Rut 4:1-22
4 Boazca chai llajtapaj punguman huichiyashpami chaipi tiyarirca. Chaipimi Elimelecpaj ashtahuan cꞌuchulla familia chaita pasacurca. Chaimi paitaca: “Runa, shamui caipi tiyari” nirca. Chashna nijpimi chai ashtahuan cꞌuchulla familiaca chaipi tiyarirca.
2 Chai qꞌuipaca Boazca chai llajtamanta chunga autoridadcunata* cayashpami: “Caipi tiyarichij” nirca. Chaimi paicunaca chaipi tiyarircacuna.
3 Boazca Elimelecpaj ashtahuan cꞌuchulla familiataca: “Noemica Moab llajtamantami tigramushca. Paica ñucanchij huauqui Elimelecpaj allpatami cꞌatuna can.
4 Chaitami canman huillanata yuyarcani. Shinallataj cantaca: ‘Cai llajtapi causaj gentecunapaj ñaupajpi, autoridadcunapaj ñaupajpi cai allpata randi. Pero can mana tigra randisha nishpaca ñuca yachangapaj huillai. Cambaj qꞌuipaca ñucallami tigra randina derechota charini’ nisha nircanimi” nircami. Chaimi chai runaca: “Ñucaca tigra randisha ninimi” nirca.
5 Chaimi Boazca: “Noemipaj allpata randishpaca paipaj huañushca churipaj huarmitapishmi randina cangui. Paica Moab llajtamanta Rutmi can. Chashnami chai herenciaca chai huañushcapaj shutipi catinga” nircami.
6 Chaita uyashpami Elimelecpaj ashtahuan cꞌuchulla familiaca: “Ñucaca mana tigra randi tucunichu, tigra randishpaca pobreyashami. Ñuca tigra randina derechotaca can japishpa randilla” nirca.
7 Ñaupa punllacunapica Israel llajtapica shuj costumbremi tiyarca. Maijan runa pai randina* cashcata mana randisha nishpaca, chai randina derechotaca shujtaj runamanmi cuj carca. Chaipajca sandaliata llujshichishpami shujtaj runaman cuna carca. Chashnami Israel llajtapica ari ninacushcata pajtachijcuna carca.
8 Chaimi Elimelecpaj ashtahuan cꞌuchulla familiaca paipaj sandaliata llujshichishpa Boaztaca “Can randilla” nirca.
9 Chashna nijpimi Boazca autoridadcunamanpish, tucui chaipi cajcunamanpish: “Cunanca cancunami testigo canguichij. Elimelecpaj tucui imalla charishcacunatapish, Kilionpaj, Mahlonpaj tucui imalla charishcacunatapishmi Noemiman randini.
10 Shinallataj Moab llajtamanta Ruttami ñucapaj huarmi cachun japini. Paica Mahlonpaj huarmimi carca. Mahlonpaj charishca allpaca paipaj huahua huahuacunapajllatajmi saquiringa. Chashnami paipaj huauquicunapish, cai llajta gentecunapish paipaj shutitaca mana cungaringacuna. Cunanca cancunami testigo canguichij” nircami.
11 Tucui chai llajta pungupi cajcunapish, autoridadcunapish cashnami nircacuna: “¡Ñucanchijmi testigo canchij! Cambaj huasiman yaicuj huarmitaca Jehová Dios bendiciachun. Paica Raquel, Lea shina cachun. Paicunamantami Israel llajtaca llujshirca. Efratapipish tucui alli llujshichun. Belenpipish cambaj shuti alli nishca cachun.
12 Jehová Diosca cai joven huarmihuan huahua huahuacunata canman cuchun. Perezpaj familia shinallataj achcacuna cachun. Perezpaj yaya mamaca Tamar, Judapishmi carca” nircacunami.
13 Boazca Ruttaca paipaj huasimanmi pusharca. Chashnami Rutca Boazpaj huarmi tucurca. Paica Ruthuanmi chayarirca. Chaimi Jehová Diosca Rut chichu saquirishpa shuj huahuata charichun saquirca.
14 Huarmicunaca Noemimanca chashnami nircacuna: “Jehová Diosca jatunyachishca cachun. Paimi cambaj cusapaj familia canta tigra randichun saquishca. ¡Paipaj shutitaca tucui Israel llajtapi yachaj chayashca cachun!
15 Cai huahuami canmanca cutin cushi causaita cunga. Canta cꞌuyaj nuerapaj huahua cashcamantami can yuyajyajpipish canta cuidanga. Cambajca chai huahuaca canchis* huahuacunatapish yalli allimi can” nircacunami.
16 Noemica chai huahuataca paipaj rigrapimi marcarca. Paimi chai huahuataca huiñachirca.
17 Chai huahuataca vecinacunami shutita churarca. Paicunaca “Noemipajca shuj huahuami huacharishca” nishpami Obedta shutichircacuna. Paimi Jesepaj yaya can. Cutin Jeseca Davidpaj yayami can.
18 Perezpaj huahua huahuacunaca caicunami can. Perezca Hezronpaj yayami carca.
19 Hezronca Rampaj yayami carca. Ramca Aminadabpaj yayami carca.
20 Aminadabca Nahsonpaj yayami carca. Nahsonca Salmonpaj yayami carca.
21 Salmonca Boazpaj yayami carca. Boazca Obedpaj yayami carca.
22 Obedca Jesepaj yayami carca. Jeseca Davidpaj yayami carca.
Notacuna
^ Hebreo rimaipica: “ancianocunata” ninmi.
^ “Tigra randij” shimita huasha diccionariopi ricui.
^ O “siete”.
