Romanos 3:1-31
3 Shinaca ¿judío canapish, circuncisionta* rurachishca canapish ima allitaj cangari?
2 Chaica tucuimanta yalli allimari. Puntapica Diosca paipaj jucha illaj shimitaca judiocunamanmi cushca.
3 Shinapish ¿maijan judiocuna feta mana charijpica imashi tucunga? ¿Paicuna feta mana charishcamantachu Diosca pai nishcata mana pajtachinga?
4 ¡Mana chashnachu! Tucui gentecuna llulla cajpipish Diosca pai nishcataca pajtachingatajmi. Quillcachishcapi nishca shinaca: “Cashcata ruraj cashcataca cambaj rimashca shimihuanmi ricuchingui, canta juzgajpipish mishanguimi”.
5 Shinapish ñucanchij mana alli ruraicuna Dios cashcata ruraj cajta ricuchijpica, ¿imatataj nishunyari? ¿Dios ñucanchijta llaquichishpaca pandarinchu? (Shuj runa yuyashca shinami parlacuni).
6 ¡Mana chashnachu! Chashna cajpica, ¿ima shinataj Diosca cai pachataca juzgangari?
7 Ñuca llullajpi, ñuca llullashca shimicuna Dios mana llullaj cashcata ricuchijpi, gentecunapish paita alabajpica, ¿imamantataj Diosca ñucataca juchayujta shina juzgan?
8 ¿Ima nishpataj “Allicunata chasquingapajca mana allitami rurana canchij” mana ninchij? Maijancunaca ñucanchij chashna nicujta shinami yangamanta juchachincuna. Chai gentecunaca juzgashcami cana can.
9 Shinaca ¿judiocunaca shujtajcunata yallichari canchij? ¡Mana chashnachu! Judiocunapish, griegocunapish tucuicuna juchayuj cashcatami ña ricuchishcanchij.
10 Quillcachishcapi nishca shinaca: “Shuj runallapish cashcata rurajca mana tiyanchu, shujllapish mana tiyanchu.
11 Alli yuyaiyujpish pi mana tiyanchu, Diosta mashcajpish pi mana tiyanchu.
12 Tucuicunami Diosmantaca caruyashcacuna, imapajpish mana valimi tucushcacuna. Llaquij cashcatapish ni pi mana ricuchinchu, shujllapish mana ricuchinchu”.
13 “Paicunapaj tungurica huañushcacunata pambana pascashca jutcu shinami. Paicunapaj cꞌalluhuanca llullacunatami nincuna”. “Paicunapaj shimimanta llujshishcacunaca culebrapaj veneno shinami”.
14 “Paicunaca imapish tucuchun nishpa, jayaj shimicunata rimanahuan jundami”.
15 “Paicunapaj chaquicunapish huañuchinamanmi utca rincuna”.
16 “Paicunaca gentecunata llaquichishpa, sufrichishpami purincuna.
17 Shinallataj shujtajcunahuan sumajta causanataca mana rijsincunachu”.
18 “Diostapish paicunaca mana manchancunachu”.
19 Maijanpish mana culpayujchu cani ama nichun, Diospaj ñaupajpipish tucuicuna culpayuj cashcata, llaquichishca cana cashcatapish ricuchichunmi Leypi nishcacunaca Leyta catijcunapaj cashcata yachanchij.
20 Shinaca leypi nishcata rurashcallamantaca Diosca pitapish cashcata rurajta shinaca mana ricungachu. Ashtahuanpish ley tiyashcamantami ñucanchijcunaca juchayuj cashcata intindinchij.
21 Leypi, Profetacuna huillashcapi nishca shinami cunanca leyta mana catishpapish Diospaj ñaupajpica cashcata ruraj shina ricuri tucuncuna.
22 Pi cashpapish, maimanta cashpapish feta charijcunaca Jesucristopi feta churashcamantami Diospaj ñaupajpica cashcata ruraj shina ricuri tucuncuna.
23 Tucuicuna juchata rurashcamantami Dios shina jucha illajca mana cai tucuncuna.
24 Cristo Jesusca paipaj causaita cushpami juchamanta randishpa quishpichirca.* Chai regalotaca yallitaj llaquishpami Diosca gratis curca. Chaimantami paicunaca Diospaj ñaupajpica cashcata rurajcuna shina ricurincuna.
25 Jesuspaj yahuarpi feta churashpa tucuicuna paihuan alli tucuchunmi Diosca Jesusta shuj ofrendata shina curca. Diosca ñaupa punllacunapica pacienciata charishcamantami gentecunapaj juchacunata perdonarca. Chashnami paica cashcata ruraj cashcata ricuchirca.
26 Cunan punllacunapipish Jesuspi feta churajcunatami Diosca cashcata rurajta shina ricun. Chashnami paica cashcata ruraj cashcata ñucanchijmanpish ricuchin.
27 Shinaca ¿imamantapish jatun tucunallachu canchij? Mana. ¿Leyta cazushcallamantachu jatun tucuna canchij? Mana. Ashtahuanpish crina cashcata ricuchij leymi ni pi mana jatun tucuna cashcata ricuchin.
28 Shuj runaca leyta cazushcallamantaca cashcata rurajca mana canchu. Ashtahuanpish feta charishcamantami paica cashcata ruraj can. Chaitami ñucanchijca intindinchij.
29 ¿Diosca judiocunapajllachari Dios can? ¿Manachu paica shujtaj llajta gentecunapajpish Dios can? Ari, paica shujtaj llajta gentecunapajpish Diosmi can.
30 Diosca shujlla Diosmi can. Paica circuncisionta rurachishcacunataca feta charishcamantami cashcata rurajta shina ricun. Circuncisionta mana rurachishcacunatapish paicuna feta charishcamantami cashcata rurajta shina ricun.
31 Shinaca ¿ñucanchij feta charishcamantachu leytaca mana valichinchij? ¡Mana chashnachu! Ashtahuanpish ñucanchijca feta charishcamantami leytaca valichinchij.
Notacuna
^ “Circuncisión” shimita huasha diccionariopi ricui.
^ “Randishpa quishpichina” shimita huasha diccionariopi ricui.
