunatapish cancunata llaquichij shinallatajmi llaquichircacuna.
13 Cancunaca cai pachapajca cachi shinami canguichij. Cachimanta sabor anchujpica, ¿pipish cutin saboryachi tucungachu? Mana. Ña imapaj mana valinchu. Ashtahuanpish canllaman shitajpi gentecuna sarushca cangapajllami.
14 Cancunaca, cai pachapajca luz shinami canguichij. Urcu jahuapi tiyaj llajtataca ricunallami.
15 Maijanpish qꞌuipaman canastahuan* tapangapajllaca shuj lamparataca mana japichinchu. Ashtahuanpish huasi ucupi cajcunata achijyachichunmi mesa jahuapi churan.
16 Cancunapish chai luz shinallatajmi gentecunapaj ñaupajpica achijyachina canguichij. Cancunapaj alli rurashcacunata ricushpami jahua pachapi caj cancunapaj Yayataca jatunyachingacuna.
17 Leytapish, Profetacuna quillcashcatapish* anchuchingapaj shamushcataca ama yuyaichijchu. Mana anchuchingapajchu shamurcani. Ashtahuanpish tucuita pajtachingapajmi shamurcani.
18 Cancunamanca mana llullanichu. Jahua pachapish, cai pachapish chingaringami. Shinapish Leypi quillcashca shimicunaca tucui pajtangacama shuj letrallapish, letramanta shuj partellapish manataj chingaringachu.
19 Chaimanta maijanpish cai mandashcacunamanta ashallatapish mana cazushpa, shujtajcunata chashnallataj ruranata yachachijca jahua pacha Gobiernopica mana yaicui tucungachu.* Ashtahuanpish mandashcacunata cazushpa shujtajcunaman chaillatataj yachachijca, jahua pacha Gobiernopica yaicui tucungami.*
20 Chaimantami cancunamanca cashna nini, shungumanta cashcata rurajcuna mana cashpaca fariseocuna shinallataj, mandashcacunata quillcajcuna shinallatajmi canguichij. Chashna cashpaca jahua pacha Gobiernopica manataj yaicunguichijchu.
21 Cancunapaj ñaupa yayacunamanca: ‘Ama huañuchingui, pipish huañuchijca juezcunapajman* apashcami canga’ nishcataca uyashcanguichijmi.
22 Ñucaca cashnami nini, maijanpish quiquin huauquihuan pꞌiñarishpa purijca juzgashca cangapajmi juezcunapajman apashca canga. Shinallataj, quiquin huauquita millai shimicunahuan cꞌamijca Jatun Juezcunapajmanmi* apashca canga. Ashtahuanpish pitapish ‘upa, imapajpish mana vali’ nijca tucuita tucuchij* ninaman richun nishcami canga.
23 Chaimanta, ofrendata cungapaj altarman apacushpa, cambaj huauqui canhuan pꞌiñarishcata yuyarishpaca,
24 ofrendata altar ñaupajpi saquishpa cambaj huauquihuanraj alli tucumugri. Chai huashaca ofrendata cungapaj tigramunguilla.
25 Canta demandaj juicioman pushajpica manaraj juezcunapajman chayashpami utca allichina cangui. Mana chashna rurajpica demandajca, juezpaj maquipimi cantaca churanga. Cutin juezca carcelta cuidajpaj maquipimi cantaca churanga. Chai cuidaj runami cantaca carcelpi churanga.
26 Carcelmantaca can dibishca cullquita* tucui pagangacama manataj llujshinguichu. Canmanca mana llullanichu.
27 ‘Ama huainayangui’* nishcataca uyashcanguichijmi.
28 Shinapish ñucaca cashnami nini, maijanpish chayarina munaihuan shuj huarmita ricushpa saquirijca, ñami paipaj shungupica huainayashca.*
29 Chaimanta cambaj alli lado ñahui juchapi urmachisha nijpica, surcushpa caruta shitai. Cambaj tucui cuerpo tucui tucuchishca* canapaj randica, cambaj cuerpomanta shuj partellata surcushpa shitanami ashtahuan alli canga.
30 Shinallataj cambaj alli lado maqui juchapi urmachisha nijpica, pꞌitishpa caruta shitai. Cambaj tucui cuerpo tucui tucuchishca* canapaj randica, cambaj cuerpomanta shuj partellata surcushpa shitanami ashtahuan alli canga.
31 Chashnallataj: ‘Maijanpish paipaj huarmimanta divorciarishpaca, divorciarishca certificadota paiman cuchun’ nishcataca allimi yachanguichij.
32 Ashtahuanpish ñucaca cashnami nini: maijanpish paipaj huarmi mana huainayashca* cajpi divorciarishpaca, paipaj huarmitaca huainayana* juchapimi urmachi tucun. Shinallataj chai divorciarishca huarmihuan cazarajpish huainayanmi.*
33 Ñaupa punllacunapi causajcunamanca: ‘Mana pajtachina cashpaca ama jurangui. Jehová* Diosman cusha nishcataca pajtachinatajmi cangui’ nishcatapish yachanguichijmi.
