Romanos 5:1-21
5 Cunanca feta charishcamantami cashcata rurajcuna nishca canchij. Chaimantami ñucanchij Amito Jesucristomanta Dioshuanpish sumaj causaita chari tucunchij.*
2 Ñucanchijca Jesuspi feta churashcamantami Diospajman cꞌuchuyai tucunchij. Dios yallitaj llaquij cashcatapish cunanmi chasquicunchij. Shinallataj Dios ñucanchijta jatunyachinata shuyacushcamantami cushicui tucunchij.*
3 Ashtahuanpish mana chaillamantachu cushicuna canchij. Llaquicunata charishpapishmi cushicui tucunchij.* Ñucanchij yachashca shinaca llaquicunaca ahuantachunmi ayudan.
4 Ahuantashpaca Diospaj ñaupajpimi alli nishca cashun. Diospaj ñaupajpi alli nishca cashcamantami shuyashpa catishun.
5 Ñucanchij shuyacushcamantaca mana pingaipi saquirishunchu. Diosca cꞌuyashcata ricuchingapajmi paipaj espíritu santota ñucanchijman cushca.
6 Ñucanchij juchayujcuna* cajpirajmi Dios agllashca punllapi Cristoca millai gentecunamanta huañurca.
7 Cashcata ruraj runamantaca casi ni pi mana huañusha ningachu. Ashtahuanpish alli runamantaca tal vez maijanca huañusha ningami.
8 Ñucanchij juchayujcuna cajpirajmi Cristoca ñucanchijmanta huañurca. Chashnami Diosca ñucanchijta cꞌuyashcata ricuchirca.
9 Cristopaj yahuarmantami cunanca cashcata rurajcuna nishca canchij. Gentecunata Dios llaquichi punllapicarin quishpirishunmi.
10 Diospaj contra cashpapish paipaj Churi huañushcamantami Dioshuan alli tucushcanchij. Cunanca Dioshuan alli cashcamantacarin Jesuspaj causaimantami quishpichishcataj cashun.
11 Shinapish mana chaillachu can, ñucanchij Amito Jesucristomantami Dioshuan alli apanacushpa cushicunchij. Jesusmantami ñucanchijca Dioshuan cutin alli apanacunchij.
12 Shuj runallamantami juchaca cai pachaman yaicurca. Chai juchamantami huañuipish yaicurca. Chashnami tucuicuna juchayuj cashcamanta huañuica tucuicunata japirca...
13 Ley manaraj tiyajpimi juchaca cai pachapi ña tiyarca. Shinapish ley mana tiyajpica maijanpish shuj juchamantaca mana juchachishca cai tucunchu.
14 Chashnapish Adanpaj punllacunamanta Moisespaj punllacunacamami huañuica tucuicunata shuj rey shina mandarca. Adán shina juchata mana rurajcunatapishmi chashnallataj mandarca. Adanca qꞌuipa shamugrijman rijchaj shinami carca.
15 Shinapish Dios cushca regaloca mana Adanpaj jucha shinachu. Shuj runapaj juchallamantami achca gentecuna huañurca. Ashtahuanpish Dios cushca regalomanta, pai yallitaj llaquij cashcata ricuchishcamantaca achca gentecunami beneficiarincuna. Chai regalotaca Jesucristo yallitaj llaquij cashcamantami Diosca achca gentecunaman curca.
16 Dios cushca regalopish, shujlla runapaj juchapish mana igualchu can: shuj juchallamantami gentecunaca culpayuj tucurcacuna. Shinapish achca gentecuna juchata rurashca qꞌuipami Diosca chai regalotaca curca. Chaimantami Diosca gentecunataca cashcata rurajcunata shina ricun.
17 Shuj runapaj juchallamantami huañuica shuj rey shina mandarca. ¡Ashtahuanpish Dios yallitaj llaquij canapish, cashcata rurajcuna cangapaj pai cushca regalopish ashtahuan yalli allimi can. Chaita chasquijcunacarin Jesucristomantami causangacuna. Shinallataj reycuna shinami mandangacuna!
18 Ima shinami shuj juchallamanta tucui laya gentecuna culpayuj tucurcacuna. Chashnallatajmi shuj alli ruraillamanta tucui laya gentecuna cashcata rurajcuna nishca cai tucuncuna, causaitapish chasqui tucuncuna.
19 Ima shinami shuj runa mana cazushcamanta achca gentecuna juchayuj tucurca. Chashnallatajmi shuj runa cazushcamantaca achca gentecuna cashcata ruraj tucungacuna.
20 Gentecuna yallitaj juchayuj cashcata cuentata cuchunmi Diosca Leyta paicunaman curca. Shinapish gentecuna achca juchacunata rurajpimi Diosca yallitaj llaquij cashcata paicunaman ricuchirca.
21 ¿Imapajtaj chashna rurarca? Juchaca rey shina mandashpami huañuiman aparca. Chashnallatajmi Dios yallitaj llaquij canapish cashcata rurashpa rey shina mandacun. Chaimantami gentecunaca ñucanchij Amito Jesucristomanta huiñai causaita charingacuna.
Notacuna
^ Caitaca “sumaj causaitami charinchij” nishpapishmi traducishcacuna.
^ Caitaca “cushicunchij” nishpapishmi traducishcacuna.
^ Caitaca “cushicunchij” nishpapishmi traducishcacuna.
^ Griego rimaipica: “irquicuna” ninmi.
