Romanos 6:1-23
6 Shinaca ¿imatataj nishun? ¿Dios yallitaj llaquij cashcata ricuchishpa catichunca juchatachu rurashpa catina canchij?
2 ¡Mana chashnachu! Ñucanchijca juchamanta cacharichishcami canchij, ¿ima shinataj juchata rurashpa causacushunllari?
3 Tucui ñucanchijcuna Cristo Jesuspi bautizarishcacunaca* paipaj huañuipi bautizarishca cashcataca ¿manachu intindinguichij?
4 Shinapish paipaj huañuipi bautizarishcamantami Diosca ñucanchijtaca paihuan pambarca. Ima shinami Yayapaj podermanta Cristoca huañushcacunapaj chaupimanta causarishpa mushuj causaita causan. Chashnallatajmi ñucanchijpish cunanca mushuj causaita causanchij.
5 Pai huañushca shina huañushpaca pai causarishca shinallatajmi causarishun. Chashnami paihuanca tandalla canchij.
6 Ñucanchij mauca causaica paihuan caspipi clavashca cashcatami yachanchij. Chaimantami ñucanchij juchayuj aichaca mana mandashpa catin, juchapipish ña mana huatashca shina causanchij.
7 Maijanpish huañushpaca paipaj juchamanta perdonashcami* can.
8 Ñucanchijca Cristohuanmi huañushcanchij. Chaimantami paihuan causana cashcatapish crinchij.
9 Huañushcacunapaj chaupimanta causarishca Cristo ña mana nunca huañuna cashcataca yachanchijmi. Huañuica paitaca shuj amo shina mana mandai tucunchu.
10 Paica juchata anchuchingapajmi shuj cutinlla huañurca. Cutinca ña mana huañungachu. Cunanca paipaj causaihuanca Diospaj munaita rurangapajmi paica causan.
11 Cancunapish juchata rurangapajca huañushca shinami cana canguichij. Shinapish Cristo Jesusta catijcuna cashcamantaca Diospaj munaita rurangapajmi causana canguichij.
12 Chaimanta jucha cancunata shuj rey shina mandashpa catichunca ama saquichijchu. Shinallataj cancunapaj huañunalla aicha munaitapish ama cazuichijchu.
13 Millaita rurangapajllaca cancunapaj cuerpotaca* juchaman ama cuichijchu. Ashtahuanpish huañushcacunapaj chaupimanta causarishca shina cashcamanta Diospaj maquipi mingarichij. Cashcata rurangapaj cancunapaj cuerpotaca* Diospaj maquipi churaichij.
14 Cancunataca leyca ña mana ashtahuan mandacunchu. Ashtahuanpish Dios yallitaj llaquij cashcatami chasquishcanguichij. Chaimantami juchaca cancunataca amo shina ña mana mandana can.
15 Shinaca ¿ñucanchijta ley ña mana mandacushcamanta, ashtahuanpish Dios yallitaj llaquij cashcamantachu juchataca ruranalla canchij? ¡Mana chashnachu!
16 Maijanpish shuj runata siempre cazushpaca chai runapaj sirvijmi tucun. Chaitaca cancunaca yachanguichijmi. Shinaca juchata sirvij cashpaca cancunaca huañunguichijmi. Ashtahuanpish Diosta sirvij cashpa, paita cazushpaca cancunaca cashcata rurajcunami canguichij.
17 Cancunaca juchapajta rurajcunami carcanguichij. Shinapish cunanca shungumantami Diosta cazusha ninguichij, pai yachachishcatapishmi catisha ninguichij. Chaimantami Diosta pagui ninchij.
18 Juchamanta cacharishca qꞌuipami Diosta sirvijcuna, cashcata rurajcunapish tucurcanguichij.
19 Cancuna juchayuj cashcamantami gentecuna intindinalla shimicunapi parlacuni. Cancunaca millai, mapa, mana alli munaicuna cancunapaj cuerpota* shuj sirvij runata shina mandachunmi saquishcanguichij. Shinapish cunanca cashcata rurana, jucha illaj cana cancunapaj cuerpota* shuj sirvij runata shina mandachun saquichij.
20 Cancunaca juchapajta rurajcuna cashpaca cashcata ruranataca mana minishtircanguichijchu.
21 Shinaca ¿cancunapaj ruraicunamantaca imatataj chai punllacunapica chasquircanguichij? Cancunapaj ruraicunamantaca cunanca pingaringuichijmi. Chai ruraicunaca huañuimanmi apan.
22 Ashtahuanpish cunanca juchamanta cacharichishca cashpami Diosta sirvijcuna tucushcanguichij. Chaimanta ima jucha illajlla ruraicunata ruraichij. Chashna rurashpaca huiñai causaitami chasquinguichij.
23 Juchapaj pagoca huañuimi. Shinapish Dios cushca regaloca huiñai causaimi. Chaitaca ñucanchij Amito Cristo Jesusmantami Diosca cun.
Notacuna
^ “Bautizana” shimita huasha diccionariopi ricui.
^ O “cacharichishcami”.
^ Griego rimaipica: “cancunapi caj miembrocunataca” ninmi.
^ Griego rimaipica: “cancunapi caj miembrocunataca” ninmi.
^ Griego rimaipica: “cancunapi caj miembrocunata” ninmi.
^ Griego rimaipica: “cancunapi caj miembrocunata” ninmi.