34 Shinapish ñucaca cashnami nini: ama nunca juranguichij. Jahua pacha nishpapish ama juranguichij. Jahua pachaca Diospaj jatun tiyarinami.
35 Cai pacha nishpapish ama juranguichij. Cai pachaca Diospaj chaqui sarunami. Jerusalén nishpapish ama juranguichij. Jerusalenca jatun Mandajpaj llajtami.
36 Cancunapaj causaimantapish* ama juranguichij. Cancunaca, shuj ajchallatapish yurajyachinata, yanayachinataca mana valinguichijchu.
37 Chaimanta cancunaca, ‘ari’ nishcataca pajtachichij, ‘mana’ nishcatapish pajtachichij. Cancuna nishcata mana pajtachishpaca Diablo* yuyachishcatami ruracunguichij.
38 Cancunaca: ‘Ñahui lulunta chugrichijtaca paipaj ñahui luluntapish chugrichichun. Quiruta pꞌaquijtapish paipaj quiruta pꞌaquichun’ nishcatami yachashcanguichij.
39 Shinapish ñucaca cashnami nini: millai runahuanca ama macanacuichijchu. Ashtahuanpish alli lado quijadospi huajtajpica caishuj lado quijadostapish ricuchilla.
40 Maijanpish cambaj ucu churanata quichusha nishpa juezcunapajman pushasha nijpica, cambaj jahua churanatapish cushpa cachailla.
41 Maijanpish canta shuj horata trabajachun obligajpica, ishqui horasta trabajailla.
42 Maijanpish ayudachun nijpica ayudailla. Maijanpish imata mañachichun* nijpica mana mitsashpa mañachilla.
43 ‘Shujtajcunataca cꞌuyangui. Canta pꞌiñajcunataca pꞌiñangui’ nishcatapish uyashcanguichijmi.
44 Shinapish ñucaca cashnami nini: cancunata pꞌiñajcunata cꞌuyashpa catichij. Cancunata catirashpa llaquichijcunamantapish Diosta mañashpa catichij.
45 Chashnami jahua pacha Yayapaj huahuacuna cashcataca ricuchinguichij. Diosca allicunamanpish, millaicunamanpishmi intita cun. Shinallataj cashcata rurajcunamanpish, cashcata mana rurajcunamanpishmi tamyata cachan.
46 Cancunata cꞌuyajcunallata cꞌuyashpaca, ¿imatataj chasquinguichijyari? ¿Manachu impuestota cobrajcunapish chashnallataj rurancuna?
47 Cancunapaj huauquicunallata saludashpaca, ¿ima allitataj ruracunguichijyari? ¿Manachu shujtaj llajtamanta gentecunapish chashnallataj rurancuna?
48 Chaimanta, jahua pachapi caj cancunapaj Yaya tucuipi cꞌuyaj shinallataj cancunapish tucuipi cꞌuyajcuna caichij.
Notacuna
^ O “espiritupi huajcha cajcunaca”.
^ Caipica Diospaj Gobiernomantami parlacun.
^ Caipica shujtajcuna nishpaca Diosmantapishmi parlacun.
^ Cai canastaca chaquishca granocunata pesangapajmi carca.
^ Leypish, Profetacuna quillcashcapish nishpaca Genesismanta Malaquías librocama quillcashcatami nicun.
^ Griego rimaipica: “uchilla nishcami canga” ninmi.
^ Griego rimaipica: “jatun nishcami canga” ninmi.
^ O “tribunal de justiciaman”.
^ O “Tribunal Supremomanmi”.
^ Griego rimaipica: “Gehena” ninmi. “Gehena” shimita huasha diccionariopi ricui.
^ Griego rimaipica: “último cuadranteta” ninmi. Shuj cuadrante cullquitaca casi chunga minutocunata trabajashcamantami pagajcuna carca.
^ Griego rimaipica: “moikhéia” ninmi. “Huainayana” shimita huasha diccionariopi ricui.
^ Griego rimaipica: “moikhéia” ninmi. “Huainayana” shimita huasha diccionariopi ricui.
^ Griego rimaipica: “Gehena” ninmi. “Gehena” shimita huasha diccionariopi ricui.
^ Griego rimaipica: “Gehena” ninmi. “Gehena” shimita huasha diccionariopi ricui.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Griego rimaipica: “moikhéia” ninmi. “Huainayana” shimita huasha diccionariopi ricui.
^ Griego rimaipica: “moikhéia” ninmi. “Huainayana” shimita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “Cancunapaj umamantapish” ninmi.
^ Griego rimaipica: “Millai” ninmi.
^ Caipica interesta mana cobrashpa mañachinamantami parlacun.
