Romanos 8:1-39
-
Espiritumi causaita cushca, quishpichishcapish (1-11)
-
Espíritu santomi Diospaj huahuacuna cashcata huillan (12-17)
-
Dios rurashcacunaca Diospaj huahuacunata cacharichijtami shuyacuncuna (18-25)
-
“Diospaj espiritumi ñucanchijpaj randi mañan” (26, 27)
-
Diosca pai agllashcacunatami cayarca (28-30)
-
Dios cꞌuyashcamantami tucuita mishanchij (31-39)
8 Cristo Jesushuan shuj shinalla cajcunaca mana culpayuj cancunachu.
2 Cunanca causaita cuj espiritupaj leymi Cristota catijta rurashca. Chai leymi juchapaj leymantapish, huañuipaj leymantapish cantaca quishpichishca.
3 Gentecuna juchayuj cashcamantami Moisesman cushca leyca cantaca mana quishpichi tucurca. Diosca paipaj propio Churitami juchayuj gentecunata shina rurashpa juchata anchuchingapaj cacharca. Chashnami Diosca gentecunapaj juchataca chingachirca.
4 Diospaj espíritu mandachun saquishpaca cashcata ruraj Leypi nishcata pajtachijcunami canchij. Chashnami ñucanchij juchayuj cuerpo mandachunca mana saquinchij.
5 Aicha munaita rurashpa causajcunaca aicha munaita rurana yuyaillami. Cutin espiritupajta rurashpa causajcunaca espiritupajta rurana yuyaillami.
6 Aicha munaipi yuyanaca huañuimanmi apan. Ashtahuanpish espiritupi yuyanaca causaitapish, sumaj causaitapishmi cun.
7 Aicha munaita rurana yuyailla cashpaca Diospaj contrami tucunchij. Juchayuj aichaca Diospaj leytaca mana cazunchu, manataj cazui tucunchu.
8 Chaimantami aicha munaita rurashpa causajcunaca Diostaca mana cushichi tucuncuna.
9 Shinapish huauquicuna, Diospaj espíritu cancunapi cashcamantami aicha munashcata yuyashpaca mana causanguichij. Ashtahuanpish espíritu munashca shinami causanguichij. Maijanpish Cristopaj espirituta mana charijca mana paipajchu.
10 Ashtahuanpish Cristo cancunahuan shuj shinalla cajpica cancunapaj cuerpoca juchamantami huañushca. Shinapish Diospaj ñaupajpi cashcata rurajcuna cashcamantami espirituca cancunamanca causaita cun.
11 Diospaj espiritumi Jesustaca huañushcacunapaj chaupimanta causachirca. Chai espíritu cancunapi cajpica, Diosca paipaj espirituhuanmi cancunapaj huañujlla cuerpotaca cutin causachinga.
12 Chaimanta huauquicuna, ñucanchij juchayuj aicha mandachunca manataj saquinachu canchij.
13 Cancunaca aichapaj munaita rurashpaca huañunguichijtajmi. Shinapish espiritupaj ayudahuan aicha munashca ruraicunata huañuchishpaca causanguichijmi.
14 Diospaj espíritu yuyachishca shina causajcunaca Diospaj huahuacunatajmi can.
15 Diospaj espiritutaca huatashca shina cangapaj, manchaihuan cutin cangapajca mana chasquircanguichijchu. Ashtahuanpish Diospaj huahuacuna cangapajmi espiritutaca chasquircanguichij. Chai espiritumi cancunataca: “¡Abba,* Yayitu!” nishpa caparichicun.
16 Diospaj espiritullatajmi ñucanchijmanca Diospaj huahuacuna cashcata huillan.
17 Diospaj huahuacuna cashpaca Dios cusha nishca herenciatami japishun. Ñucanchijpish Cristoman cushca herenciallatatajmi paihuan japishun. Cristo shinallataj llaquita apashpaca pai shinallatajmi jatunyachishca cashun.
18 Shamuj punllapi Dios imata cusha nishca sumaj bendicionhuan chꞌimbapurajpica cunan punlla llaquicunaca imapish mana canchu.
19 Dios paipaj huahuacunata ricuchichunmi tucui pai rurashcacunaca ricuna munaihuan chai yuyailla shuyacuncuna.
20 Dios rurashcacunaca mana quiquin munaimantachu yanga tucurcacuna. Ashtahuanpish Diosmi chashna tucuchun saquirca. Chashna tucuchun saquishpapish Diosca shuj shuyanatami curca.
21 Chaimantami Dios rurashcacunaca ismuna aichamanta cacharichishca cangacuna. Paicunaca Diospaj huahuacuna cashcamantami ismuna aichamanta cacharishca causangacuna.
22 Ñucanchijca tucui imallata Dios rurashcacuna cunancama tandalla huacashpa, nanachicujtami yachanchij.
23 Shinapish cunanca ñucanchijca espíritu santotami charinchij. Chaica shamuj punllacunapi imalla shamuna cashcatami ricuchin. Dios paipaj huahuacunata shina chasquingacamami ñucanchijpish shungu ucupica huacacunchij. Ñucanchijta quishpichingapaj Jesús paipaj causaita cushcamantami ñucanchij cuerpomanta cacharichishca cashun.
24 Juchacunamanta Dios quishpichijpimi ñucanchij shuyacushcataca chasquircanchij. Shinapish shuj runaca ima shuyacushcata chasquishpaca ña mana shuyashpa catinchu ¿nachu?
25 Ashtahuanpish ñucanchijca manaraj ricushcata shuyacushpaca ricuna munaillami ahuantashpa shuyacunchij.
26 Shinallataj ñucanchij débil cajpimi espíritu santoca ayudan. Huaquinpica Diosta mañacushpaca imata mañanataca mana yachanchijchu. Shungupi huacashpa imata mana rimai tucujpipish Diospaj espiritumi ñucanchijpaj randi mañan.
27 Diosca ñucanchij shunguta rijsij cashcamantami espíritu imata mañashcataca yachan. Espíritu santoca Dios munashca shinami jucha illajcunamanta mañan.
28 Diosca paita cꞌuyajcuna alli cachunmi pai rurashcacuna tandalla imatapish rurachun churashca. Paita cꞌuyajcunataca pai munashcata pajtachingapajmi cayashca. Chaitaca ñucanchijca yachanchijmi.
29 Diosca callarimantami paicunataca chꞌicanyachirca. Paipaj quiquin Churi shina paicunapish cana cashcatami huillarca. Chashnami paipaj Churica achca huauquicunapuramanta punta churi tucuna carca.
30 Diosca pai chꞌicanyachishcacunatami cayarca. Pai cayashcacunataca cashcata rurajcunami canguichij nircami. Qꞌuipaca cashcata rurajcunami canguichij nishcacunataca jatunyachircami.
31 ¿Caicunamantaca imatataj nishunyari? Dios ñucanchijhuan cajpica, ¿pitaj ñucanchij contra cai tucungari?
32 Diosca paipaj quiquin Churi llaquita apachunca mana jarcarcachu. Ashtahuanpish ñucanchijmanta huañuchunmi curca. Shinaca ¿manachu ñucanchijmanca tucui shujtaj cosascunatapish llaquishpa cunga?
33 ¿Dios agllashcacunataca pitaj juchachi tucungari? Diosmari paicunataca cashcata rurajcunami canguichij nishca.
34 ¿Pitaj paicunataca juzgangari? Ni pi mana juzgai tucunchu. Cristo Jesusmi paicunamantaca huañurca. Paica huañushcacunapaj chaupimanta causachishca cashpami cunanca Diospaj alli ladopi tiyacun. Ñucanchijmantapishmi Diosta rogashpa mañacun.
35 ¿Cristopaj cꞌuyaimantaca imataj caruyachi tucungari? ¿Llaquicunachu, nanaicunachu, catirashpa llaquichijcunachu, yaricaichu, churana illaj canachu, huañunalla llaquicunachu, espadachu ñucanchijtaca caruyachinga?
36 Quillcachishcapica: “Cambaj cashcamantami ñucanchijtaca punllanta huañuchishun nincuna. Gentecunaca huañuchina ovejacunata shinami ñucanchijtaca ricuncuna” ninmi.
37 Shinapish tucui caicunataca pai cꞌuyashcamantami ñucanchijca tucuita mishanchij.
38 Ñucaca tucui shunguhuanmi crini huañuipish, causaipish, angelcunapish, gobiernocunapish, cai punlla tiyashcacunapish, shamuj punlla tiyanacunapish, poderyujcunapish,
39 jahuaman ima cajpish, ucujman ima cajpish, ima shujtaj rurashcacunapish Diospaj cꞌuyaimantaca manataj caruyachi tucungachu. Ñucanchij Amito Cristo Jesuspishmi chai cꞌuyaitaca ricuchin.
Notacuna
^ “Abba” shimica hebreo o arameo rimaipimi can. Cai shimica ‘¡yayitulla!’ nisha ninmi.
